ދަނގެތީ ދާއިރާގެ މެންބަރު އަދި ކުރީގެ ޑިފެންސް މިނިސްޓަރު ކާނަލް ރިޓަޔާޑް މުހައްމަދު ނާޒިމް އިސްވެ ހުންނަވައި ޕާޓީއެއް އުފައްދަވަނީ ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވެގެން ކަމަށް ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވެއްޖެއެވެ.
ޖުމްހޫރީ ޕާޓީގެ މެންބަރު، ކާނަލް ނާޒިމް އިސްވެ ހުންނަވައި ސިޔާސީ ޕާޓީއެއް އުފައްދަވަން އުޅުއްވާ އިރު، އެ ޕާޓީއާ ގުޅުމަށް ތިމަރަފުށީ ދާއިރާގެ މެމްބަރު އަބްދުﷲ ރިޔާޒުވެސް ވަނީ ރޭ ޖޭޕީއިން ވަކިވެ ވަޑައިގެންފައެވެ.
"ޗެނަލް 13" ގެ ޕްރޮގުރާމެއްގައި ވާހަކަ ދައްކަވަމުން ޝިޔާމް ވިދާޅުވީ ރައީސް ސޯލިހު ދެވަނަ ދައުރަކަށް ކުރިމަތިލުމުގެ ވިސްނުންފުޅު ހުރި ނަމަވެސް އެމްޑީޕީގެ ތެރެއިން އެ ފުރުސަތު ލިބޭނެ ކަމުގެ ޔަގީންކަން ރައީސް ސޯލިހަށް ނެތް ކަމަށެވެ.
ޝިޔާމް އިޝާރާތް ކުރެއްވީ އެމްޑީޕީގެ ރައީސް މުހައްމަދު ނަޝީދު އެމްޑީޕީގެ ޓިކެޓުގައި 2023 ވަނަ އަހަރުގެ ރިޔާސީ އިންތިހާބަށް ވާދަކުރައްވާނެކަން އިއުލާނުކުރެއްވި ކުރެއްވުމަށެވެ.
"މިއަދު އަނެއްކާވެސް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ދެވަނަ ދައުރަކަށް ކުރިމަތިލުމުގެ ވިސްނުންފުޅު އޮތީތީވެ، އަނެއްކާ ދެވަނަ ދައުރަކަށް ކުރިމަތިލައްވާ އިރު އެމަނިކުފާނުގެ އަމިއްލަ ޕާޓީގަ ހުރި މައްސަލަތަކެއް ހުރީތީވެ، ރައީސުލްޖުމްހޫރިއްޔާ އަށް ޔަގީން ނުވަނީ އެމްޑީޕީގެ ޓިކެޓު ތިމަންނައަށް ލިބިދާނެ ކަމުގެ ޔަގީންކަން ނެތީމާ ކާނަލް ނާޒިމް ލައްވާ މިހާރު ޕާޓީއެއް އެ ހަދުއްވަނީ," ޝިޔާމް ވިދާޅުވިއެވެ.
ސަރުކާރަށް ދެ އަހަރު ވީ އިރު ކާނަލް ނާޒިމް މެން މީހުން ކޮބައިތޯ ސުވާލު އުފައްދަވައި ޝިޔާމް ވިދާޅުވީ އަނެއްކާވެސް ރައްޔިތުންގެ ކައިރިއަށް ޕާޓީއެއް އުފައްދައިގެން ދާން އުޅެނީ ރިޔާސީ އިންތިހާބާ ދިމާކޮށް ކަމަށެވެ. އަދި އެ ޕާޓީއަކީ ރައީސް ސޯލިހުގެ އެދުމަށް ހަދާ ޕާޓީއެއްގެ ގޮތުގައި ޝިޔާމް ވަނީ ސިފަކުރައްވާފައެވެ.
އެހެންކަމުން އަލަށް ހަދާ ޕާޓީއަކީ ރައީސް ސޯލިހުގެ އެދުމަށް ހަދާ ޕާޓީއެއްތޯ "ސަން" އިން ސުވާލު ކުރުމުން ކާނަލް ނާޒިމް ވިދާޅުވީ ޕާޓީއާ ބެހޭ މައުލޫމާތު ދިނުމަށް ވަރަށް އަވަހަށް ޕަރެސް އެއް ބާއްވާނެ ކަމަށާއި މިވަގުތު އެކަމާ ގުޅޭގޮތުން އެއްވެސް އެއްޗެއް ވިދާޅުވެވެން ނެތް ކަމަށެވެ.