މިހާރު ތިބި ކައުންސިލަރުންގެ މުއްދަތު އިތުރުކުރުމަށް ގާނޫނު އަސާސީ އިސްލާހުކުރުމަށް ދިމާވެދާނެ ގާނޫނީ މައްސަލަތަކާ ގުޅޭގޮތުން ސުޕްރީމް ކޯޓުގެ އިސްތިޝާރީ ލަފަޔަކަށް އެދެން މަޖިލީހަށް ގަރާރެއް ހުށަހަޅައިފި އެވެ.
އެ ގަރާރު މަޖިލީހަށް ހުށަހެޅުއްވީ، ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ އެވެ.
ޖޫން މަހުގެ ތިންވަނަ ދުވަހު ކައުންސިލަރުންގެ ދައުރު ހަމަވާއިރު، ދެން އަންނާނެ ގާނޫނީ ހުސްކަން ފޫބެއްދުމަށް އަދި ވަކި ގޮތެއް ނިންމިފައެއް ނުވެ އެވެ.
ކައުންސިލަރުންގެ ދައުރު ދަންމާލަށް ސަރުކާރުގެ ފަރާތުން ގާނޫނު އަސާސީއަށް އިސްލާހު ހުށަހަޅާފައިވީ ނަމަވެސް، އެ މައްސަލައިގައި މަޖިލީހުގެ މެޖޯރިޓީ އޮތް އެމްޑީޕީގެ މެދުގައި ވަނީ ވަރަށް ބޮޑަށް ހިޔާލުތަފާތުވުން އުފެދިފަ އެވެ.
މި މައްސަލައިގައި ރައްޔިތުންގެ މަޖިލީހަށް ބަންޑާރަނައިބު އިބްރާހިމް ރިފްއަތު އަދި ކައުންސެލް ޖެނެރަލް ފާތިމަތު ފިލްޒާ ވެސް ވަނީ ލަފާދެއްވައިފައެވެ. އޭޖީ އަދި ކައުންސެލް ޖެނެރަލް ވެސް ވިދާޅުވެފައި ވަނީ މައްސަލައިގައި އޮތް ހަމައެކަނި ހައްލަކީ ގާނޫނު އަސާސީ އިސްލާހުކުރުން ކަމަށެވެ.
އެހެން ނަމަވެސް ބަންޑާރަނައިބު އަދި ކައުުންްސެލް ޖެނެރަލް ދެއްވި ލަފާ މަޖިލީހުގެ މެމްބަރުންނަށް ގަބޫލުކުރަން ދަތި ކަމަށް މަޖިލީހުގެ ރައީސް، މުހައްމަދު ނަޝީދު ވަނީ މިއަދު ވިދާޅުވެފަ އެވެ.
އެހެންކަމުން މި މައްސަަލައިގައި ސުޕްރީމް ކޯޓުގެ ލަފައެއް ހޯއްދަވާނެ ކަމަށް މިއަދު ވިދާޅުވިއެވެ.
ގާނޫނު އަސާސީގެ 95 ވަނަ މާއްދާގެ ދަށުން ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ހުށަހެޅުއްވި ގަރާރުގައި ވިދާޅުވެފައި ވަނީ އިންތިހާބު ބޭއްވުމަށް ރައްކާތެރި މާހައުލެއް ގާއިމުވެ އާ އިންތިހާބު ބާއްވާ، އެ މެމްބަރުުން އިންތިހާބުވެ މަގާމާ ހަވާލުވުމާ ހަމައަށް ކުރިމަަތިވާ ގާނޫނީ ހުސްކަން ފޫބެއްދުމަށްޓަކައި އޮތް ހަމައެކަނި ގާނޫނީ ހަމައަކީ ގާނޫނު އަސާސީ އިސްލާހުކޮށް މިހާރު އިންތިހާބުކޮށްފައި ތިބި ރަށު ކައުންސިލްތަކާ، އަތޮޅު ކައުންސިލްތަކާ، ސިޓީ ކައުންސިލްތަކުގެ މުއްދަތު އިތުރުކުރުން ކަމަށް ރައްޔިތުންްގެ މަޖިލީހުގެ ހުރިހާ މެމްބަރުުންނަށް އިއްތިފާގު ނުވެވޭ ކަމަށެވެ.
