އެމްއެމްޕީއާރުސީގެ ހިޔާނާތުގެ ފައިސާ އެކި ފަރާތްތަކަށް ބެހުމުގައި މެދުވެރިއެއްގެ ރޯލު އަދާކުރި ސްކޯސް އޮފް ފްލެއާ (އެސްއޯއެފް) އާއި އެ ކުންފުނީގެ ވެރިންނަށް ދައުވާ ނުކުރަން ނިންމުމަކީ ގާނުނީ ގޮތުން ސައްހަ ނިންމުމެއް ކަމަށް ދެކިވަޑައިނުގަންނަވާ ކަމަށް ކުރީގެ ޕްރޮސެކިއުޓާ ޖެނެރަލް އަހުމަދު މުއިއްޒު ވިދާޅުވެއްޖެއެވެ.
މުއިއްޒު ވިދާޅުވީ އެމްއެމްޕީއާރުސީގެ ހިޔާނާތުގެ މައްސަލައިގައި ކޮންމެ ނިންމުމެއްވެސް ނިންމަން ވާނީ ދައުލަތުގެ މަސްލަހަތު އިސްކޮށްގެން ކަމަށެވެ. އަދި އެފަދަ ނިންމުންތައް ނިންމި ސަބަބު ހާމަކޮށް، ރައްޔިތުންނަށް ޖަވާބުދާރީ ވާން ޖެހޭނެ ކަމަށްވެސް މުއިއްޒު ވިދާޅުވިއެވެ.
"މީގަ ކޮންމެ ނިންމުމެއްވެސް ނިންމަން ވާނީ ދައުލަތުގެ މަސްލަހަތުގަ. ރައްޔިތުންނަށް ޖަވާބުދާރީވެސް ވާން ޖެހޭނެ. ދައުލަތަށް ލިބެން ޖެހޭ މަންފާއެއްވެސް އޮންނަން ވާނެ،" މުއިއްޒު ވިދާޅުވިއެވެ.
ނަމަވެސް އެސްއޯއެފްގެ ވެރިންނަށް ދައުވާ ނުކުރަން ނިންމީ އެފަދަ ގޮތަކަށް ބަލައިފައި ނޫން ކަމަށާއި އެއީ ހެޔޮ ނިޔަތުގައި ކުރި ކަމެއް ކަމަށް ނުބެލެވޭ ކަމަށް މުއިއްޒު ވިދާޅުވިއެވެ. އަދި އެއީ ގާނޫނީ ގޮތުން ސައްހަ ނިންމުމެއް ނޫން ކަމަށްވެސް މުއިއްޒު ތުހުމަތު ކުރެއްވިއެވެ.
"އަޅުގަނޑަކަށް ހިއެއް ނުވޭ އެސްއޯއެފްގެ މައްޗަށް ދައުވާ ނުކުރަން ނިންމުމަކީ ގާނޫނީ ގޮތުން ސައްހަ ނިންމުމެއް ކަމަށް. އަދި އެއީ ދައުލަތުގެ މަސްލަހަތުގަ ނިންމާފަވާ ނިންމުމެއް ކަމަށްވެސް ނުދެކެން،" މުއިއްޒު ވިދާޅުވިއެވެ.
އެސްއޯއެފްއަށް ދައުވާ ނުކުރަން ނިންމިކަން ދައުލަތުން ހާމަ ކުރީ އެމްއެމްޕީއާރުސީގެ ހިޔާނާތުގެ ފައިސާއިން އެއް މިލިއަން ޑޮލަރު، ކުރީގެ ރައީސް އަބްދުﷲ ޔާމީނަށް ލިބިފައިވާ ކަމަށް ކްރިމިނަލް ކޯޓުން ކޮށްފައިވާ ހުކުމް އިސްތިއުނާފް ކުރުމަށް ސުޕްރީމް ކޯޓުގައި އިއްޔެ ބޭއްވި އަޑުއެހުމުގައިއެވެ.
ދައުލަތުގެ ވަކީލުން ވިދާޅުވީ އެ މައްސަލައިގައި ގިނަ އަދަދެއްގެ މީހުންނަށް ފައިސާ ފޮނުވައިފައިވަނީ އެސްއޯއެފުން ކަމަށްވާތީ، ހަގީގަތާ ހަމައަށް ވާސިލްވުމަށް އެމީހުންގެ އެއްބާރުލުން ބޭނުންވާ ކަމަށެވެ.
އެހެންކަމުން އާންމު މަސްލަހަތު އޮތީ އެމީހުން ދޭ ހެކިބަސް ނުވަތަ އެމީހުންދޭ އެއްބާރުލުމުގެ މައްޗަށް ބިނާކޮށް ދައުލަތަށް ގެއްލިފައިވާ ފައިސާ ހޯދުން ކަމުގައިވާތީ އެސްއޯއެފްގެ މައްޗަށް ދައުވާ ނުކުރަން ނިންމީ ކަމަށް ދައުލަތުގެ ވަކީލުން ވިދާޅުވިއެވެ.
މީގެ އިތުރުން އެސްއޯއެފްއިން 70 މިލިއަން ޑޮލަރާއި، 100 މިލިއަން ރުފިޔާ އެކި ފަރާތްތަކަށް ފޮނުވާފައިވާކަން އެނގިފައިވާ ކަމަށްވެސް އިއްޔެ ދައުލަތުން ބުންޏެވެ.