އަލްޖިއާޒް (ޖެނުއަރީ 11): އަލްޖީރިއާގެ ކުރީގެ ބޮޑުވަޒީރު އަހުމަދު އުޔާހިޔާ ކަޅު ބާޒާރުގައި ގަނޑު ރަން ވިއްކި ކަމަށް އިއުތިރާފުވެވަޑައިގެންފައިވާ ކަމަށް އެގައުމުގެ ރަސްމީ ނޫސް އޭޖެންސީން ރިޕޯޓުކޮށްފި އެވެ.
އުޔާހިޔާ އާއި އަލްޖީރިއާގެ ކުރީގެ އެހެން ބޮޑުވަޒީރެއް ކަމަށްވާ އަބްދުލްމާލިކް ސިލާލްގެ މައްޗަށް ވަނީ 2019 ވަނަ އަހަރު، އޭރުގެ ރައީސް އަބްދުލްއަޒީޒު ބޫތަފްލީގާ އިތުރު ދައުރަކަށް އިންތިހާބުވާން ކުރެއްވި މަސައްކަތަށް ސިއްރިއްޔާތުގައި ހަރަދު ކުރުމުގެ ތުހުމަތުކޮށްފަ އެވެ. އެ ދެ ބޭފުޅުން ވަނީ ބޫތަފްލީގާގެ 20 އަހަރުވީ ވެރިކަމުގައި އެ ސަރުކާރުގެ އެކި މަގާމުތައް އަދާ ކުރައްވާފަ އެވެ.
އެ މައްސަލައިގެ ތަހުގީގުގައި އުޔާހިޔާގެ ބޭންކް އެކައުންޓުތަކުގައި ހުރި ފަސް މިލިއަން ޑޮލަރުގެ އަގުހުރި މުދަލާއި ފައިސާއާ ބެހޭ ގޮތުން ސުވާލު ކުރި އެވެ. އަދި އޭނާ ވަނީ އެއީ "ބޮޑުވަޒީރުގެ ގޮތުގައި ހުންނެވި އިރު ގަލްފު ގައުމުތަކުގެ ލީޑަރުންގެ ފަރާތުން ލިބުނު ގަނޑު ރަން، ކަޅު ބާޒާރުގައި ވިއްކައިގެން ލިބުނު ފައިސާ" ކަމަށް ވިދާޅުވެފައި ކަމަށް އޭޕީއެސް ނޫހުގައިވެ އެވެ.
މީގެ އިތުރުން އުޔާހިޔާ ވިދާޅުވި ގޮތުގައި އޭނާ މީގެ ކުރިން އެ ރަނާ ބެހޭ ގޮތުން ވާހަކަ ނުދެއްކެވީ އޭގެ ސަބަބުން އަލްޖީރިއާ އާއި އެހެން އެކުވެރި ގައުމުތަކާ ދެމެދު އޮތް ގުޅުމަށް ބުރޫ އަރާފާނެތީ އެވެ. އަދި އޭނާ ވަނީ އެ ފައިސާ ޓެކްސް އޮފިޝަލުންނަށް ޑިކްލެޔާ ކޮށްފައި ނުވާ ކަމަށްވެސް އެއްބަސްވެވަޑައިގެންފަ އެވެ.
އަލްޖީރިއާގައި 1999 ވަނަ އަހަރުން ފެށިގެން ވެރިކަން ކުރެއްވި ބޫތަފްލީގާގެ ސަރުކާރާ ދެކޮޅަށް ފެބްރުއަރީ 2019އިގައި ފެށި ސިލްސިލާ މުޒާހަރާތަކާ ގުޅިގެން އޭނާ ވަނީ އެ އަހަރުގެ އޭޕްރިލް މަހު އިސްތިއުފާ ދެއްވާފަ އެވެ. އެ މުޒާހަރާތައް ފެށީ އޭނާ ވެރިކަމުގެ ފަސް ވަނަ ދައުރަކަށް ކުރިމަތިލައްވާނެކަން އިއުލާން ކުރެއްވުމުންނެވެ. އަދި އޭގެ ފަހުން އެ ސަރުކާރުގެ ގިނަ އަދަދެއްގެ އިސް އޮފިޝަލުންގެ ކޮރަޕްޝަނުގެ މައްސަލަތަކެއް ވަނީ ތަހުގީގު ކުރަން ފަށާފަ އެވެ.
އެގޮތުން ޖޫން 2019އިގައި ކޮރަޕްޝަނުގެ ތަހުގީގަކަށް އުޔާހިޔާ އާއި ސިލާލް ވެސް ހައްޔަރު ކުރި އެވެ. އަދި ދެ ބޭފުޅުންގެ މައްޗަށް ކޮރަޕްޝަނުގެ ދައުވާތައް ސާބިތުވެ، ދެ ބޭފުޅުންވެސް 15 އަހަރަށް ޖަލަށް ލާން ޑިސެމްބަރު 2019އިގައި ހުކުމް ކުރި އެވެ. އޭގެ ފަހުން މި މަހުގެ ހަތަރެއްގައި އިތުރު ކޮރަޕްޝަނުގެ މައްސަލައެއްގައި އުޔާހިޔާ ހަތް އަހަރަށް ޖަލަށް ލާންވެސް ކޯޓުން ވަނީ ހުކުމްކޮށްފަ އެވެ.
އުޔާހިޔާ ވަނީ 1995 އާއި 2019އިގެ މާޗް މަހާ ދޭތެރޭ ހަތަރު ފަހަރަކު އަލްޖީރިއާގެ ބޮޑުވަޒީރުކަން ކުރައްވާފަ އެވެ. އަދި ސިލާލް ބޮޑުވަޒީރުކަން ކުރެއްވީ 2012އިން 2017އަށެވެ.