މަސް ފެކްޓަރީ ހިންގާ ޅ. ފެލިވަރުގައި މަސައްކަތް ކުރާ މުވައްޒަފަކު ކޮވިޑް-19އަށް ޕޮޒިޓިވްވެ އެ ރަށް މޮނިޓަރިންގެ ހާލަތަށް ގެނެސްފި އެވެ.
ހެލްތު އިމަޖެންސީ އޮޕަރޭޝަން ސެންޓަރުން މިރޭ ވަނީ ފެލިވަރު މޮނިޓަރިންގެ ހާލަތަށް ގެނެސްފައިވާކަން ކަށަވަރުކޮށްދީފަ އެވެ.
ފެލިވަރުގެ ރީޖަނަލް މެނޭޖަރު މުހައްމަދު އިބްރާހިމް "ސަން"އަށް ވިދާޅުވީ، މިއަދު ޕޮޒިޓިވްވީ ނައިފަރަށް ނިސްބަތްވާ މުވައްޒަފެއް ކަމަށެވެ.
އޭނާ ޕޮޒިޓިވްވީ ނައިފަރުގައި ހުއްޓާ ކަމަށާއި އޭނާ އެންމެ ފަހުން ފެލިވަރަށް ދިޔައީ ޕޮޒިޓިވްވިތާ ހަތަރު ދުވަސް ކުރިން ކަމަށް ވިދާޅުވި އެވެ.
ފެލިވަރު މޮނިޓަރިންގެ ހާލަތަށް ގެނެސްފައިވާއިރު، މިހާރު އެ ރަށުގައި ކޮންޓެކްޓް ޓްރޭސިންގެ މަސައްކަތް ކުރަމުންދާ ކަމަށް އޭނާ ވިދާޅުވި އެވެ.