ރައްޔިތުންގެ މަޖިލީހަށް ތައުލީމީ މީހުން ހޮވުމުގެ ހުރިހާ ވެސް ބާރެއް އޮތީ ރައްޔިތުންގެ އަތް މަތީގައި ކަމަށް ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވެއްޖެ އެވެ.
ފުލުހުންގެ ހިދުމަތުގެ އިތުރުން އެހެނިހެން ގިނަ ވަޒީފާތަކަށް ވެސް ތައުލީމީ ވަކި ޝަރުތު ތަކެއް ކަނޑައަޅާފައިވާއިރު ރައްޔިތުންގެ މަޖިލީހުގެ މެންބަރުކަމަށް ކުރިމަތިލުމުގައި ތައުލީމީ އެއްވެސް ޝަރުތުއް ކުރިމަތިކޮށްފައެއް ނޯވެއެވެ.
މަޖިލީހަށް ހުށަހަޅާފައިވާ ފުލުހުންގެ ހިދުމަތުގެ ބިލް ދިރާސާ ކުރަމުންދާ ސަލާމަތީ ހިދުމަތްތަކުގެ ކޮމެޓީން ބޭއްވި ނޫސްވެރިންގެ ބައްދަލުވުމުގައި، އެ މައްސަލައާ ގުޅޭ ގޮތުން ނޫސްވެރިޔަކު ކުރި ސުވާލަކަށް ޖަވާބު ދެެއްވަމުން މެމްބަރު އަބްދުލްޣަފޫރު ވިދާޅުވީ، ނިމިގެން ދިޔަ މަޖިލީހުގައި މެންބަރުކަން ކުރެއްވި 15 ވަރަކަށް މެންބަރުން މި ދައުރުގެ މަޖިލީހަށް ވެސް ރިޕީޓްވެގެން އައިސްފައިވާ ކަމަށެވެ. އަދި އެއީ ވެސް ރައްޔިތުންގެ ނިންމުމެއް ކަމަށް އޭނާ ފާހަގަކުރެއްވިއެވެ.
"އަޅުގަނޑު ވެސް ރައްޔިތުންގެ ކިބައިން ވަރަށް ބޮޑަށް އެދެން މި މަޖިލީހަށް މެންބަރުން އެ ބޭފުޅުން ހޮއްވަވާއިރުގައި ތައުލީމީ ގާބިލް ބޭފުޅުން މަޖިލީހަށް އެބޭފުޅުން ހޮވައިދެއްވުން. އޭރުން އެ ނަތީޖާ ވެސް މަޖިލީހުން ފެނިގެން ދާނީ. އެހެން ނަމަވެސް އެ ބޭފުޅުން ހޮއްވަވައި މިތަނަށް ފޮނުއްވާ ބޭފުޅުންނާ އެކު އަޅުގަނޑުމެން ޖެހޭނީ ހަމަ މަސައްކަތް ކުރަން. އަޅުގަނޑު ވެސް ހަމަ އެގޮތަށް ހޮވިގެން އައިސްފައިހުރި މީހަކަށްވާތީ އެހެންވީމަ ރައްޔިތުން އެކަން ނިންމާނީ،" އަބްދުލްޣަފޫރު ވިދާޅުވި އެވެ.
މަޖިލީހުގެ މެންބަރު ކަމަށް ކުރިމަތި ލެއްވުމަށް ޝަރުތުތަކެއް ލެވިދާނެ ކަން ފާހަގަކޮށް އަބްދުލްޣަފޫރު ވިދާޅުވީ، ތައުލީމީ ވަކި މިންގަނޑެއް ވެސް ލެވިދާނެ ކަމަށާއި އެހެންވެއްޖެ ނަމަ ރައްޔިތުން ބޭނުންވާ ފެންވަރުގެ މެންބަރުންތަކެއް މަޖިލީހުގައި ތިއްބަވާނެ ކަމަށެވެ.
އެ ބައްދަލުވުމުގައި ވާހަކަ ދައްކަވަމުން ހިތަދޫ އުތުރު ދާއިރާގެ މެންބަރު މުހައްމަދު އަަސްލަމް ވިދާޅުވީ، ޝަރުތުތައް ބަދަލުކުރާ ނަމަ ޖެހޭނީ ގާނޫނު އަސާސީއަށް އިސްލާހު ގެންނަން ކަމަށާއި އެއީ ޑިބޭޓަބަލް އިޝޫއެއް ކަމަށެވެ. އަދި 2008 ވަނަ އަހަރު ގާނޫނު އަސާސީ އެކުލަވާލިއިރު ވިސްނުން އައީ ރައްޔިތުން ނިންމާފައި ދައްކާނީ ރައްޔިތުންގެ ބަސް ބުނާނެ މީހާ ކަމަށެވެ.
"ގާނޫނު އަސާސީއަށް ބަދަލެއް ގެނެވޭ ކަމުގައި ވަނީ ނަމަ އަޅުގަނޑު ހަމަފުރިހަމައަށް ތާއީދު ވަކި ކޮލިފިކޭޝަނެއް ލުމަށް. އެއީ އަޅުގަނޑުގެ އަމިއްލަ ހިޔާލު އެކަމާއި ގުޅޭ ގޮތުން،" މެމްބަރު އަސްލަމް ވިދާޅުވި އެވެ.