ފަސިންޖަރުން އުފުލުމަށް ހާއްސަކޮށް ހަދާފައިި ހުންނަ އެއްގަމުގައި ދުއްވާ އެއްޗެހީގެ ތެރެއިން، ކާރު، ޖީޕް، އަދި ވޭން ތަކުން އިމްޕޯޓު ޑިއުޓީގެ ގޮތުގައި ނަގަމުން އައި މިންވަރު ކުޑަކުރަން ދިވެހިރާއްޖޭގެ އެކްސްޕޯޓް އިމްޕޯޓްގެ ގާނޫނަށް އިސްލާހު ހުށަހަޅައިފި އެވެ.
އެކްސްޕޯޓް އިމްޕޯޓްގެ ގާނޫނަށް އިސްލާހު ހުށަހެޅުއްވީ ގަމު ދާއިރާގެ މެންބަރު މުހައްމަދު ވިސާމް އެވެ.
މިހާރުގެ ގާނޫނުގައި ފަސިންޖަރުން އުފުލުމަށް ހާއްސަކޮށް ހަދާފައިި ހުންނަ އެއްގަމުގައި ދުއްވާ އެއްޗެހީގެ ތެރެއިން، ކާރު، ޖީޕް، ވޭންގެ ޑިއުޓީގެ ގޮތުގައި ބުނެފައި ވަނީ 200 ޕަސެންޓެވެ. ނަމަވެސް އެ މިންވަރު 100 ޕަސެންޓަށް ކުޑަކުރަން ބިލުގައި ހިމަނާފައިވެ އެވެ.
އެހެން ނަމަވެސް ކާރު، ޖީޕު އަދި ވޭންގެ ތެރެއިން ބޭނުންކޮށްފައި ހުންނަ އުޅަނދު އެތެރެކުރާ ނަމަ، ޑިއުޓީގެ ގޮތުގަައި 300 ޕަސެންޓު ކަނޑައެޅުމަށް ވެސް ބިލުގައި ވެއެވެ.
ފަސިންޖަރުން އުފުލުމަށް ހާއްސަކޮށް ހަދާފައިި ހުންނަ އެއްގަމުގައި އުޅަނދުގެ ތެރެއިން، ބޭނުންނުކޮށް ހުންނަ އުޅަނދުތަކުން ޑިއުޓީގެ ގޮތުގައި 100 ޕަސެންޓު ނަގަން ހުށަހަޅާފައިވާއިރު، ބޭނުންކޮށްފައިވާ އުޅަނދުތަކުން ޑިއުޓީގެ ގޮތުގައި 150 ޕަސެންޓު ނަގަން ވަނީ ހުށަހަޅާފަ އެވެ.
އޮޓޯ ސައިކަލާއި މޮޓޯ ސައިކަލުން ނަގާ ޑިއުޓީއަށް ބަދަލެއް ގެންނަން ހުށަހަޅާފައެއް ނުވެ އެވެ.
ނުކުޅެދޭ މީހުންނަށް ހާއްސަކޮށް ހަދާފައި ހުންނަ އިންޖީނުލީ ދުއްވާ އެއްޗެހީގެ އިންޖީނާއި އޭގެ ބައިތަކުން ނަގަމުން އަންނަ ފަސް ޕަސެންޓު ޑިއުޓީ ވެސް ކަނޑާލަން ވަނީ ހިމަނައިފަ އެވެ.
މެމްބަރު ވިސާމް ހުށަހެޅުއްވި ބިލުގައި ގިނަ އަދަދެއްގެ ތަކެތިން ޑިއުޓީ ކަނޑާލަން ހުށަހަޅާފައިިވާއިރު، ބައެއް ތަކެތީގެ ޑިއުޓީ ކުޑަކުރުމަށާއި، ބޮޑު ކުރުމަށް ވެސް ހުށަހަޅާފައިވެ އެވެ.