އިންސާނީ ހައްގުތަކާ ޚިލާފުވުމުގެ ކުށުގައި ޖަލު ހުކުމް ތަންފީޒުކުރައްވައި މިނިވަންވެފައި ހުންނެވި ޕެރޫގެ ކުރީގެ ރައީސް އަލްބާޓޯ ފުޖިމޯރީ އުމުރުން 86 އަހަރުގައި އަވަހާރަވެއްޖެއެވެ.
ފުޖިމޯރީގެ ދަރިކަނބަލުން ކެއިކޯ ފުޖިމޯރީ ވިދާޅުވީ ރައީސް އަވަހާރަވީ ދިގު މުއްދަތަކަށް ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް ކަމަށެވެ. ފުޖިމޯރީ އަވަހާރަވީ ޕެރޫގެ ރައީސް ކަމަށް 2026 ވަނަ އަހަރު ވާދަކުރައްވާނެ ކަމަށް އިއުލާނުކުރައްވައިފައިވަނިކޮށެވެ.
ކުރީގެ އެގްރިކަލްޗަރަލް އިންޖިނިއަރެއް އަދި ޔުނިވާސިޓީ ޕްރޮފެސަރެއް ކަމަށްވާ ފުޖިމޯރީ ވަނީ 1990 ވަނަ އަހަރު ޕެރޫގައި ބޭއްވި އިންތިޚާބުގައި މާރިއޯ ވަރްގާސް ލޮސާއާގެ މައްޗަށް ކުރި ހޯއްދަވާފައިފައެވެ.
ދިހަ އަހަރު ދުވަހުގެ ރިޔާސީ ދައުރުގައި ފުޖިމޯރީ ވަނީ އިންފްލޭޝަން ދަށްކޮށް، އިގްތިސާދީ ކުރިއެރުން ޕެރޫއަށް ހޯދައިދީފައެވެ. ނަމަވެސް ޕެރޫގެ މުއައްސަސާތަކާއި ގާނޫނީ ވެރިކަން ބަލިކަށިކޮށް، ޑިމޮކްރަސީއާ ދެކޮޅު އުސޫލުތައް އެކަށައެޅުމުން އޭނާއަށް ވަނީ ވަރަށް ބޮޑަށް ފާޑުކިޔުންވެސް އަމާޒުވެފައެވެ.
ކޮންގްރެސް އާއި ކޯޓުތައް ވަގުތީ ގޮތުން ބަންދުކުރުމަށް ފަހު، 2000 ވަނަ އަހަރު ފުޖިމޯރީ ޕެރޫއިން ފިލައިގެން ދިޔައީ އޭނާގެ ޖާސޫސީ ވެރިޔާ ގާނޫނު ހަދާ މަޖިލީހުގެ މެންބަރުންނަށް ރިޝްވަތު ދޭ މަންޒަރު ފެންނަ ވީޑިއޯއެއް އާންމުވުމާ ގުޅިގެންނެވެ.
އޭގެފަހުން ޖަޕާނަށް ވަޑައިގެން، ބޮޑު ވަޒީރުކަމުން އިސްތިއުފާ ދެއްވީ ފެކްސް މެދުވެރިކުރައްވައެވެ. ފުޖިމޯރީ ފަހުން ވަނީ ޖަޕާނުގެ ރައްޔިތުކަން ހޯއްދަވާފައެވެ.
ދެހާސް ފަސް ވަނަ އަހަރު ފުޖިމޯރީ އަނެއްކާވެސް ސިޔާސީ މައިދާނަށް ނުކުމުވަޑައިގަތުމުގެ ގޮތުން އެނބުރި ޗިލީއަށް ވަޑައިގެންނެވި ނަމަވެސް އަސްކަރީ ޔުނިޓަކުން ހިންގި ޝަރީއަތެއްގައި ފުޖިމޯރީ ވަނީ ޕެރޫއާ ހަވާކޮށްފައެވެ.
ސަރުކާރުގެ ނަމުގައި ހަރަކާތްތެރިވާ ޑެތު ސްކޮޑްތަކުން ކުޑަކުއްޖަކު ހިމެނޭ ގޮތަށް 25 މީހުން ގަތުލުކުރި މައްސަލައިގެ ޒިންމާ އުފުލާފައިވާ ކަމަށް ބެލުމަށްފަހު 2009 ވަނަ އަހަރު ފުޖިމޯރީއަށް ވަނީ 25 އަހަރުގެ ޖަލު ހުކުމެއް އިއްވައިފައެވެ.
ނަމަވެސް އިންސާނީ ސަބަބުތަކާހުރެ، ޕެރޫގެ އެންމެ މަތީ ކޯޓުން މިދިޔަ ޑިސެމްބަރު މަހު ވަނީ އޭނާ ދޫކޮށްލަން އަމުރުކޮށްފައެވެ.