ވޮޝިންޓަން (ޖުލައި 12): އަމިއްލަ އުޅަނދެއްގައި ޖައްވާ ހިސާބަށް ދަތުރު ކުރި ފުރަތަމަ ބިލިއަނަރަކަށް ސަރ ރިޗަޑް ބްރޭންސަން ވެއްޖެ އެވެ.
ޖައްވަށް ފަތުރުވެރިން ގެންދިޔުމުގެ ވިޔަފާރި ފެށުމަށް މަސައްކަތް ކުރާ ބްރޭންސަންގެ ވާޖިން ގެލެކްޓިކް ކުންފުނީގެ ސްޕޭން ޕްލޭން އިއްޔެ އުދުއްސާލީ، އޭނާ އާއި އިތުރު ފަސް މީހަކާ އެއްކޮށެވެ. އޭގެ ތެރޭގައި ދެ ޕައިލެޓުންނާއި ވާޖިންގެ ޗީފް އެސްޓްރޮނޯޓް އިންސްޓްރަކްޓަރާއި އޮޕަރޭޝަންސް އިންޖިނިއަރާއި ރިސާޗް އޮޕަރޭޝަންސްގެ ނައިބު ރައީސް ހިމެނެ އެވެ.
ވީއެސްއެސް ޔުނިޓީ ނަމަކަށް ކިޔާ އެ ސްޕޭސްފްލައިޓްގެ ދަތުރު ފެށީ އެމެރިކާގެ ނިއު މެކްސިކޯގައި އޮންނަ، ޖައްވީ އުޅަނދުތައް ލޯންޗު ކުރަން ބޭނުން ކުރާ މަރުކަޒަކުންނެވެ. އެ އުޅަނދު ފުރަތަމަ އުދުއްސާލީ ވީއެމްސް އީވް ކިޔާ އެހެން ބޯޓެއްގެ އެހީގަ އެވެ. އަދި ވީއެސްއެސް ޔުނިޓީގެ ރޮކެޓް އިންޖީން ޖައްސާ، އަޑަށް ވުރެ ބާރު ސްޕީޑުގައި އުދުއްސާލީ 8.5 މޭލު (13 ކިލޯމީޓަރު) މައްޗަށް ދެވުމުންނެވެ.
އެއަށް ފަހު ދުނިޔޭގެ ބިމަށް ވުރެ 53.5 މޭލު (86 ކިލޯމީޓަރު) އުހަށް ދަތުރު ކުރެވުމުން އިންޖީން ނިއްވާލިީ އެވެ. އަދި ބްރޭންސަން ހިމެނޭ ގޮތަށް ޔުނިޓީގައި ތިބި މީހުންނަށް ހަތަރު ވަރަކަށް މިނިޓު ވަންދެން ބޯޓު ތެރޭގައި ޒީރޯ ގްރެވިޓީ ތަޖުރިބާ ކުރެވި، 'ފްލޯޓް' ކުރެވުނެވެ. އަދި ޖައްވުން ދުނިޔެ ބަލާލުމުގެ ފުރުސަތު ލިބުނެވެ. އެއަށް ފަހު ދަތުރު ފެށިތާ އެއް ގަޑި އިރާއި ކުޑަ ވަގުތުކޮޅެއްވީ ފަހުން ޔުނިޓީ ސްޕޭސްފްލައިޓް އަލުން ވަނީ ބިމުގައި ޖައްސާފަ އެވެ.
ބްރޭންސަން ވަނީ އެ ދަތުރަކީ އޭނާ ކުޑައިރުން ފެށިގެން ދެކެމުން އައި ހުވަފެނެއް ހަގީގަތަކަށް ވުން ކަމަށް ބުނެފަ އެވެ. އަދި މިއީ އާ ޖައްވީ ދުވަސްވަރެއްގެ ފެށުން ކަމަށް ބުނެފަ އެވެ.
"ކުޑައިރުން ފެށިގެން ދެކެމުން އައި ހުވަފެނެއް މިއީ. ނަމަވެސް ޖައްވުން ދުނިޔެ ފެންނަ ވަގުތުކޮޅަށް ތައްޔާރުވުމަކީ އެއްގޮތަކަށްވެސް ވާނެ ކަމެއް ނޫން،" ބްރޭންސަން ބުންޏެވެ.
ވާޖިން ގެލެކްޓިކް މެދުވެރިކޮށް ފަތުރުވެރިންގެ ގޮތުގައި ޖައްވަށް ދާން މިހާތަނަށް 600 މީހަކު ޝައުގުވެރިކަން ފާޅުކޮށްފައިވާ ކަމަށް އެ ކުންފުނިން ބުންޏެވެ. އޭގެއިން ކޮންމެ ދަތުރަކަށް 250،000 ޑޮލަރު އަރާނެ އެވެ. އަދި އެ ހިދުމަތް ފަށަން ރާވާފައި ވަނީ އަންނަ އަހަރެވެ.
ބްރޭންސަންގެ އިތުރުން ބިލިއަނަރުން ޖެފް ބޭޒޯސް އާއި އީލަން މަސްކްވެސް ދަނީ ޖައްވީ ފަތުރުވެރިކަމާ ގުޅުން ހުރި މަޝްރޫއުތައް ކުރިއަށްގެންދަމުންނެވެ. އަދި އަންނަ ހަފްތާގެ އަންގާރައިގައި ބޭޒޯސްގެ ކުންފުނީގެ ރޮކެޓެއްގައި އޭނާ ޖައްވަށް ދަތުރެއް ކުރާނެ އެވެ.