މިހާރު ކުރިއަށްދާ ފީފާ ވޯލްޑް ކަޕްގެ ގްރޫޕް ސްޓޭޖުގައި ފަހަތުން އަރައި 2-1 އިން ޖޯޑަން ބަލިކޮށް، އަލްޖީރިއާއިން މުބާރާތުގެ ދެވަނަ ބުރަށް ދިއުމުގެ އުންމީދު އާކޮށްފިއެވެ.
އެމެރިކާގެ ސެން ފްރެންސިސްކޯ ބޭ އޭރިއާ ސްޓޭޑިއަމްގައި މިއަދު ހެނދުނު ކުޅުނު މި މެޗުން ބަލިވުމާއެކު، އަލަށް ވޯލްޑް ކަޕްގައި ވާދަކުރި ޖޯޑަން ވަނީ މުބާރާތުން ކަޓާފައެވެ. އެޓީމަށް މުބާރާތް ގެއްލުނީ ކުޅުނު ދެމެޗުން ވެސް ބަލިވުމާއި ގުޅިގެންނެވެ.
މެޗުގެ ފުރަތަމަ ހާފުގައި ޖޯޑަނުން ވަނީ މޮޅު ކުޅުމެއް ދައްކައި، މެޗުގެ 36 ވަނަ މިނެޓުގައި ލީޑު ނަގާފައެވެ. މިއީ ޖޯޑަންގެ ވޯލްޑް ކަޕް ތާރީހުގައި އެ ގައުމުން ކާމިޔާބުކުރި ފުރަތަމަ ގޯލެވެ. މި ގޯލު އެޓީމަށް ކާމިޔާބުކޮށްދިނީ މޫސާ އަލް ތާމަރީ ތަނަވަސްކޮށްދިން ފުރުސަތަކުން ނިޒާރް އަލް ރަޝްދާން އެވެ.
މެޗުގެ ފުރަތަމަ ހާފު ނިމުނީ 1-0 އިން ޖޯޑަން ކުރީގައި އޮވެގެންނެވެ.
ދެވަނަ ހާފުގައި އަލްޖީރިއާއިން ކުޅުން ވަރުގަދަކޮށް، މެޗުގެ 68 ވަނަ މިނެޓުގައި ނަތީޖާ ހަމަހަމަކުރިއެވެ. ކެޕްޓަން ރިޔާދް މަހްރޭޒް ނަގައިދިން ކޯނަރަކުން މި ގޯލު ބޮލުން ޖަހައިދިނީ ބަދަލު ކުޅުންތެރިއެއްގެ ގޮތުގައި ނުކުތް ނަދީރް ބެންބުއާލީ އެވެ. އަދި މެޗުގެ 82 ވަނަ މިނެޓުގައި އަމީން ގުއޭރީ ވަނީ އިތުރު ގޯލެއް ޖަހައި އަލްޖީރިއާއަށް މެޗުން ތިން ޕޮއިންޓް ކަށަވަރުކޮށްދީފައެވެ.
މި މެޗަށް އަލްޖީރިއާއިން ނުކުތްއިރު ބައެއް ބަދަލުތައް ފެނިގެންދިޔައެވެ. އެގޮތުން ފުރަތަމަ މެޗުގައި ބެންޗުން ފެނުނު ރިޔާދް މަހްރޭޒް މި މެޗުގެ ފުރަތަމަ 11 ގައި ހިމެނުނެވެ. އަދި ފްރާންސްގެ ލެޖެންޑް ޒައިނުއްދީން ޒިދާންގެ ދަރިފުޅު ލޫކާ ޒިދާން ވަނީ އަލްޖީރިއާގެ ގޯލު ބަލަހައްޓާފައެވެ.
އަލްޖީރިއާގެ ދެވަނަ ގޯލަށް ފަހު ޖޯޑަން އިން ކުޅުން ވަރުގަދަކުރިއިރު، އެ ޓީމުގެ އަލް ތާމަރީ އާއި އަލީ އޮލްވާންގެ ނުރައްކާތެރި ހަމަލާތަކެއް ފެނިގެންދިޔައެވެ. އެހެން ނަމަވެސް، އެޓީމަށް ނަތީޖާ އަނބުރާލެވޭ ގޮތެއް ނުވިއެވެ.
މި ނަތީޖާއާއެކު ގްރޫޕް 'ޖޭ' އިން އާޖެންޓީނާ ވަނީ ދެވަނަ ބުރަށް ދަތުރުކޮށްފައެވެ. އަލްޖީރިއާ އާއި އޮސްޓްރިއާއަށް ތިން ޕޮއިންޓް ލިބިފައިވާއިރު، ދެވަނަ ބުރަށް ދާނެ ދެވަނަ ޓީމެއް ކަށަވަރުވާނީ މި ދެޓީމު ބައްދަލުކުރާ ފޯރިގަދަ މެޗަށްފަހުއެވެ.
ޖޯޑަން މުބާރާތުން ވަކިވާން ޖެހުނީ ކުޅުނު ދެ މެޗުން ވެސް ބަލިވެ، ޕޮއިންޓެއް ނުލިބުމުންނެވެ.