ސައުދީ އަރަބިއާ އިން ރާއްޖެއަށް މިއަހަރުވެސް ކަދުރު ހަދިޔާކޮށްފައިވާ ކަމަށާއި ކަދުރު ބަހާނީ ފަގީރުންނަށް އިސްކަންދީގެން ކަމަށް އިސްލާމިކް މިނިސްޓްރީ އިން ބުނެފިއެވެ.
އެ މިނިސްޓްރީ އިން ބުނީ ރާއްޖޭގެ ރައްޔިތުންނަށް ބެހުމަށް ސައުދީ ސަރުކާރުންދޭ ކަދުރު އެ މިނިސްޓްރީ އަށް ލިބިފައިވާ ކަމަށާއި މާލެ އާއި އަތޮޅުތެރޭގެ ހުރިހާ ރަށެއްގައި އަދި ސިޓީއެއްގައިވެސް ކަދުރު ބަހާނީ މީހުން ދިރިއުޅޭ ގޭބީސީތަކުގެ ތެރެއިން ކަދުރު ބަލާ ހާޒިރުވާ ތަރުތީބުން ކަމަށެވެ
އަދި މިދިޔަ އަހަރު (1440) އިސްލާމިކް މިނިސްޓްރީގެ ފަގީރުންގެ ދަފްތަރުގައި ރެޖިސްޓްރީކޮށްފައިވާ ކޮންމެ ގޭބީސީއަކަށް އެއް ޕަކެޓް ކަދުރު ދޭނެ ކަމަށާއި ފަގީރުންގެ ގޭބީސީތަކަށް ކަދުރު ބެހުމަަށްފަހު ބާކީ ކަދުރު ބަހާނީ އެންމެ ފުރަތަމަ ކަދުރު ބަލައި އަންނަ ފަރާތްތަކަށް އިސްކަންދޭ އުސޫލުން ކަމަށް އިސްލާމިކް މިނިސްޓްރީ އިން ބުންޏެވެ.
އެގޮތުންވެސް ކޮންމެ ގޭބީސީ އަކަށް ބަހާނީ އެއް ޕަކެޓު ކަދުރު ކަމަށާއި ސައުދީ އިން މިއަހަރު ހަދިޔާކުރ ކަދުރު ފަގީރުންގެ ގޭބީސީތަކަށް ބެހުމަށްފަހު، ކޮންމެ 100 ގޭބީސީ އަކަށް ޖެހެނީ 33 ޕެކެޓު ކަދުރު ކަމަށްވެސް އިސްލާމިކް މިނިސްޓްރީ އިން ބުންޏެވެ.
ކަދުރު ބަހާނީ އައިޑީކާޑާއެކު ކަދުރު ބަލައި ދިޔުމުންނެވެ. އެ މިނިސްޓްރީ އިން އެދިފައިވަނީ ކަދުރު ބަހާއިރު ފަގީރުންނަށް އިސްކަން ދީގެން ކަދުރު ބެހުމަށެވެ.
މާލެ އާއި ިލިމާލޭގައި ކަދުރު ބަހާނީ ސިޓީ ކައުންސިލުން ކަމަށާއި ހުޅުމާލޭގައިި އެޗްޑީސީ މެދުވެރިކޮށް ކަދުރު ބަހަން ނިންމާފައިވާ ކަމަށް މިނިސްޓްރީ އިން ބުންޏެވެ. އެ އިންތިޒާމު ހަމަޖެހުމުން އިއުލާނު ކުރާނެ ކަމަށާއި ރަށްރަށުގައި އަދި އަތޮޅުތަކުގައި ކަދުރު ބަހާނީ ރަށުކައުންސިލުތަކާއި ސިޓީ ކައުންސިލް އަދި އަތޮޅު ކައުންސިލްތައް މެދުވެރިކޮށް ކަމަށް އިސްލާމިކް މިނިސްޓްރީ އިން ބުންޏެވެ.
އެ މިނިސްޓްރީ އިން ވަނީ ކައުންސިލްތަކުގެ ފަރާތުން ކަދުރާ ހަވާލުވާނެ މީހުން ރަމަޟާން މަހުގެ ހެނދުނު 9:30 އާއި 17:00 އާއި ދެމެދު އެ މިނިސްޓްރީ އަށް ގޮސް ކަދުރާ ހަވާލުވާން އެދިފައެވެ.
މިއަދުން ފެށިގެން ލިބިފައިވާ ކަދުރު ހުސްވަަންދެން ބަހާނެ ކަމަށް މިނިސްޓްރީ އިން ބުންޏެވެ.