ށ. ފީވަކުގެ ފެނުގެ ނިޒާމުގެ އަމަލީ މަސައްކަތް މާލެ ވޯޓާ އެންޑް ސުވަރޭޖް ކޮމްޕެނީ (އެމްޑަބްލިއުއެސްސީ) އިން ފަށައިފިއެވެ.
އެމްޑަބްލިއުއެސްސީން ބުނީ އެ މަޝްރޫއުގެ ދަށުން މިހާރު ކުރިއަށް ދަނީ ފެން ޕްލާންޓް ބެހެއްޓުމަށް އިމާރާތްކުރާ ފެސިލިޓީ ބިލްޑިން އިމާރާތްކުރުމުގެ މަސައްކަތް ކަމަށެވެ.
ފެނުގެ ނިޒާމް ގާއިމް ކުރުމަށް ބޭނުންވާ ހޮޅި އާއި އެހެނިހެން ތަކެތި މިހާރު ވަނީ ށ. ފީވަކަށް ފޮނުވާފައެވެ.
އެ މަޝްރޫއުގެ ދަށުން ފީވަކުގައި 9.17 ކިލޯމީޓަރު ދިގު ފެން ހޮޅީގެ މައި ނެޓްވޯކެއް ގާއިމު ކުރުމާއި ފެން އުފެއްދުމަށްޓަކައި ދެ ޕްލާންޓެއް ބެހެއްޓުމުގެ މަސައްކަތް ކުރިއަށް ގެންދާނެއެވެ.
މީގެ އިތުރުން ފެން ރައްކާކުރުމަށްޓަކައި ތިން ތާންގީ ބެހެއްޓުންވެސް އެ މަޝްރޫގެ ދަށުން ކުރިއަށް ގެންދާނެއެވެ.
އެއާއެކު ގޭގޭގައި ފެން މީޓަރު ބަހައްޓައި، ފެނުގެ ކަނެކްޝަން ގުޅައިދީ، އެ ގެތަކަށް ރައްކާތެރި ބޯފެންވެސް އެމްޑަބްލިއުއެސްސީއިން ފޯރުކޮށްދޭނެއެވެ.
ހަމައެހެންމެ ފެން ތަހުލީލު ކުރުމަށް ބޭނުންވާ ސާމާނު އެ މަޝްރޫއުގެ ދަށުން ފީވަކަށް ފޯރުކޮށް ދިނުމަށް ހަމަޖެހިފައިވެއެވެ.
ފީވަކުގެ ފެނުގެ ނިޒާމް ގާއިމް ކުރުމުގެ މަޝްރޫއަކީ މިނިސްޓްރީ އޮފް ނޭޝަނަލް ޕްލޭނިން، ހައުސިން އެންޑް އިންފްރާސްޓްރަކްޗަގެ ފަރާތުން އެމްޑަބްލިއުއެސްސީއާ ހަވާލުކޮށްގެން ކުރިއަށް ގެންދާ މަޝްރޫއެކެވެ.
އެ މަޝްރޫއުގެ އަގަކީ ޖުމްލަ 49 މިލިއަން ދިވެހި ރުފިޔާ އެވެ. އެ މަޝްރޫއުގެ މުއްދަތަކީ 450 ދުވަހެވެ.
އެ މަޝްރޫއުގެ މަސައްކަތް ނިމުމުން ފީވަކުގެ ރައްޔިތުންނަށް ރައްކާތެރި ސާފު ބޯފެނުގެ ނިޒާމެއް ލިބިގެން ދާނެ ކަމަށް އެމްޑަބްލިއުއެސްސީ އިން ބުންޏެވެ.