ކޫއްޑުއާއި އައްޑޫ ފިޝަރީސް ކޮމްޕްލެސްކްއަށް ސަރުކާރުގެ މަސްކުންފުނި، މިފްކޯއިން މިއަދު 22 މިލިއަން ރުފިޔާ ދޫކޮށްފިއެވެ.
މިފްކޯއިން އެންމެ ފަހުން މަސްވެރިންނަށް ފައިސާ ދެއްކީ މިދިޔަ އޮކްޓޫބަރު 31ގައެވެ. އޭރު ދީފައި ވަނީ 27 ސެޕްޓެންބަރުން 27 އޮކްޓޫބަރުގެ ނިޔަލަށް މަސްވެރިން މިފްކޯއަށް ކިރާފައި ހުރި މަހަށްވާ 15 މިލިއަން ރުފިޔާއެވެ.
މިއަދު އެ ކުންފުނިން އައްޑުއާއި ކޫއްޑޫ ފިޝަރީސް ކޮމްޕްލެކްސްއަށް ދޫކޮށްފައި ވަނީ މިދިޔަ މަހުގެ 28 ވަނަ ދުވަހުން މި މަހުގެ 15 ވަނަ ދުވަހުގެ ނިޔަލަށް ކިރާފައިވާ މަހަށްވާ ފައިސާއެވެ. އެއީ ޖުމްލަ 22،922،141 ރުފިޔާއެވެ.
މަސް މާރުކޭޓު ސަރަހައްދު: ކޫއްޑޫއާއި އައްޑޫ ފިޝަރީސް ކޮމްޕްލެކްސްއަށް މިއަދު 22 މިލިއަން ރުފިޔާ ދޫކޮށްފި -- ސަން ފޮޓޯ/ ފަޔާޒު މޫސާ
މިގޮތުން، މަސްވެރިންނަށް މިއަދު ފައިސާ ދޫކުރި އަދަދަކީ 28 މިލިއަން ރުފިޔާއިން 5،786،266 ޑީސަލަށް ކަނޑާފައިވާ މިންވަރުކަމަށް މިފްކޯއިން ވަނީ ބުނެފައެވެ.
މިފަހަރު ފައިސާ ދޫކުރިއިރު މިދިޔަ މަހުގެ 28 ވަނަ ދުވަހުން މި މަހުގެ 15 ވަނަ ދުވަހުގެ ނިޔަލަށް ފެލިވަރު ފިޝަރީސް ކޮމްޕްލެސްއަށް ކިރާފައިވާ މަހަށް ފައިސާ ނުދެވޭ ކަމަށާއި ދެން އެންމެ އަވަހަށް ދޫކުރާނީ އެ ފައިސާ ކަމަށް އެ ކުންފުނިން ވަނީ ބުނެފައެވެ.
މިހާތަނަށް މިފްކޯއިން 918 މިލިއަނަށް ވުރެ ގިނަ ރުފިޔާ މަސްވެރިންނަށް ދީފައިވާއިރު، މިހާރު މަސްވެރިންނަށް ނުދައްކާ ހުރީ 30،482،931 ރުފިޔާ ކަމަށް މިފްކޯގެ ހިސާބުތަކުން ދައްކައެވެ.
ފާހަގަކޮށްލެވޭ ގޮތުގައި، މަސްވެރިންނަށް ދޭންޖެހޭ ފައިސާ ދިނުން ލަސްވެގެން، މަސްވެރިން އެތައް ފަހަރަކު އެ ކަމުގެ ކަންބޮޑުވުން ފާޅުކޮށް ސުލްހަވެރި އެއްވުންތައް ބާއްވައި މުޒާހަރާ ވެސް ކުރިއެވެ.