މޯލްޑިވްސް ހަލާލު ޓްރެވަލްގެ ނަމުގައި ޕްލެޓް ފޯމެއް ތައާރަފުކޮށްފި އެވެ.
މިހާރު ދުބާއީގައި ކުރިއަށްދާ އަރަބިއަން ޓްރެވަލް މާކެޓުގެ ތެރެއިން އެ ޕްލެޓްފޯމު އިފްތިތާހުކޮށްދެއްވީ އެމްއެމްޕީއާރުސީގެ މެނޭޖިން ޑިރެކްޓަރު ތޮއްޔިބު މުހައްމަދެވެ.
މޯލްޑިވްސް ހަލާލް ޓްރެވަލްގެ ނަމުގައި އިފްތިތާހުކުރި ޕްލެޓްފޯމާ އެކު މެގަޒިން އެއްވެސް ތައާރަފުކޮށްފައިވާ އިރު މިއީ މުސްލިމު ފަތުރުވެރިންނަށް، ހާއްސަކޮށް ޖީސީސީގެ ގައުމުތަކުގެ ފަތުރުވެރިންނަށް ރާއްޖެ އިޝްތިހާރުކޮށް އެ މާކެޓުން ފަތުރުވެރިން އިތުރު ކުރުމަށް ތައާރަފު ކުރި ޕްލެޓްފޯމެކެވެ.
މި ޕްލެޓްފޯމުގެ މެނޭޖިން ޑިރެކްޓަރު ޑރ. ހުސައިން ސަނީ އުމަރަކީ އެ ދާއިރާ އިން ރިސާޗު ހައްދަވާފައިވާ ބޭފުޅެކެވެ. ޑރ. ސަނީގެ ތީސީސް ހާއްސަ ކުރައްވާފައި ވަނީވެސް ރާއްޖޭގައި ހަލާލް ޓޫރިޒަމް ކުރިއެރުވުމުގެ މައްޗަށެވެ. ޑރ. ސަނީ ވިދާޅުވީ ރާއްޖޭގެ ފަތުރުވެރިކަން ބޮޑަށް ބަރޯސާވެފައި އޮތީ ވަކި މާކެޓުތަކަކަށް ކަމަށާއި ކޮވިޑު ބަލިމަޑުކަމާ އެކު އެ ކަމުގެ އަސަރު ފަތުރުވެރިކަމަށް ކުރި ކަމަށެވެ. އަދި އިތުރު ސެގްމެންޓުތަކަށް ފޯކަސްކޮށްގެން ފަތުރުވެރިން ގެންނަން މަސައްކަތް ކުރަން ޖެހޭކަން މި ހާލަތުގައި އެނގުނު ކަމަށައި ރާއްޖެ އަކީ 100 ޕަސެންޓު މުސްލިމު ގައުމަކަށް ވާއިރު މުސްލިމު ޓޫރިސްޓުންނަށް ހާއްސަކޮށްގެން މާކެޓު ކުރުމަކީ އެ މާކެޓުން އިތުރަށް ފަތުރުވެރިން ރާއްޖެ ޒިޔާރަތް ކުރާނެ ކަމެއް ކަމަށެވެ.
މޯލްޑިވްސް ހަލާލު ޓްރެވަލް ޕޯޓްފޯލިއޯގެ ދަށުން މެގަޒިން އަކާއި މުސްލިމް ފްރެންޑްލީ ޓްރެވަލް ރޭޓިން، ކޮންފަރެންސްތައް، ޕީއާރު އަދި މާކެޓިން ހަރަކާތްތައް ވެސް ކުރިއަށް ގެންދާނެ އެވެ.
އެ ޕްލެޓްފޯމުގެ ދަށުން މާކެޓިން ހަރަކާތްތަކާއި ހަބަރުތައް އަރަބި ބަހުން ގެންނައިރު މެލޭޝިއާ، އިންޑޮނޭޝިއާ ފަދަ ހަލާލް ޓޫރިޒަމް ޕްރޮމޯޓު ކުރާ މާކެޓުތަކާ ވާދަ ކުރުމަކީ އަމާޒު ކަމަށް ބުންޏެވެ.
މި ޕްލެޓްފޯމުގެ ދަށުން ހެރިޓެންސް އާރަށް އަދި އަދާރަން ރިސޯޓްސް މިހާރު ހަލާލް ޓްރެޗަލް ޕްލެޓްފޯމާ ވަނީ ގުޅިފަ އެވެ.