ޑިމޮކްރެޓިކް ރިޕަބްލިކް އޮފް ކޮންގޯގެ ރައީސްގެ ޗީފް އޮފް ސްޓާފް ވައިޓަލް ކަމެހްރެގެ މައްޗަށް ކޮރޮޕްޝަންގެ ކުށް ސާބިތުވެއްޖެ އެވެ.
އޭނާގެ މައްޗަށް ކޮށްފައިވަނީ ދައުލަތުގެ ޕަބްލިކް ފަންޑުން 50 މިލިއަން ޑޮލަރު ވަގަށް ނެގުމުގެ ކުށެވެ. އެއީ ކޮންގޯގެ ރައީސް ވެރިކަމަށް އައުމަށްފަހު އިފްތިތާހުކުރި ހައުސިން ޕްރޮޖެކްޓެއްގައި ހިމެނޭ ފައިސާތަކެކެވެ.
އޭނާގެ މައްޗަށް ކުށް ސާބިތުވެ ވަނީ 20 އަހަރަށް ޖަލުގައި "ހާޑް ލޭބާ" ނުވަތަ ވަރުގަދައަށް މަސައްކަތްކުރަން ހުކުމްކޮށްފަ އެވެ. އަދި މިނިވަންވެ 10 އަހަރު ވަންދެންވެސް ރައީސްކަމަށް އޭނާއަށް ކުރިމަތިނުލެވޭނެކަމަށް ވަނީ ހުކުމްކޮށްފައެވެ.
ވައިޓަލްގެ މައްސަލަ ކުރިން ބެއްލެވި ފަނޑިޔާރު މިދިޔަ މަހު ވަނީ އަވަހާރަވެސް ކޮށްލައިފަ އެވެ. ފަނޑިޔާރުގެ މަރާ ގުޅޭ ގޮތުން ޕޮލިސް ރިޕޯޓްގައި ބުނީ އޭނާ މަރުވީ ހާޓްއެޓޭކެއް ޖެހިގެން ކަަމަށެެވެ. ނަމަވެެސް ފަހުން ހެދި ޕޯސްޓްމޯޓަމްތަކުން ދެއްކިގޮތުގައި ފަނޑިޔާރު އަވަހާރަވީ ތޫނު އެއްޗެއް އޭނާގެ ބޮލަށް ހަރާލާފައިވާތީ އެވެ.
ވައިޓަލްގެ މައްސަލަ ފަހުން ކުރިއަށް ގެންދިޔައީ އެހެން ފަނޑިޔާރަކާއެކު އެވެ.
ވައިޓަލްގެ ސަޕޯޓަރުން ބުނާގޮތުގައި އޭނާއަށް ކޮށްފައިވަނީ ސިޔާސީ ހުކުމެއް ކަމަށާއި ބޭނުމަކީ ރިޔާސީ އިންތިހާބުގައި ވާދަކުރުން ހުއްޓުވުމެވެ.
ވައިޓަލްގެ މައްސަލައިގައި ލުބްނާނުގެ ވިޔަފާރިވެރިޔާ ޖަމާލް ސާމިހްވެސް ވަނީ 20 އަހަރަށް ޖަލަށް ލާން ހުކުމްކޮށްފަ އެވެ.
ވައިޓަލްގެ ލޯޔަރުން ބުނީ ހުކުމް އިސްތިއުނާފްކުރާނެ ކަމަށާއި އަދި "ހާޑް ލޭބާ" އަކީ އެގައުމުގެ ގާނޫނުތަކާވެސް ހިލާފު ކަމެއް ކަމަށެެވެ. -- ބީބީސީ