ރާއްޖޭގައި ފުރަތަމަ ފަހަރަށް އިމާމުންނާއި މުދިމުންގެ ސުލޫކީ މިންގަނޑު ބަހައްޓަންވީ ގޮތުގެ އުސޫލެއް އެކުލާވަލައި، މިއަދު އަމަލުކުރަން ފަށައިފިއެވެ.
އުސޫލުގައި ބުނެފައިވާ ގޮތުން، އުސޫލު އެކުލަވާލީ ހަ މަގުސަދެއް ހާސިލްކުރުމަށެވެ. އެއީ، މިސްކިތްތަކުގައި މަސައްކަތްކުރާ އިމާމުންނާއި މުދިމުންނަކީ އިސްލާމްދީނާއި ރައްޖޭގެ ގާނޫނު އަސާސީއާއި ގަވައިދުތަކާއި އާންމު އިޖުތިމާއީ މިންގަނޑުތަކާ އެއްގޮތަށް އަމަލުކުރާ ބައެއް ކަން ކަށަވަރު ކުރުމަށާއި އެ ފަރާތްތަކަކީ ދީނީ އެއްބައިވަންތަކަމާއި ގައުމީ ވަޙްދަތު ދެމެހެއްޓުމަށް މަސައްކަތް ކުރާ ބަޔަކަށް ހެދުމަށެވެ.
ހަމައެއާއެކު އިމާމުންނާއި މުދިމުން އެމީހުންގެ ވަޒީފާގެ ޒިންމާތަކަށް ރައްކާތެރިކުރުމަށާއި ވަޒީފާއަށް ޙުރުމަތްތެރިކޮށް ހިތުމަށް ބާރުއެޅުމުގެ އިތުރުން އެ ފަރާތްތަކުގެ މަސައްކަތުގެ ދާއިރާގައި އަމަލުކުރާނެ އެއް މިންގަނޑެއް ކަނޑައެޅުން މަގުސަދުތަކުގެ ތެރޭގައި ހިމެނެއެވެ.
އޭގެއިތުރުން، މިސްކިތްތަކުގެ އިމާމުންނަކީ އަޚުލާގީ ސިފަތައް ހިފަހައްޓާ ނަމޫނާ ބަޔަކަށް ހެދުމުގެ އިތުރުން މުޖުތަމައު ބަލައިގަންނަ އާންމުން އިތުބާރު ކުރާ ބަޔަކަށް ހެދުން ކަމަށް އުސޫލުގައި ބުނެފައިވެއެވެ.
އިސްލާމިކް މިނިސްޓްރީން އާންމުކުރި މި އުސޫލުގައި ވަނީ އިމާމުންނާއި މުދިމުންގެ އަމަލުތައް ބަހައްޓަންވީ ގޮތް ވަރަށް ތަފުސީލުކޮށް ކިޔައިދީފައެވެ. އޭގެތެރޭގައި، އެމީހުންގެ ހެދުން ބަހައްޓަންވީ ގޮތާއި މިސްކިތުގައި ހިނގާ ނޭދެވޭ ކަންކަން ހުއްޓުވަން އަމަލުކުރަންވީ ގޮތާއި އަޅުކަމާ ގުޅުން ހުރި ކަންކަމުގައި އަމަލުކުރަން ވީ ގޮތް ހިމެނެއެވެ.
އިސްލާމިކް މިނިސްޓްރީން ބުނި ގޮތުގައި، އެ އުސޫލާ ޚިލާފުވާ ފަރާތްތަކަށް ފިޔަވަޅު އަޅާނެއެވެ. މިގޮތުން، އުސޫލާ ޚިލާފުވާ ކަމެއް ކޮށްގެން އިމާމެއްގެ ޝަކުވާ ހުށަހަޅައިގެން ނުވަތަ އަޚްލާގީ މިންގަނޑާ ޚިލާފު ކަމެއް މިނިސްޓްރީއަށް ފާހަގަވެގެން އެކަމެއް ތަހުގީގުކުރުމަށް ފަހުގައި ސިވިލް ސާވިސްގެ ގަވައިދުގެ ދަށުން ފިޔަވަޅު އެޅުމުގެ އިޚްތިޔާރު އިސްލާމިކް މިނިސްޓްރީއަށް ލިބިގެންވާ ކަމަށް އުސޫލުގައިވެއެވެ.
މައްސަލައިގެ ހާލަތަށް ރިއާޔަތްކުރުމަށް ފަހުގައި ސިވިލް ސާވިސްގެ ގަވައިދުގެ ދަށުން އިމާމުވެ ނަމާދުކުރުމުން ދުރުކުރުމުގެ ހުއްދަ ވެސް މިނިސްޓްރީއަށް ވަނީ ދީފައެވެ.