ރާއްޖޭގެ ދަރަނި މިހާރު އިތުރުވެފައިވާ މިންވަރަށް ބަލާއިރު، ކުރިއަށް އޮތްތަނުގައި އިތުރު ލޯނު ހޯދަން އުނދަގޫވާނެ ކަމަށް ކްރެޑިޓް ރޭޓިން އެޖެންސީ މޫޑީސް އިން ބުނެފި އެވެ.
މޫޑީސް އިން އެންމެ ފަހުން ރާއްޖެ އަށް ދީފައިވަނީ ބީ3 ރޭޓިން އެކެވެ. އެއީ ކްރެޑިޓް ރިސްކް ހައި، ނުވަތަ ފައިނޭންޝަލް ސްޓޭބިލިޓީ ދަށް ކަމުން ދޭ ރޭޓިން އެކެވެ.
މޫޑީސް އިން ރާއްޖޭގެ އިކޮނޮމިކް ސްޓްރެންތު ނުވަތަ އިގްތިސޯދީ ހަލަތަށް ދީފައިވަނީ ބީއޭ3 ރޭޓިން އެވެ. މިއީ އިންވެސްޓަރުންގެ އިންވެސްޓުމެންޓުގެ ފައިދާ ލިބުން ލަސްވާނެކަމުގެ އިޝާރާތެކެވެ. މޫޑީސް އިން ބުނެފައި ވަނީ ދުނިޔޭގެ ނިސްބަތުން ރާއްޖޭގެ އިގްތިސޯދަކީ ވާދަވެރިކަން ކުޑަ އިގްތިސޯދެެއް ކަމަށާއި، ރާއްޖޭގެ އިގްތިސޯދުގެ ބޮޑު ބަޔެއް ޓޫރިޒަމަށް ބަރޯސާވާއިރު މޫސުމަށް އަންނަ ބަދަލާއި ގުދުރަތީ ކާރިސާތަކުގެ ސަބަބުން އެ ސިނާއަތަށް ވެސް ގެއްލުން ލިބޭ ކަމަށެވެ.
މީގެ އިތުުރުން ރާއްޖޭގެ ފިސްކަލް ސްޓްރެންތަށް މޫޑީސް އިން ދީފައިވަނީ ބީ1 ރޭޓިން އެކެވެ. މި ރޭޓިން ދީފައި ވަނީ ރާއްޖޭގެ ދަރަނި އިތުރުވެ، އިތުރު ދަރަނި ހޯދަން ދަތިވާނެ ކަމަށް ލަފާކޮށްފަ އެވެ. ދައުލަތުގެ ބެލެންސްޝީޓުން ވެސް ދަރަނި އިތުރުވާތަން ފެންނަ ކަމަށާއި ދައުލަތުން ގެރެންޓީދީފައިވާ ދަރަނީގެ ނިސްބަތް ވެސް އިތުރުކަން ފާހަގަ ކޮށްފައިވެ އެވެ.
މިއާއެކު މޫޑީސް އިން ބުނެފައި ވަނީ އިތުރަށް ބޭރުން ފައިނޭންސް ހޯދައި، ފައިނޭންޝަލް އިންސްޓިޓިއުޝަންތަކުން މާލީ އެހީގެ ގޮތުގައި ލޯނު ހޯދަން ރާއްޖެ އަށް ދަތިވާނެ ކަމަށެވެ.
ކޮވިޑް19ގެ ހާލަތާ ގުޅިގެން ސަރުކާރުން ވަނީ އެކި އިދާރާތަކުން ލޯނު ނަގައިފަ އެވެ. ފިނޭންސް މިނިސްޓްރީގެ ހިސާބުތައް ދައްކާގޮތުން މިދިޔަ 2020 އަހަރު ސަރުކާރުން ވަނީ 18 ލޯނެއް ނަގައިފަ އެވެ.
އަހަރު ނިމުނު އިރު ރާއްޖޭގެ ޖުމްލަ ދަރަނި 86.5 ބިލިއަން ރުފިޔާގައެވެ.