ލީމާ (ނޮވެމްބަރު 17): ޕެރޫގެ ގާނޫނު ހަދާ މަޖިލީހުގެ މެމްބަރެއް ކަމަށްވާ ފްރާންސިސްކޯ ސަގާސްޓީ އެގައުމުގެ ވަގުތީ ރައީސްކަމަށް ހޮވައިފި އެވެ.
ޕެރޫގެ ކޮންގްރެސްއިން އެގައުމުގެ ވަގުތީ ރައީސް ކަމަށް ސަގާސްޓީ ހޮވީ އެމަގާމުގައި މީގެ ކުރިން ހުންނެވި މާޓިން ވިޒްކާރާގެ މައްޗަށް ރިޝްވަތު ނެންގެވުމުގެ ތުހުމަތުކޮށް، މިދިޔަ އަންގާރަ ދުވަހު ކޮންގްރެސްއިން އޭނާ އަޒުލު ކުރުމުންނެވެ. އަދި އޭރު ކޮންގްރެސްގެ ރައީސްގެ ގޮތުގައި ހުންނެވި މެނުއެލް މެރީނޯ ގައުމުގެ ރައީސްކަމަށް އިސްވުމަށް ފަހު، މިދިޔަ އާދިއްތަ ދުވަހު އިސްތިއުފާ ދެއްވުމާ ގުޅިގެންނެވެ.
މެރީނޯ އިސްތިއުފާ ދެއްވީ، ވިޒްކާރާ އަޒުލު ކުރުމަކީ ބަޣާތެއްގެ ގޮތުގައި ސިފަކޮށް ޕެރޫގެ ގިނަ އަދަދެއްގެ ރައްޔިތުން އޭނާގެ ސަރުކާރާ ދެކޮޅަށް މުޒާހަރާ ކުރަމުން ދަނިކޮށެވެ. އަދި އެ މުޒާހަރާތަކުގައި މިދިޔަ ހޮނިހިރު ދުވަހު 22 އަހަރުގެ މީހަކާއި 24 އަހަރުގެ މީހަކު މަރުވުމުން، އެގައުމުގެ ރައްޔިތުންނާއި ބައިނަލްއަގުވާމީ ޖަމްއިއްޔާތަކުގެ ފާޑު ކިޔުން ވެސް ސަރުކާރަށް އަމާޒުވުމުންނެވެ.
ޕެރޫގައި އަންނަ އޭޕްރިލް މަހު އާއްމު އިންތިހާބު ބާއްވަންދެން އެގައުމުގެ ރައީސް ކަމަށް އައްޔަން ކުރި 76 އަހަރުގެ ސަގާސްޓީ އަކީ މެދު ފިކުރުގެ މޮރާޑޯ ޕާޓީއަށް ނިސްބަތްވެވަޑައިގަންނަވާ ބޭފުޅެކެވެ.
ސަގާސްޓީ ރައީސްކަމަށް ހޮވުމަށް ޕެރޫގެ ކޮންގްރެސްގެ 130 މެމްބަރުންގެ 97 މެމްބަރުން ވޯޓު ދިނެވެ. އަދި އޭނާ ރައީސް ކަމަށް ހޮވުމާ ދެކޮޅަށް 26 މެމްބަރުން ވޯޓު ދިނެވެ.
ސަގާސްޓީ ރައީސްކަމަށް ހޮވި ފަހުން ދެއްވި ފުރަތަމަ ތަގުރީރުގައި އޭނާ ވިދާޅުވީ އެއީ އުފާ ފާޅު ކުރަންވީ ވަގުތެއް ނޫން ކަމުގަ އެވެ. އަދި މުޒާހަރާތަކުގައި މަރުވި ޒުވާނުންގެ ހަނދާން އާ ކުރައްވާ، އެފަދަ ހާދިސާއެއް ތަކުރާރު ނުވާނެކަން ޔަގީން ކުރުމަށް ކޮންގްރެސް އިން ފިޔަވަޅު އަޅަން ޖެހޭ ކަމަށް ވިދާޅުވެފަ އެވެ.
