މުލީއާގެ ކައިރީ ބޮމެއް ގޮއްވާލާނެ ކަމަށް ބުނެ އިންޒާރު ދީގެން މިއަދު މެންދުރު ހައްޔަރުކުރި ދެ މީހުންގެ ތެރެއިން އެކަކު ދޫކޮށްލައިފިއެވެ.
ރައީސުލްޖުމްހޫރިއްޔާގެ ރަސްމީ ގެކޮޅު މުލީއާގެ ކައިރިން މިއަދު ދެ މީހަކު ހައްޔަރުކުރީ އެމީހުންގެ އަތުގައި ބޮމެއް އޮތް ކަމަށް ބުނެގެންނެވެ. އެމީހުންގެ އަތުގައި އޭރު ހުރީ ދަބަހަކާއި ރަތް ކޮތަޅެއްގެ އިތުރުން ކަރުދާސް ފޮއްޓެކެވެ.
ފުލުހުންގެ މީޑިއާ އޮފިޝަލް "ސަން" އަށް ވިދާޅުވީ މައްސަލައިގައި ހައްޔަރުކުރި ދެ މީހުންގެ ތެރެއިން މިހާރު ބަންދުގައި ހުރީ ބޮމެއް އޮތްކަމަށް ބުނި މީހާއެވެ.
އަދި ދޫކޮށްލީ އޭނާއާއެކު ހުރި ދެވަނަ މީހާއެވެ. ދެވަނަ އަށް ހުރި މީހާ ދޫކޮށްލީ މިވަގުތު ބަންދުގައި ބަހައްޓަން ނުފެންނާތީކަމަށް ފުލުހުން ބުންޏެވެ.
"މިހާރު ބަންދުގަ ހުރި މީހާ އެއީ ބޮމެއް ކަމަށް ބުނި މީހާ. އަނެއް މީހާ އެހެން ބުނެފައެއް ނުވޭ،" ފުލުހުން ބުންޏެވެ.
މި މައްސަލައިގެ ތަހުގީގު މިހާރު ދަނީ ކުރިއަށެވެ.
ބޮމެއް ގޮއްވާލާނެކަމުގެ އިންޒާރު ދިނުމާ ގުޅިގެން މުލީއާގެ ސަރަހައްދުގައި ފުލުހުންނާއި ސިފައިންގެ ޓީމުތައް ހަރަކާތްތެރިވިއެވެ.
މުލީއާގެ ކައިރީގައި އެފަދަ އިންޒާރެއް ބަޔަކު ދިން އިރު, މި ފަހުން ރައްޔިތުންގެ މަޖިލީހުގެ އިތުރުން ރާއްޖޭގައި ހުންނަ އިންޑިއާ ހައިކޮމިޝަން ގޮއްވާލާނެކަމަށްވެސް ބުނެގެން ދެ މީހަކު ހައްޔަރުކުރިއެވެ.