ކުރީގެ ރައީސް އަބްދުﷲ ޔާމީން އަބްދުލް ގައްޔޫމްގެ ސަރުކާރުގައި ހިޔާ މަޝްރޫއުގެ ދަށުން އެޅިފައިވަނީ 6،860 ފްލެޓްކަމަށާއި ނަމަވެސް 11،000 އަށް ވުރެ ގިނަ މީހުންނަށް ފްލެޓް ލިބޭނެކަމުގެ ލިޔުން ހަވާލުކޮށްފައިވާކަމަށް ހައުސިންގް މިނިސްޓްރީން ބުނެފިއެވެ.
މިރޭ ކުރެއްވި ޓްވީޓެއްގައި ހައުސިން މިނިސްޓްރީގެ ޑެޕިއުޓީ މިނިސްޓަރު އަލީ ޝާމިން ވަނީ ހިޔާ މަޝްރޫއުގެ ދަށުން 7000 ފްލެޓް އަޅަން ނިންމައިފައިވީނަމަވެސް އެތަނުގައި ހުރީ ޖުމްލަ 6،860 ފްލެޓްކަމަށް ވިދާޅުވެފައެވެ.
އަދި އެ ފްލެޓްތައް ލިބޭނެކަމުގެ ލިޔުން މިދިޔަ ރިޔާސީ އިންތިޚާބާ ދިމާކޮށް އާ ސަރުކާރު ހުވާކުރުމުގެ ކުރިން 11،000 އެއްހާ މީހަކަށް ހަވާލުކޮށްފައިވާކަމަށް ޝާމިން ވަނީ ވިދާޅުވެފަ އެވެ.
"ހިޔާ މަޝްރޫޢުގަ 7000 ކިޔަސް އެތާ ހުރީ 6860 ފްލެޓް، އިންތިހާބާދިމާކޮށް އަދި އިންތިހާބު ނިމި އާ ސަރުކާރު ހުވާކުރުމާ ދޭތެރޭ 11 ހާހަށްވުރެ ގިނަ މީހުނަށް ފްލެޓް ލިބޭނެ ކަމުގެ ލިޔުން ދީފައިވޭ،" ޝާމިން ވިދާޅުވި އެވެ.
ޝާމިން އިތުރަށް ވިދާޅުވިގޮތުގައި ހިޔާ މަޝްރޫއުގެ ފްލެޓްތަކުގެ އަގު ހަގީގަތުގަައިވެސް ބޮޑެވެ.
"550 އަކަފޫޓުގެ 2 ކޮޓަރި އެޕާޓްމަންޓަކަށް 82398 ޑޮލަރު، މާނައަކީ އަކަފޫޓަކަށް 2300 ރުފިޔާ. އެވެސް އަދި ފިނިޝިން މަސައްކަތް ނުހިމަނާ، މަސައްކަތް ލަސްވަނީ ފިނިޝިންގ މަސައްކަތް ނިންމުމަށް،" ޝާމިން ވިދާޅުވި އެވެ،
ޝާމިން އިތުރަށް ކުރެއްވި ޓްވީޓެއްގައި ވަނީ މިހާރުގެ ސަރުކާރުން މިހާތަނަށް އަޅަން ހަވާލު ކުރި ފްލެޓްތަކުގައި ޖާގަތަނަވަސްވެފައި އަގު ހެޔޮވާނެ ކަމަށެވެ.
"900 އަކަފޫޓްގެ 3 ކޮޓަރީގެ އެޕާޓްމަންޓެއް ހެދުމަށް ހަވާލު ކުރެވިފައިވާނީ 52000 ޑޮލަރަށް މާނައަކީ އަކަފޫޓަކަށް 890 ރުފިޔާ. އިރާދަކުރެއްވިއްޔާ އަގުހެޔޮވެފަ ތަނަވަސްވާނެ،" ޝާމިން ވިދާޅުވިއެވެ.
ފެބްރުއަރީ 23، 2020: ހުޅުމާލޭގައި ހަދަމުންދާ ހިޔާ މަސްރޫއުގެ ފްލެޓްތައް -- ސަން ފޮޓޯ/ ފަޔާޒު މޫސާ
ހިޔާ ފްލެޓްތަކަކީ ކޮތަރު ކޮށިތަކެއްކަމަށް އަދި ދަރަނީގެ ދަންތުރައެއް ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިއްޔެ ވަނީ ވިދާޅުވެފައެވެ.
