ފިޝަރީޒް މިނިސްޓްރީގެ ޑިރެކްޓާ އޮފް ކޮމިއުނިކޭޝަންސް އަހްމަދު ފަޒީލްއަށް ޖިންސީ ފުރައްސާރައިގެ ބޮޑެތި ތުހުމަތުތަކެއް ކުރެވުމުން، އޭނާ މަގާމުން ސަސްޕެންޑު ކޮށްފިއެވެ.
ރައީސް އޮފީހުގެ ތަރުޖަމާނު އިބްރާހިމް ހޫދު ވިދާޅުވީ ފަޒީލްއާ ގުޅިގެން ކުރެވޭ ތުހުމަތުތައް މިހާރު ބަލަމުން އަންނަ ކަމަށާއި އަދި އޭނާ މަގާމުން ސަސްޕެންޑުކޮށްފައިވާ ކަމަށެވެ.
ސޯޝަލް މީޑިއާގައި ފަޒީލްއަށް ބޮޑެތި ތުހުމަތުތަކެއް އަންނަނީ ކުރަމުންނެވެ. އެގޮތުން އޭނާ އުމުރުން 18 އަހަރު ނުފުރޭ ކުޑަ އަންހެން ކުއްޖަކު ރޭޕްކޮށް، އެކުއްޖާ ބަލިވެ އިންކަމަށް ވެސް ތުހުމަތު ކޮށްފައިވެއެވެ.
އޭގެ އިތުރުން އަންހެން ކުދިންނަށް "އޮޅިގެން" ކަމަށް ބުނެ ބަދުއަހުލާގީ ފޮޓޯ އާއި ވީޑިއޯ ފޮނުވުމާއި، ޖިންސީ ފުރައްސާރައާއި ގޯނާގެ އިތުރު ތުހުމަތުތަކެއް ވެސް ވަނީ ކުރެވިފައެވެ.
އެ މައްސަލައާ ގުޅިގެން އޭނާ ނިސްބަތްވާ، މޯލްޑިވްސް ރީފޯމް މޫވްމަންޓް (އެމްއާރްއެމް) އިން ވެސް ރޭ ވަނީ މައްސަލަ ބަލަން ފަށައިފައެވެ.
އަދި މައްސަލަ ބަލާ ނިމެންދެން ޕާޓީ ގެ ހަރަކާތްތަކުން އޭނާ އެކަހެރިކުރެވިފައިވާ ކަމަށާއި އެކަމުގައި އަޅަންޖެހޭ ފިޔަވަޅުތައް އެޅުމަށް ކަމާއިބެހޭ ފަރާތްތަކާއެކު އެމްއާރްއެމް އިން ފުރިހަމައަށް މަސައްކަތް ކުރަމުން އަންނަ ކަަމަށް ވެސް އެ ޕާޓީން ބުންޏެވެ.
"ޖިންސީ ފުރައްސާރައާއި އަނިޔާ ފަދަ ކުށްތަކަކީ މި ޕާޓީއިން އެއްވެސް ވަރަކަށް ބަލައިގަންނާނެ ކަންކަމެއް ނޫނެވެ." އެމްއާރްއެމް އިން ބުންޏެވެ.