އައްޑޫ އިކުއަޓޯރިއަލް ހޮސްޕިޓަލް (އޭއީއެޗް)ގައި އެންޑޮސްކޮޕީގެ ހިދުމަތް ދޭން ފަށައިފި އެވެ.
އެންޑޮސްކޮޕީއަކީ ހަށިގަނޑަށް ހޮޅިއެއް ފަދަ ހާއްސަ އާލާތެއް ކޮށްފައިގެން އެތެރެހަށީގެ ގުނަވަންތައް ބަލައި ތަހުލީލު ކުރަން ހަދާ ޕްރޮސީޖާއެކެވެ.
މިއަދު އިކުއަޓޯރިއަލް ހޮސްޕިޓަލުން ވަނީ އެ ހޮސްޕިޓަލުގައި އެންޑޮސްކޮޕީގެ ހިދުމަތް ދޭން ފަށާފައިވާކަން އިއުލާނުކޮށްފަ އެވެ.
އިކުއަޓޯރިއަލް ހޮސްޕިޓަލުން ބުނި ގޮތުގައި މިއީ މާލެ ފިޔަވައި ރާއްޖޭގެ އެހެން ސަރަހައްދެއްގެ ހޮސްޕިޓަލެއްގައި މި ހިދުމަތް ދޭން ފެށި ފުރަތަމަ ފަހަރެވެ.
އައްޑޫ އިކުއަޓޯރިއަލް ހޮސްޕިޓަލުގެ އިމާރާތް -- ސަން ފޮޓޯ
އެ ހޮސްޕިޓަލުގައި އެންޑޮސްކޮޕީގެ ހިދުމަތް ފަށާފައިވާއިރު މިދިޔަ ހަފްތާގެ ތެރޭގައި އައިޖީއެމްއެޗްގެ އެހީގައި އިކުއަޓޯރިއަލް ހޮސްޕިޓަލުގެ ނަރުހުންނާއި ކްލިނިކަލް އެސިސްޓެންޓުންނަށް ވަނީ އެންޑޮސްކޮޕީއާ ގުޅޭ ތަމްރީނެއްވެސް ހިންގައިފަ އެވެ.
އައްޑޫގައި ކުރިން ހިންގި ހިތަދޫ ރީޖަނަލް ހޮސްޕިޓަލް އުވާލައި، ކުރީގެ ކޮންވެންޝަން ސެންޓަރު ހުރި އިމާރާތުގައި އަލަށް ހެދި އިކުއަޓޯރިއަލް ހޮސްޕިޓަލަކީ ޓާޝަރީ ފެންވަރަށް ތަރައްގީ ކުރާ ތަނެކެވެ.
މިދިޔަ އަހަރުގެ ޖެނުއަރީ 15ގައި އެތަނުގައި ހިދުމަތް ދޭން ފެށިއިރު އެ ތަނުގައި 100 އެނދާއި ހަތް އައިސީޔޫ އެނދު ހުރެ އެވެ. މިހާރު އެ ހޮސްޕިޓަލުގައި ބޮޑެތި އޮޕަރޭޝަންތައްވެސް ކުރެ އެވެ.