ހުކުރު ދުވަހަކީ "ކުކުޅު"ގެ ދުވަހެވެ. މީރު ކުކުޅެއް ރޯސްޓް ކުރާނަމަ ނުވަތަ ބޮޑު ރިހަގަނޑެއް ހަދާނަމަވެސް ލޮނުމެދަކީ އެއާނުލާ ހަމަ ކުކުޅުގެ ރަހަ ހެޔޮވަރު ނުވާނެ މުހިންމު ބާވަތެކެވެ. އެކަމަކު ލޮނުމެދު ބޭނުންކުރުމުގެ އެންމެ ބޮޑު ހިތާމަޔަކީ އަތުން ވަސް ނުފިލުމެވެ. އެ ވަހާއި އެކީ ކެތްކުރަން މިހުރިހާ ދުވަހު މަޖުބޫރުވިޔަސް ދެން ނުވާނެ އެވެ. ތިޔަ އަތްތަކުން ލޮނުމެދު ވަސް ފިލުވާނެ ގޮތްތައް މިހިރީ އެވެ.
ލުނބޯ
ލުނބޯއަކީ މިކަމަށް ބޭނުންކުރަން އޮތް އެންމެ ފުރަތަމަ ޖާދުލެވެ. ލުނބޯއަކީ ސިޓްރަސް މޭވާއަކަށްވާއިރު ފިޔާ، ލޮނުމެދު މިފަދަ ތަކެތީގައިވެސް ހުންނަނީ ހަމަ ސިޓްރަސްއެވެ. އެއާއެކު ލުނބޯއިން ލޮނުމެދުގެ ވަސް އެކުލެވޭ މާއްދާތައް ނިއުޓްރަލައިޒް ކޮށްލައެވެ. ނުވަތަ ވަސް ފިލުވާލަ އެވެ.
ދަތް އުނގުޅާ ބޭސް
ފަހަރެއްގައި މިއީ ކުރަން ވަރަށް އުނދަގޫ ކަމަކަށް ވެދާނެ އެވެ. ނަމަވެސް ގިނަ ބަޔަކު ބުނަނީ މިއީ ހަމަ އަސްލަށްވެސް ވަސް ފިލުވައިދޭ އޭޖެންޓެއް ކަމަށެވެ. ލޮނުމެދު ކެއުމަށްފަހު ދަތް އުނގުޅުމުން އަނގައިން ވަސް ފިލުވައިދޭހެން އަތުން ވެސް ފިލުވައިދެއެވެ. އެއްބަޔަކު ދަތް އުނގުޅާ ބޭސް ބޭނުންކުރަނީ އެއް އަތަށް ކުޑަ މައުތުވޮޝް ކޮޅެއް އެޅުމަށްފަހު އަނެއް އަތަށް ކުޑަ ދަތް އުނގުޅާ ބޭސް ކޮޅެއް އަޅާފައެވެ.
ކޮފީ
މިކަމުގައި ދެން ބޭނުންކުރަން އޮތް އެންމެ މޮޅު އެއްޗަކީ ކޮފީ އެވެ. ކޮފީ އަކީ މޮޅު އެކްސްފޯލިއަންޓް އަކަށްވާއިރު، ލޮނުމެދު ވަސް ފިލުވައިދީ ކޮފީގެ މީރުވަސް އަތުން ދުވައެވެ. ލޮނުމެދު އެކަންޏެއް ނޫނެވެ. ލޮނުމެދާއި، ފިޔާ އަދި މަސް، ކަމުގައިވިޔަސް ކޮފީ އަތުގައި އުނގުޅައިފިނަމަ ވަސް ފިލުވައިދޭނެ އެވެ.
ލޮނާއި ބޭކިން ސޯޑާ
ފަހަރެއްގައި މާ ބޮޑަށް ސެންސިޓިވް ސްކިން ހުންނަނަމަ ލޮނު ބޭނުންނުކޮށް ހަމައެކަނި ބޭކިން ސޯޑާ ބޭނުންކުރުން ބުއްދިވެރިވާނެ އެވެ. އެނޫންނަމަ އެއް ސައިސަމުސާ ލޮނު 2 ސައިސަމުސާ ބޭކިން ސޯޑާއަށް އެޅުމަށްފަހު ކުޑަ ފެންފޮދެއް އަޅާ މިކްސްކޮށްލާށެވެ. އެއަށްފަހު އަތުގައި އެ ހޭކުމަށްފަހު ދޮވެލާށެވެ. ވަސް ހުންނަންވާނީ ފިލާފައެވެ.
ވިނެގާ
ގިނަ ބަދިގެތަކުގައި ހަމަގައިމުވެސް ހުންނަ ވިނެގާ ފުޅިއަކީވެސް ލޮނުމެދު ވަސް ފިލުވާލަން ބޭނުންކުރެވިދާނެ ބާވަތެކެވެ. ފަހަރެއްގައި ވިނެގާއަކީވެސް މާ ކަމުދާ ވަހަކަށް ނުވެދާނެ އެވެ. ނަމަވެސް ލޮނުމެދަށްވުރެ ރަނގަޅުވާނެތާއެވެ. ގިނަ ބަޔަކު ބުނާގޮތުން ޓިޝޫއެއްގައި ވިނެގާ ތެތްކޮށްލުމަށްފަހު އަތުގައި ހޭކުމުންވެސް ލޮނުމެދު ވަސް ފިލުމަށް އެހީވާނެ އެވެ.
ފިނި ފެން
މިއީވެސް ވިސްނުމުގައި ބަހައްޓާލަން ޖެހޭ ކަމެކެވެ. ލޮނުމެދު ވަސް ފިލުވުމަށް އަތް ދޮންނައިރު ހޫނުފެން ބޭނުންކުރާނަމަ އަނެއްކާވެސް ވަސް އިތުރަށް ހަރުލާނެ އެވެ. ސަަބަބަކީ ހޫނުފެން ބޭނުންކުރުމުން ހަމުގެ ޕޯރތައް އިތުރަށް ހުޅުވި ވަސް އިތުރަށް ވަންނާނެ އެވެ. އެހެންކަމުން ފިނި ފެނުން އަތް ދޮވުން މާ ބުއްދިވެރިވާނެ އެވެ.
ތެޔޮ
މިފަހަރު މިއޮތީ ލޮނުމެދު ކޮށައި ގާނާ ހެދުމުގެ ކުރިން ކުރެވިދާނެ ކަމަކެވެ. އަތުގައި ތެޔޮކޮޅެއް ހާކާލަންވީ އެވެ. އެއަށްފަހު ލޮނުމެދުގެ މަސައްކަތް ނިންމާލުމަށްފަހު ސައިބޯންޏާއި ފެނުން އަތް ދޮވެލާށެވެ.
މާ މޮޅު ވައްތަރުތަކުގެ ސައިބޯންޏާއި ހޭންޑް ވޮޝް ކޮންމެހެން ނުގަތަސް، ބަދިގޭގައި ހުރި ދެތިން އެއްޗެއް ބޭނުންކޮށްގެންވެސް މިއަދު ތިކައްކާ ކުކުޅަށް އަޅާ ލޮނުމެދުތަކުގެ ވަހުން ސަލާމަތް ވެވިދާނެ އެވެ.