ޖުޑީޝަލް ސާވިސް ކޮމިޝަން (ޖޭއެސްސީ) އިން ހައިކޯޓުގެ އިސް ފަނޑިޔާރު ޝުޖާއު އުސްމާން ސަސްޕެންޑު ކުރީ ޖަލުގައި ހުރި މީހަކު މިނިވަންކުރުމާ ގުޅޭ ގޮތުން ގއ. ގެމަނަފުށީ ޕީޕީއެމްގެ އެކްޓިވިސްޓެއްގެ ގޭގައި މަޝްވަރާ ބައްދަލުވުމެއް ބޭއްވި ކަމަށް ތުހުމަތުކޮށެވެ.
ޖޭއެސްސީން ތުހުމަތުކުރާ ގޮތުގައި 2018 ވަނަ އަހަރު ބޭއްވި ރިޔާސީީ އިންތިޚާބުގެ ދުވަސްވަރު ސުޕްރީމް ކޯޓުގެ ކުރީގެ ފަނޑިޔާރު އަބްދުﷲ ދީދީ އާއި ކްރިމިނަލް ކޯޓުގެ ކުރީގެ ފަނޑިޔާރު ހަސަން ނަޖީބާއި ހައިކޯޓުގެ އިސް ފަނޑިޔާރު ޝުޖާއު އުސްމާން ގއ. ގެމަނަފުއްޓަށް ނުރަސްމީ ދަތުރެއް ކުރެއްވި އެވެ.
ޖޭއެސްސީން ނެރުނު ބަޔާނެއްގައި ބުނެފައި ވަނީ ކްރިމިނަލް ކޯޓުގެ އަމުރެއްގެ ދަށުން ޖަލުގައި ބަންދުކޮށްފައި ހުރި ގެމަނަފުށީ މީހެއްގެ އާއިލާގެ މެމްބަރުންތަކަކާ އެކު ޕީޕީއެމްގެ އެކްޓިވިސްޓެއްގެ ގޭގައި ބައްދަލުކޮށް އެ އާއިލާގެ އެންމެން ރައީސް އަބްދުﷲ ޔާމީން އަބްދުލް ގައްޔޫމަށް ވޯޓު ދޭން އެއްބަސްވާ ނަމަ ޖަލުގައި ހުރި މީހާ ބަންދުން ދޫކޮށްލުމާ ގުޅޭ ގޮތުން އެ ތިން ފަނޑިޔާރުން މަޝްވަރާކޮށްފައިވާ ކަމަށް ތުހުމަތުކޮށް އެ ކޮމިޝަނަށް މައްސަލައެއް ހުށަހެޅިފައިވާ ކަމަށެވެ.
އެ މައްސަލާގައި އެ ބުނާ ބައްދަލުވުން އޮތީ ގެމެނަފުށީ ސްޕޮޓްލައިޓް ގޭގައި ކަމަށް ޖޭއެސްސީގެ ތަހުގީގު ރިޕޯޓްގައި ވަނީ ބަޔާންކޮށްފަ އެވެ.
އެ މައްސަލައިގެ ތަހުގީގު ނިންމުމަށް ފަހު ތަހުގީގު ރިޕޯޓްގައިވާ ކަންކަމަށް ޖަވާބުދާރީވުމަށް ހަތް ދުވަހުގެ މުއްދަތެއް ފަނޑިޔާރު ޝުޖާއު އުސްމާނަށް އެ ކޮމިޝަނުން ވަނީ ދީފަ އެވެ.
އެކަމާ ގުޅިގެން ސްޕޮޓްލައިޓް ގޭގެ ވެރިފަރާތް ކަމަށްވާ މުހައްމަދު ސޯލިހް ނެރުނު ބަޔާނެއްގައި ވަނީ އެގޭގައި އެފަދަ ބައްދަލުވުމެއް ބާއްވާފައިވާ ކަމަށް ބުނެ އެރަށު މީހަކު ޖޭއެސްސީއަށް ދީފައި ވަނީ ދޮގު ބަޔާނެއް ކަމަށެވެ.
"މިހެން މިދަންނަވަން މިޖެހުނީ އަޅުގަނޑުގެ ގޭގައި މިދެންނެވި ބޭފުޅުންނާ އެކު މިފަދަ ބައްދަލުވުމެއް ދުވަހަކު ވެސް ބޭއްވިފައި ނުވާތީ އާއި އަދި މިފަދަ ކަމެއްގެ މަޝްވަރާއެއް ވެސް އަޅުގަނޑާއެކު އެއްވެސް ފަރާތަކުން ކޮށްފައިނުވާތީއެވެ،" ގެމަނަފުށީ ކުރީގެ ކައުންސިލަރު މުހައްމަދު ސޯލިހް ނެރުނު ބަޔާނުގައިވެ އެވެ.
އެގޭގައި އެފަދަ ބައްދަލުވުމެއް ބޭއްވި ކަމަށް މީހަކު ބުނެފައިވާ ނަމަ އެކަން ކަށަވަރު ކުރުމަކީ ޖޭއެސްސީ ފަދަ މުއައްސަސާއަކުން ކޮންމެހެން ކުރަންޖެހޭ ކަމެއް ކަމަށް އެ ބަޔާނުގައި ފާހަގަކޮށްފައިވެ އެވެ.
އެފަދަ ބައްދަލުވުމެއް އެގޭގައި ބޭއްވިކަން ކަށަވަރުކުރުމަށް ޖޭއެސްސީން އޭނައާ ސުވާލުކޮށްފައިނުވާ ކަމަށް ވެސް މުހައްމަދު ސޯލިހު ނެރުނު ބަޔާނުގައިވެ އެވެ.