ބ. ބޮޑުފިނޮޅުގައި މަސައްކަތްކުރި ބިދޭސީންނަށް މުސާރަ ނުދީގެން ލޭބާ ރިލޭޝަންސް އޮތޯރިޓީ (އެލްއާރުއޭ)އިން ބަލަމުންދާ މައްސަލައަށް ރިޒް ކުންފުނީގެ އެއްބާރުލުން ނުލިބޭ ކަމަށް އެ އޮތޯރިޓީން ބުނެފި އެވެ.
އެލްއާރުއޭގެ ޕްރޮގްރާމު އޮފިސަރު ހޫދު އައްބާސް އަހްމަދު "ސަން"އަށް ވިދާޅުވީ، މުސާރަ ނުދީ ތިބި މުވައްޒަފުންނަށް މުސާރަ ދިނުމަށް މިދިޔަ މަހު އެ އޮތޯރިޓީން ރިޒް ކުންފުންޏަށް އަންގާފައިވާނެ ކަމަށެވެ.
"މިދިޔަ މަހު އިންނާނެ މުސާރަ ދޭން އެންގުމެއް ފޮނުވާފައި. އަދި މިހާތަނަށް އެ އެންގުމާ ގުޅިގެން ކުންފުނީގެ ފަރާތުން މިކޮޅަށް ރަސްމީ ސިފައެއްގައި ނެތް އެއްވެސް ޖަވާބެއް ދީފައި،" ހޫދު ވިދާޅުވި އެވެ.
އެލްއާރުއޭގެ އެންގުމަށް ރިޒް ކުންފުނީގެ ޖަވާބެއް ނުލިބޭއިރު، ހޫދު ވިދާޅުވީ އެ އޮތޯރިޓީން މުސާރަ ދޭން އަންގާފައި ވަނިކޮށް މުސާރަ ނުދީފިނަމަ، ކުންފުނިތަކުން އެއްބާރުލުން ނުދިނުމުން ފިޔަވަޅު އަޅަން އޮންނަ އުސޫލުން ފިޔަވަޅު އަޅަމުން ގެންދާނެ ކަމަށެވެ.
މި މައްސަލައަކީ ޓްރައިބިއުނަލް ކޯޓުތަކުގައި ވެސް ކުރިއަށްދާ މައްސަލައެކެވެ. ހޫދު ވިދާޅުވީ މި މައްސަލައިގައި ފިޔަވަޅު އެޅުމުގެ ކުރިން ކޯޓުގެ ނިންމުންތަކަށްވެސް ބަލާނެ ކަމަށެވެ.
ބޮޑުފިނޮޅުގައި މަސައްކަތްކުރި ބިދޭސީންނަށް މުސާރަ ނުދިން މައްސަލައިގައި މިދިޔަ މަހުގެ ދެވަނަ ދުވަހު އެ ރަށުގައި ހަމަނުޖެހުންތަކެއް ހިންގައި، ދިވެހީންތަކެއް ވަނީ ރަހީނުވެސް ކޮށްފަ އެވެ.
އެ ހަމަނުޖެހުމާ ގުޅިގެން، ޖުލައި ތިން ވަނަ ދުވަހު ފުލުހުން ވަނީ 19 ބިދޭސީއަކު ހައްޔަރުކޮށްފަ އެވެ. އަދި އެމީހުންގެ ބަންދުގެ މުއްދަތު ދެ ފަހަރެއްގެ މަތިން ވަނީ އިތުރު ކުރުމަށްފަހު މިމަހުގެ ކުރީކޮޅު އެމީހުން ބަންދުން ދޫކޮށް، އިމިގްރޭޝަނާ ހަވާލުކުރި އެވެ.