"މިއަދަކީ އުފާ ފާޅު ކުރަންވީ ދުވަހެއް ނޫން. އަޅުގަނޑުމެންނަށް [މުޒާހަރާގައި] މަރުވި މީހުން އަލުން ދުނިޔެއަށް ނުގެނެވޭނެ. ނަމަވެސް މިފަދަ ކަމެއް ތަކުރާރު ނުވާނެކަން ޔަގީން ކުރުމަށް ކޮންގްރެސް އާއި ސަރުކާރަށް ފިޔަވަޅު އެޅިދާނެ." ސަގާސްޓީ ވިދާޅުވި އެވެ.
ސަގާސްޓީ ރައީސް ކަމަށް ހޮވުމަށް ޕެރޫގެ ކޮންގްރެސްގެ 130 މެމްބަރުންގެ 97 މެމްބަރުން ވޯޓު ދިނެވެ. އަދި އޭނާ ރައީސް ކަމަށް ހޮވުމާ ދެކޮޅަށް 26 މެމްބަރުން ވޯޓު ދިނެވެ.
ވޯލްޑް ބޭންކުގެ ކުރީގެ އޮފިޝަލެއް އަދި އިންޖިނިއަރެއް ކަމަށްވާ ސަގާސްޓީ ޕެރޫގެ ރައީސް ކަމަށް އިސްވެފައި ވަނީ އެގައުމު ކޮވިޑް ބަލިމަޑުކަމާ ކުރިމަތިލާން ޖެހި، 100 އަހަރު ތެރޭ އިގުތިސާދު ދަށަށް ނުދާ މިންވަރަކަށް ދަށަށް ދަމުންދާ ދަނޑިވަޅެއްގަ އެވެ.
ސަގާސްޓީ ރައީސް ކަމަށް ހޮވުމުން ބައެއް މީހުން ވަނީ މަގުތަކަށް ނުކުމެ އުފާ ފާޅު ކޮށްފަ އެވެ. އަދި އެހެން މީހުން ވަނީ މުޒާހަރާތަކުގައި މަރުވި މީހުންނަށް އިންސާފު ހޯދައި ދިނުމަށް ގޮވާލާ، ސުލްހަވެރި މުޒާހަރާތައް ބާއްވާފަ އެވެ.
ޕެރޫގެ ކުރީގެ ރައީސް ވިޒްކާރާ ވަނީ ސަގާސްޓީއަށް މަރުހަބާ ވިދާޅުވެފަ އެވެ. މީގެ ކުރިން ވިޒްކާރާ ވަނީ އޭނާ އަޒުލު ކުރުމުގެ ސައްހަ ކަމާ ބެހޭ ގޮތުން އެގައުމުގެ ދުސްތޫރީ ކޯޓުން ގޮތެއް ނިންމުމަށް ގޮވާލައްވާފަ އެވެ.
ވިޒްކާރާއާ ދެކޮޅަށް ރިޝްވަތު ނެންގެވިކަމުގެ ތުހުމަތު ކޮށްފައި ވަނީ އޭނާ ގަވާއިދާ ހިލާފަށް ސަރުކާރުގެ ދެ ކޮންޓުރެކްޓެއް އެގައުމުގެ ލަވަކިޔުންތެރިއެއް ކަމަށްވާ ރިޗަޑް ސިސްނެރޮސްއަށް ދެއްވި ކަމަށް ބުނެ އެވެ. އަދި އޭނާ ރިޝްވަތުގެ ގޮތުގައި 630،000 ޑޮލަރު ގަބޫލު ކުރެއްވި ކަމަށް ކޮންގްރެސްއިން ބުންޏެވެ.
ޕެރޫގެ ޕްރޮސެކިއުޓަރުން އެ މައްސަލަ ބަލަމުން ދިޔަ ނަމަވެސް ވިޒްކާރާއާ ދެކޮޅަށް އަދި ދައުވާކޮށްފައި ނުވެ އެވެ.