ތާޒާ ފެނަށް ޑިމާންޑް ބޮޑުވެ އެ ފެން ބޭނުންވާ ފަރާތްތަކަށް ޑެލިވަރީ ކޮށް ދިނުމަށް އެމްޑަބްލިއުއެސްސީގެ ސަބްސިޑަރީ ކުންފުނި، އައިލެންޑް ބެވަރޭޖަސް މޯލްޑިވްސްއާ އެކު ފުލުހުން ނިކުމެއްޖެ އެވެ.
ތާޒާ ފެނަށް ޑިމާންޑް ބޮޑުވެފައިމިވަނީ 14 ދުވަހަށް މާލެ ލޮކްޑައުން ކުރުމާ ގުޅިގެން ފިހާރަތައް ބަންދުކޮށް މީހުން ކާބޯތަކެއްޗާއި ފެން ހޯދުމަށް އަވަސްވެ ގަތުމުންނެވެ.
އައިލެންޑް ބެވަރޭޖަސްގެ އެމްޑީ އިބްރާހިމް އަންވަރު 'ސަން' އަށް ވިދާޅުވީ، އެހެން ދުވަސްތަކާ އަޅާ ބަލާއިރު މިދުވަސްކޮޅު ތާޒާފެނަށް ގޭބިސީތަކުން އޯޑަރު ކޮށްފައިވާ ނިސްބަތް 20 ޕަސެންޓް އިތުރުވެފައިވާ ކަމަށެވެ.
އެއާ އެކު ފުލުހުންގެ އެހީތެރިކަމަށް އެދުނުތާ ކުޑަ ވަގުތުކޮޅެއްގެ ތެރޭގައި ފުލުހުންގެ ޓީމެއް ވެހިކަލްތަކާ އެކު އައިސްފައިވާ ކަން އިބްރާހިމް އަންވަރު ފާހަގަކުރެއްވި އެވެ.
އައިލެންޑް ބެވަރޭޖަސްގެ މުވައްޒަފުންގެ ޓީމާ ފުލުހުން ގުޅުމުން ޑެލިވަރީތަކުގެ 15-20 ޕަސެންޓް ނިންމާލެވިފައިވާ ކަމަށް އިބްރާހިމް އަންވަރު ވިދާޅުވި އެވެ.
ލޮކްޑައުންގެ މި ދަނޑިވަޅުގައި ވެސް ރައްޔިތުން ބޭނުންވާ ވަރަށް ފެން އުފެއްދޭނެ ކަން އިބްރާހިމް އަންވަރު ފާހަގަކުރެއްވި އެވެ. އަދި ކުރިއަށް އޮތް ހަ މަސް ދުވަހު ފެން އުފެއްދުމަށް ބޭނުންވާ ރޯ މެޓްރީއަލް ހުރި ކަމަށް ވިދާޅުވި އެވެ.