އޭއެފްސީ ވިމެންސް އޭޝިއަން ކަޕަށް ތައްޔާރުވަމުން އަންނަ ރާއްޖޭގެ ގައުމީ އަންހެން ޓީމުން ބ. އޭދަފުށްޓަށް ކުރި ދަތުރުގައި އެ ރަށުގެ ޓީމާ ދެކޮޅަށް ކުޅުނު އެކުވެރިކަމުގެ މެޗުން މޮޅުވެއްޖެ އެވެ.
އޭދަފުށީގެ ހިތްގައިމު ޓާފް ދަނޑުގައި އިއްޔެ ހަވީރު ކުޅުނު އެ މެޗުން ގައުމީ އަންހެން ޓީމު މޮޅުވީ 3-0 ގެ ނަތީޖާއަކުންނެވެ. މިއީ 2019 ވަނަ އަހަރު ނޭޕާލުގައި އޮތް ސައުތު އޭޝިއަން ގޭމްސްއަށް ފަހު ގައުމީ އަންހެން ޓީމުން ކުޅުނު ފުރަތަމަ މެޗެވެ. އެ ފަހަރުގެ މުބާރާތުގައި ވާދަކޮށް އަންހެން ޓީމުން ވަނީ ބްރޯންޒް މެޑަލް ހޯދައިފަ އެވެ.
ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު އިއްޔެގެ މެޗުގައި ގައުމީ ޓީމުން ޖެހި ފުރަތަމަ ދެ ލަނޑު ކާމިޔާބުކޮށްދިނީ ރާނިޔާ އިބްރާހީމެވެ. އަދި އަނެއް ލަނޑު ޖަހައިދިނީ ފާތިމަތު ތީބާއެވެ.
އަންނަ އަހަރު ބޭއްވުމަށް ހަމަޖެހިފައިވާ އޭއެފްސީ ވިމެންސް އޭޝިއަން ކަޕުގެ ކޮލިފައިންގައި ކުޅުމަށް ގައުމީ އަންހެން ޓީމުން ތައްޔާރުވަމުން އަންނަ އިރު، ޓީމަށް ބޭރު ކޯޗެއް ހޯދުމުގެ މަސައްކަތް ކުރަމުން އަންނަ ކަމަށް އެފްއޭއެމްގެ ރައީސް ބައްސާމް އަދީލް ޖަލީލް މިފަހުން ވަނީ ބުނެފަ އެވެ. އަދި އެއާ އެކު ބޭރު ގައުމެއްގައި ކޭމްޕެއް ކުރުމަށް ވެސް ނިންމާފައިވާކަމަށް ބައްސާމް ވިދާޅުވި އެވެ.
ބޭރު ކޯޗެއް ހޯދުމުގެ މަސައްކަތް ކުރިއަށްދާ އިރު މިވަގުތު އެ ޓީމާއި ހަވާލުވެގެން ހުރީ އެފްއޭއެމްގެ ޓެކްނިކަލް ޑިރެކްޓަރު އަޙްމަދު ޝަރީފް (ޑުންގާ) އެވެ.
އޭއެފްސީ ވިމެންސް އޭޝިއަން ކަޕުގެ ކޮލިފައިންގައި ކުޅެން ގައުމީ އަންހެން ޓީމުން ނިންމިއިރު، މިއީ ގައުމީ އަންހެން ޓީމުން އޭޝިއަން ކަޕް ކޮލިފައިންގައި ވާދަކުރާ ތިންވަނަ ފަހަރެވެ. 11 އަހަރަށްފަހު އޭޝިއަން ކަޕް ކޮލިފައިންގައި ވާދަކުރަން ގައުމީ ޓީމުން ނިންމިއިރު، އެންމެ ފަހުން ގައުމީ އަންހެން ޓީމުން ކޮލިފައިން ކުޅެފައިވަނީ 2010 ވަނަ އަހަރެވެ. އަދި އޭގެ ކުރިން 2006 ވަނަ އަހަރުގެ ކޮލިފައިންގައިވެސް ގައުމީ އަންހެން ޓީމު ވަނީ ވާދަކޮށްފައެވެ.