ކުރިއަށް އޮތް ލޯކަލް ކައުންސިލްތަކުގެ އިންތިހާބުގެ ކެމްޕެއިން ނިންމުމަށް ބާއްވާ ޖަލްސާގައި ބައިވެރިވާން، އެމްޑީޕީގެ ބޮޑު ޓީމެއް އއ. ރަސްދޫއަށް ފުރައިފި އެވެ.
އެމްޑީޕީގެ 'ރަށްވެހިފަތިސް އަލިވިލުން' ޖަލްސާ އޮންނާނީ މިރޭ، ރަސްދޫ ފަޅު ތެރޭގަ އެވެ.
މިއަދު ހުޅުމާލެ ޖެޓީ އިން ފުރި ހަތަރު ސަފާރީގައި، އެމްޑީޕީގެ ލީޑަޝިޕާއި، ވަޒީރުންގެ އިތުރުން، އެ ޕާޓީގެ 120 މެމްބަރުން ބައިވެރިވާ ކަމަށް އެ ޕާޓީ އިން ބުންޏެވެ.
އެމްޑީޕީން ބުނީ މިރޭގެ ޖަލްސާގައި، ރައީސް އިބްރާހިމް މުހައްމަދު ސޯލިހާއި، އެ ޕާޓީގެ ރައީސް، ރައީސް މުހައްމަދު ނަޝީދު ވެސް ބައިވެރިވާނެ ކަމަށެވެ. މިއަދު ފުރި ޓީމާއެކު ރައީސް ނަޝީދު ވަނީ ވަޑައިގެންފަ އެވެ.
ފުރާވަޑައިގަތުމުގެ ކުރިން، ރައީސް ނަޝީދު ވަނީ ހުރިހާ ރައްޔިތުން ވެސް "ތިލަފަތަށް" ވޯޓުދެއްވުމަށް ގޮވާލައްވައިފަ އެވެ. އަދި ހަތަރު ސިޓީގެ މޭޔަރުކަމާއެކު، ކުރިއަށް އޮތް ލޯކަލް ކައުންސިލްތަކުގެ އިންތިހާބުގައި އެމްޑީޕީން 1،000 ގޮނޑި ކާމިޔާބުކުރާނެ ކަމަށް ވިދާޅުވި އެވެ.
ރައީސް ނަޝީދު ވިދާޅުވީ އެމްޑީޕީއަކީ އަބަދުވެސް ޖެހިލުމެއް ނެތި، ކޮންމެ އިންތިހާބަކާވެސް ކުރިމަތިލާ ޕާޓީއެއް ކަމަށާއި އެއްވެސް އިންތިހާބެއް އުނދަގޫވާނެ ކަމުގެ ވިސްނުން އެމްޑީޕީން ނުގެންގުޅޭ ކަމަށެވެ.