މިއަހަރުގެ ޑިސެމްބަރު މަހަށް ތާވަލުކޮށްފައި އޮތް ކުލަބުތަކުގެ އެންމެ ހައިބަތު ބޮޑު މުބާރާތް ކަމަށްވާ ކްލަބް ވޯލްޑް ކަޕް އަންނަ އަހަރުގެ ފެބްރުއަރީއަށް ފަސްކޮށްފައިވާކަން ފީފާއިން އިއުލާން ކޮށްފި އެވެ.
ކޮންމެ އަހަރެއްގެ ޑިސެމްބަރު ހިސާބުގައި ބާއްވާ މި މުބާރާތް މިފަހަރު ބާއްވާ ގޮތަށް ހަމަޖެހިފައި އޮތީ 2022 ވަނަ އަހަރުގެ ވޯލްޑްކަޕް ވެސް ބާއްވަން ތައްޔާރުވާ ގަތަރުންނެވެ. އެއާއެކު ވެސް ކޮވިޑް-19 ގެ ސަބަބުން ދިމާވެފައިވާ ދަތިތަކާއި، އެކި ބައްރުތަކުގެ ޓީމުތައް ވާދަކުރާ މި މުބާރާތް މި ހާލަތުގައި ބޭއްވުން މިވަގުތަށް އެންމެ ރަނގަޅު ކަމަށް ނުފެންނާތީ ފީފާއިން ވަނީ މުބާރާތް އަންނަ އަހަރުގެ ކުރީކޮޅަށް ބަދަލުކޮށްފަ އެވެ.
ފީފާއިން އިއްޔެ އާއްމު ކުރި އިއުލާންގައި އެ އިދާރާއިގެ ބައެއް މުބާރާތްތަކުގެ ބަދަލުވެފައި ޝެޑިއުލް އާއްމު ކުރި އިރު، ކުލަބް ވޯލްޑްކަޕް ކުރިއަށް ގެންދިއުމަށް ޝެޑިއުލުގައި ހިމަނާފައި ވަނީ އަންނަ އަހަރުގެ ފެބްރުއަރީ މަހުގެ 1 އިން 11 އަށެވެ.
މި މުބާރާތުގައ ވާދަކުރާނެކަން މިހާތަނަށް ޔަގީންވެފައި އޮތީ އެންމެ ދެ ޓީމެވެ. އެއީ ޔޫރޮޕުގެ ޗެމްޕިއަން ބަޔާން މިއުނިކާއި، ގަތަރުގެގެ ސްޓާ ލީގުގެ އެންމެ ފަހުގެ ޗެމްޕިއަން އަލް-ދުހައިލް އެވެ.
އަންނަ އަހަރުގެ އެ މުބާރާތަކީ މިހާރު އޮތް ފޯމެޓަށް އެ މުބާރާތް ކުޅޭނެ އެންމެ ފަހު ފަހަރު ކަމަށްވެސް ފީފާއިން ވަނީ ބުނެފަ އެވެ. ފީފާއިން މީގެ ކުރިން ބުނެފައިވަނީ ކްލަބް ވޯލްޑްކަޕް ފުޅާކޮށް، ޓީމުތައް އިތުރު ކޮށްގެން އައު ފޯމެޓަކަށް ކުޅެން ރާވާފައިވާ ކަމަށާއި، އެ މުބާރާތް ފަށާނީ 2022 ވަނަ އަހަރުގެ ވޯލްޑް ކަޕަށް ފަހު ކަމަށެވެ. އަދި އެ މުބާރާތް ބާއްވަން މިހާރު ޗައިނާއިން ބިޑް ކާމިޔާބުކޮށްފައިވާ ކަމަށް ފީފާއިން ވަނީ ބުނެފަ އެވެ.
ފީފާއިން އިއްޔެ ނެރުނު އިއުލާނުގައި ބުނެފައިވާ ގޮތުން އަންނަ އަހަރުގެ ކުރީކޮޅަށް ފަސްކޮށްފައިވާ އަންހެނުންގެ 20 އަހަރާއި، 17 އަހަރުން ދަށުގެ ވޯލްޑްކަޕް ދެން މިފަހަރު ނުބާއްވާނެ އެވެ.