ނިޝަން އިއްޒުއްދީނުގެ އިއްޒަތުގެ ވެރިޔާ އަލްއަމީރު މުހައްމަދު ނޫރައްދީނުގެ އަނބިކަނބަލުން މ. ތާނގީދޮށުގޭ ފާތިމަތު ނާސިރާ (ކޮލިގޭ ނާސިރާ) އަވަހާރަވެއްޖެއެވެ.
ކޮލިގޭ ނާސިރާ އަވަހާރަވީ ގިނަ ދުވަސްތަކެއް ވަންދެން އާލާސްކަންފުޅާ އުޅުއްވުމަށްފަހު ރޭގެ ވަގުތެއްގައެވެ. އުމުރުފުޅުން 87 އަހަރުގައި އަވަހާރަވީ ނާސިރާގެ ކަށުނަމާދު އޮންނާނީ މިރޭގެ ފަތިސް ނަމާދަށްފަހުއެވެ.
ނާސިރާއަކީ ޔުނިވާސަލް އެންޓަޕްރައިޒެސްގެ ވެރިޔާ މ. ރުއްކަރަ މުހައްމަދު އުމަރު މަނިކު (އެމްޔޫ މަނިކު)ގެ އެއްބަފާ ދައްތައެވެ.
އަލްއަމީރު މުހައްމަދު ނޫރައްދީން އަދި ފާތިމަތު ނާސިރާ
ނާސިރާގެ ފިރިކަލުން އަލްއަމީރު މުހައްމަދު ނޫރައްދީނަކީ އައްސުލްތާން ހަސަން ނޫރައްދީނުގެ ބޭފުޅެކެވެ. އަލްއަމީރު މުހައްމަދު ނޫރައްދީނަކީ ދައުލަތަށް ގިނަ ދުވަސްތަކެއް ވަންދެން ހިދުމަތްކުރެއްވި ބޭފުޅެކެވެ. މިހާރު އުމުރުފުޅުން 89 އަހަރު ފުރިފައިވާ އަލްއަމީރު މުހައްމަދު ނޫރައްދީންވެސް ގެންވަދަނީ ގިނަ ދުވަސްތަކެއް ވަންދެން ދަރުމަވަންތަ ހޮސްޕިޓަލުގައި އާލާސްކަންފުޅާށް ފަރުވާ ހޯއްދަވަމުންނެވެ.
ނާސިރާ އެންމެ ފުރަތަމަ ކައިވެނި ބައްލަވައިގަތީ އަބްދުލްމަޖީދު މާހިރުއާއެވެ. އެ ކައިވެނިން ލިބިވަޑައިގެންނެވި ބޭފުޅުންގެ ތެރޭގައި ދިވެހި ދައުލަތުގެ އެމްބެސެޑަރ އެޓް ލާޖްގެ މަގާމުގައި ހުންނެވި އަހްމަދު މާހިރު ދީދީ ހިމެނެއެވެ.
އެއަށްފަހު ނާސިރާ އަލްއަމީރު މުހައްމަދު ނޫރައްދީނާ ކައިވެނި ބައްލަވައިގެން އެ ދެމަފިރިކަނބަލުންނަށް ލިބިވަޑައިގެންނެވި ބޭފުޅުންގެ ތެރޭގައި ވިޔަފާރިވެރިޔާ އިސްމާއިލް ނޫރައްދީން، ބޭންކް އޮފް މޯލްޑިވްސްގެ ޑެޕިއުޓީ ސީއީއޯ އާއިޝަތު ނޫރައްދީން، އަދި ޝެފް ގިލްޑް އޮފް މޯލްޑިވްސްގެ ރައީސާ މަރިޔަމް ނޫރައްދީން ހިމެނެއެވެ.