ދެމަފިރިންގެ މައްޗަށް ބިން ރަޖިސްޓްރީ ކުރެވޭނެ އުސޫލެއްގެ މަތިން ގޯތި ދޫކުރަންޖެހޭ ކަމަށް ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ (ގަޕޯ) ވިދާޅުވެއްޖެއެވެ.
ރާއްޖޭގެ ބިމާބެހޭ ގާނޫނަށް މިއަދުގެ މަޖިލީހުގެ ޖަލްސާގައި ބަހުސްކުރައްވަމުން އަބްދުލްގަފޫރު ވިދާޅުވީ ރާއްޖޭގައި ޒަމާނުއްސުރެ ގޯތި ދޫކުރަމުން އަންނަނީ ގޯއްޗަށް ޝަރުތު ފުރިހަމަވާ ފަރާތްތަކަށް ކަމަށެވެ.
އެގޮތުން ޝަރުތުތަކުގެ ތެރޭގައި މީހަކާ އިނދެގެން ހުރުން ލާޒިމުވާކަން ފާހަގަކުރައްވައި އަބްދުލްގަފޫރު ވިދާޅުވީ، އެހެންކަމުގައިވާނަމަ އެ ބިމަކީ ކައިވެނިކޮށްގެން އުޅޭ ދެ މީހުންގެ މައްޗަށްވެސް ރަޖިސްޓްރީކުރެވޭ ބިމަކަށް ވާންޖެހޭނެ ކަމަށެވެ.
"މީހަކަށް އިނދެގެން ހުންނާތީވެ ފިރިމީހާއަށް ނުވަތަ އަނބިމީހާއަށް މިލިބޭ ގޯތި އެ ޝަރުތުގެ ތެރެއިން އަޅުގަނޑުމެން އެބަޖެހޭ އެއީ ދެފަރާތަށް ރަޖިސްޓްރީ ކުރެވޭ ގޯއްޗެއް ގޮތުގަ ހަމަޖައްސަން،" އަބްދުލްގަފޫރު ވިދާޅުވިއެވެ.
ކައިވެނިކޮށްގެން އުޅޭ ފަރާތްތައް، ދަރިން ލިބި އުމުރުން 30 އަހަރުވާ ފަހުން އަނބިމީހާ ވަރިކުރުމުން، އެ އަންހެން މީހާ ގޮސް ވަންނާނެ ގޯއްޗެއް ނެތުމަކީ ކަންބޮޑުވާންޖެހޭ ކަމެއް ކަމަށް އަބްދުލްގަފޫރު ވިދާޅުވިއެވެ.
"އެހެންކަމުން ދައުލަތުން ދޭ ބިން އެއީ އަނބިމީހާއާ ފިރިމީހާއާ ދެމީހުންގެ މައްޗަށް ރަޖިސްޓްރީކުރެވޭ ބިމެއް ގޮތުގަ އެކަށައެޅުމަކީ މުހިންމު ކަމެއް،" އަބްދުލްގަފޫރު ވިދާޅުވިއެވެ.
އަބްދުލްގަފޫރު ވިދާޅުވީ، ކުރިއަށްއޮތް ތަނުގައި ކައުންސިލްތަކުން ދައުލަތުގެ ބިން ދޫކުރާއިރު، އެ ބިން ދެފަރާތަށް ރަޖިސްޓްރީ ކުރެވޭނެ އުސޫލެއްގެ ތެރެއިން ކަންކަން ހަމަޖެހިގެންދާނެ ކަމަށް އުންމީދުކުރާ ކަަމަށެވެ.
"މީ ގާނޫނީ ގޮތުން މިހާރުވެސް ކުރެވިދާނެ ކަމެއް، އެހެންކަމުން ބިމުގެ މިލްކުވެރިކަން މުޅި އާއިލާއަށް ނިސްބަތްވާ ގޮތަށް އަނބިމީހާއަށާއި ފިރިމީހާއާ ދެމީހުންގެ މައްޗަށް ގޯއްޗެއް ރަޖިސްޓްރީކޮށްދިނުމުގެ ވިސްނުން ގެންގުޅުމަކީ މުހިންމު ކަމެއް ކަމުގައި އަޅުގަނޑު ދެކެން،" އަބްދުލްގަފޫރު ވިދާޅުވިއެވެ.
އަބްދުލްގަފޫރު އިތުރަށް ވިދާޅުވީ ބަންޑާރަ ގޯތީގެ ގޮތުގައި ނަގައި، އެތައް ދުވަހެއް ވަންދެން ބޭނުން ނުކޮށް ހުންނަ ގޯތިތަށް އަނބުރާ ކައުންސިލަށް ނެގޭނެ ގޮތް ހަދަންޖެހޭ ކަމަށެވެ. އަދި އެ ބިންތައް ބޭނުންޖެހިފައިވާ ފަރާތްތަކަށް ދޫކުރަންޖޭ ކަމަށް ވިދާޅުވިއެވެ. އަބްދުލްގަފޫރު މިހެން ވިދާޅުވިނަމަވެސް، ބައެއް ހާލަތްތަކުގައި އެގޮތަށް ގިނަ ދުވަސްތަކެއްވަންދެން ބޭނުންނުކޮށް ހުންނަ ބިންތައް މިހާރުވެސް ދައުލަތަށް ނަގައެވެ.