އަދި ހިޔާ މަޝްރޫއުގެ ފްލެޓްތަކާއި އަޅާބަލާއިރު އެމްޑީޕީ ސަރުކާރުގެ ފްލެޓްތަކުގައި ދަރަނި ބޮޑު ނުވާނޭކަމަށްވެސް ނަޝީދު ވަނީ ވިދާޅުވެފަ އެވެ.
ހިޔާ ފްލެޓްތައް ހަދާފައި ވަނީ އަކަ ފޫޓަކަށް 1900 ރުފިޔާގެ ރޭޓުން ކަމަށާއި، އެހެންކަމުން ކުލީގެ ގޮތުގައި 11،000 ރުފިޔާ ޖެހޭނެ ކަމަށްވެސް ނަޝީދު ވަނީ އިއްޔެ ވިދާޅުވި އެވެ.
ހިޔާ ފްލެޓްތައް އަންނަ ޖުލައި މަހުގެ ނިޔަލަށް ހަވާލުކުރެވޭނެ ކަމަށް ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީގައި ވާހަކަދައްކަވަމުން ހައުސިން މިނިސްޓަރު އާތިފާ ޝަކޫރު ވަނީ ވިދާޅުވެފައެވެ. ނަމަވެސް އޭގެ އެއްދުވަސްފަހުން ހައުސިން މިނިސްޓްރީން ނެރުނު ބަޔާނެއްގައި ވަނީ މިނިސްޓަރު އާތިފާއަށް އެހެން ވިދާޅުވެވުނީ އޮޅުމަކުން ކަމަށެވެ.
ހިޔާ މަޝްރޫއުގެ ދަށުން ދިނުމަށް ނިންމާފައިވާ ފްލެޓްތައް ދޭނެ ފަރާތްތައް ކަނޑައަޅައި ރައީސް ޔާމީންގެ ސަރުކާރުން ވަނީ އެފަރާތްތަކަށް ލިޔުން ހަވާލުކޮށްފައެވެ. ނަމަވެސް ފްލެޓް ދޭނެ ފަރާތްތައް ކަނޑައެޅީ އިންސާފުން ނޫން ކަމަށް ވިދާޅުވެ ރައީސް އިބްރާހިމް މުހައްމަދު ސޯލިހު ވަނީ އެ މައްސަލަ ބެލުމަށް ކޮމިޓީއެއް އެކުލަވާލާފައެވެ. އެ ކޮމިޓީން ވަނީ ފްލެޓް ލިބޭނެ ކަމުގެ ލިޔުން ދީފައިވާ މީހުންގެ ގޭގެއަށް ސާވޭ ޓީމްތައް ފޮނުވައި ދިރިއުޅުމުގެ ހާލަތު ބެލުމުގެ މަސައްކަތް ފަށާފައެވެ. ނަމަވެސް ކޮވިޑް-19އާ ގުޅިގެން އެ މަސައްކަތް އޮތީ ހުއްޓިފައެވެ. ހައުސިން މިނިސްޓްރީން ބުނީ ދެން އެ މައްސައްކަތް އަލުން ފެށޭނީ މާލެ ސަރަހައްދުގެ ލޮކްޑައުން އުވާލުމުން ކަމަށެވެ.
މިއަހަރަށް ރައްޔިތުންގެ މަޖިލިސް ހުޅުވުމަށް ބޭއްވި ޖަލްސާގައި ރިޔާސީ ބަޔާން އިއްވަވަމުން ރައީސް ސޯލިހު ވިދާޅުވީ ހިޔާ މަޝްރޫއުގެ ފްލެޓުތައް އޭގެ ހައްގުވެރިންނާ މިއަހަރު ހަވާލު ކުރައްވާނެ ކަމަށެވެ. އަދި ފްލެޓު ދޭނީ ކުރީ ސަރުކާރުގެ ލިސްޓަށް ކަމަށްވެސް ރައީސް ވަނީ ފަހުން ވިދާޅުވެފަ އެވެ.