ގާނޫނުއަސާސީގެ 95 ވަނަ މާއްދާގައި ބުނެފައި ވަނީ ގާނޫނުގައި ކަން އޮތްގޮތާ މެދު އުފެދޭ މުހިންމު ސުވާލުތަކާ މެދު ނުވަތަ ގާނޫނީގޮތުން ކަމެއް އޮތްގޮތާމެދު ސުޕްރީމްކޯޓުގެ ލަފައަކަށް އެދި ރައްޔިތުންގެ މަޖިލީހުން ފާސްކުރާ ގަރާރަކުން ސުޕްރީމްކޯޓަށް ހުށަހެޅިދާނެ ކަމަށެވެ.
މިގޮތުން ހުށަހެޅޭ ކަންތައްތަކުގެ ތެރޭގައި ގާނޫނުއަސާސީ މާނަކުރުމުގެ މައްސަލަތަކާއި ވަކި ގާނޫނެއްގެ ސައްހަކަމާ މެދު އުފެދޭ ސުވާލުތައް ހިމެނެ އެވެ.
އެ މާއްދާގައި ބުނެފައި ވަނީ އެފަދަ ކަންކަމަށް ސުޕްރީމްކޯޓުން ދޭ ލަފާ ބިނާކޮށްފައިވާ ސަބަބުތައް ބަޔާންކުރުމާއެކު އެ ލަފާ ސުޕްރީމްކޯޓުން ރައްޔިތުންގެ މަޖިލީހަށް ފޮނުވާންވާނެ ކަމަށެވެ. އަދި އެ ލަފާ އޮންނާންވާނީ އިސްތިއުނާފު ކުރުމަށް ސުޕްރީމްކޯޓަށް ހުށަހެޅޭ މައްސަލަތަކުގައި އެ ކޯޓުން ނެރޭ ހުކުމްތަކާ އެއްފަދައިން ކަމަށް ވެސް އެ މާއްދާގައި ބުނެ އެވެ.
އެހެންކަމުން އިންތިހާބު ބޭއްވުމަށް ރައްކާތެރި މާހައުލެއް ގާއިމުވެ، އެ އިންތިހާބު ބޭއްވުމާ ހަމައަށް ދިމާވާ ގާނޫނީ ހުސްކަން ފޫބެއްދޭނެ ގާނޫނީ ހަމައަކީ ކޮބަައިކަމާއި، އަދި ކައުންސިލަރުން މަގާމުގައި ދެމިތިބޭނެ ކަމަށް ކަނޑައެޅުމުން ކުރިމަތިވެދާނެ ގާނޫނީ މައްސަލައަކާ ގުޅޭގޮތުން ސުޕްރީމް ކޯޓުގެ އިޝްތިހާރީ ލަފައެއް ހޯދުމަށް ގަރާރު ވަނީ ހުށަހަޅައިފައެވެ.
އަބްދުލްޣަފޫރު ވިދާޅުވީ މިކަމުގައި ސުޕްރީމް ކޯޓުގެ ލަފަޔަކަށް ދިއުމުން، މި މައްސަލައިގައި ދައުލަތުގެ ހުރިހާ ފަރާތްތަކާ އެކު މަޝްވަރާކުރެވިގެންދާނެ ކަމަށެވެ.
ގާނޫނު އަސާސީ އިސްލާހުކުރަން އެމްޑީޕީން ރޭ ތުރީލައިން ވިޕެއް ފާސްކޮށްފައި ވީނަމަވެސް، އެމްޑީޕީގެ ގިނަ މެމްބަރުން ވިދާޅުވަނީ ކޮވިޑް19 އާ ގުޅިގެން ގައުމަށް މިހާރު ދިމާވެފައިިވާ ހާލަތަކީ ގާނޫނުއަސާސީއަށް އިސްލާހު ގެންނަން އެކަށީގެންވާ ހާލަތެއް ނޫން ކަމަށެވެ.
އަދި ގާނޫނު އަސާސީ އިސްލާހުނުކޮށް، ކައުންސިލަރުންގެ ދައުުރު ދިގު ކުރުމަށް މެމްބަރު ހަސަން ލަތީފު ވަނީ ހާއްސަ ބިލެއް ވެސް މަޖިލީހަށް ހުށަހަޅުއްވައިފަ އެވެ.
ނަމަވެސް އޭޖީ އާއި ކައުންސެލް ޖެނެރަލްގެ އިތުރުން ގާނޫނީ ގިނަ ބޭފުޅުން ވިދާޅުވަނީ އާންމު ގާނޫނަކުން ގާނޫނު އަސާސީގައި ބަޔާންކޮށްފައިވާ މުއްދަތެއް ބަދަލު ނުކުރެވޭނެ ކަމަށެވެ.