ތާޒާ ފެނަށް ލިބޭ އޯޑަރުތައް ގިނަވެ، ބާރުބޮޑުވުމުން، ހަމައެކަނި ފިހާރަތަކާއި އޮޑިފަހަރަށް ޑެލިވަރީ ކޮށްދޭން އައިލެންޑް ބެވަރެޖަސް މޯލްޑިވްސް (އައިބީއެމް)އިން ނިންމައިފި އެވެ.
އައިބީއެމްއިން ބުނީ ކޮވިޑް19އާ ގުޅިގެން މާލެ ސަރަހައްދަށް ދިމާވެފައިވާ ހާލަތުގައި ތާޒާ ފެން ގަންނަން އާދަޔާ ހިލާފަށް ގިނަ އޯޑަރުތައް ލިބިފައިވާ ކަމަށާއި ވަކިވަކި ގޭގެއަށް ފެން ގެންގޮސްދިނުމުގައި ބޮޑެތި ގޮންޖެހުންތަކެއް ކުރިމަތިވަމުންދާ ކަމަށެވެ.
"ނަމަވެސް މާލެ ސަރަހައްދާއި ރާއްޖޭގެ އެހެނިހެން ސަރަހައްދުތަކުން ދަތިނުވެ، ތާޒާ ފެން ލިބޭނެ އިންތިޒާމު ހަމަޖެއްސުމުގެ ގޮތުން މާލެ ސަރަހައްދުގެ ފިހާރަތަކަށާއި ރަށްރަށުން އަންނަ ފަޅު އޮޑިފަހަރަށް މިކުންފުނިން ފޯރުކޮށްދެވުނު އެންމެ ގިނަ އަދަދަކަށް ފެން ފޯރުކޮށްދޭނަން." އައިބީއެމްއިން ބުނެ އެވެ.
އެހެންކަމުން ތާޒާ ފެން ގަތުމުގެ ކަންކަން ފިހާރަތަކަށް ގުޅައިގެން ކުރިއަށް ގެންދިއުމަށާއި ކުންފުނީގެ ކަސްޓަމަރުންގެ ގޮތުގައި ރަޖިސްޓްރީ ކުރަން ބޭނުންވާ ފިހާރަތަކުން އެކުންފުނީގެ ވެބްސައިޓް މެދުވެރިކޮށް އޯޑަރު ދިނުމަށް އެކުންފުނިން އެދެ އެވެ.
މާލެ ސަރަހައްދުގެ އިތުރުން އައިބީއެމްއިން މިހާރު ވެސް ދަނީ އަތޮޅުތަކަށް ފެން ކޭސް ފޮނުވައިދިނުމުގެ މަސައްކަތް ކުރަމުންނެވެ.
މާލެ ސަރަހައްދުގައި ފެން ޑެލިވަރީ ކޮށްދިނުމުގައި މަސައްކަތުގައި އައިބީއެމްގެ 100އެއްހާ މުވައްޒަފުން ހަރަކާތްތެރިވެ އެވެ. އޭގެ ތެރޭގައި އެކުންފުންޏާއި އެމްޑަބްލިއުއެސްސީގެ މެނޭޖިން ޑިރެކްޓަރުން ވެސް ހިމެނެ އެވެ.
ތާޒާ ފެން ޑެލިވަރީ ކުރުމުގެ މަސައްކަތުގައި އައިލެންޑް ބެވަރޭޖަސްގެ އެމްޑީ އިބްރާހިމް އަންވަރު ބައިވެރިވެވަޑައިގަންނަވަނީ-- ފޮޓޯ/އައިބީއެމް
ނަމަވެސް ޑިމާންޑު ބޮޑުވެ، އޯޑަރުތައް ގިނަވުމުން އެ މަސައްކަތުގައި ފުލުހުންގެ އެހީތެރިކަން ވެސް އައިބީއެމްއިން ވަނީ ހޯދާފަ އެވެ.
ކުރިން ހަމައެކަނި ވައިބާއިން އޯޑަރު ނެގި ނަމަވެސް، ވައިބާއަށް ވެސް ބާރުބޮޑުވުމުން ފެން އޯޑަރު ކުރަން އޮންލައިން ފޯމެއް ވެސް އައިބީއެމްއިން ތައާރަފުކުރި އެވެ.