ތާޒާ ފެން ހޯދަން ވައިބާ މެދުވެރިކޮށް ކުރާ އޯޑަރުތައް ގިނަވުމުން އެކަމަށް ހާއްސަ އޮންލައިން ފޯމެއް އައިލެންޑް ބެވަރެޖަސްއިން ތައާރަފުކޮށްފި އެވެ.
އައިލެންޑް ބެވަރޭޖަސް މޯލްޑިވްސްގެ މެނޭޖިން ޑިރެކްޓަރު އިބްރާހިމް އަންވަރު "ސަން"އަށް ވިދާޅުވީ ލޮކްޑައުންއާ ގުޅިގެން ގޭބިސީތަކުން ތާޒާ ފެނަށް ފޮނުވާ އޯޑަރު އާންމު ހާލަތާ އަޅާބަލާއިރު 10 ގުނަ އިތުރުވެފައިވާ ކަމަށެވެ.
"ވައިބާއިން ވެސް އޯޑަރު ނެގޭނެ. ބޮޑަށް ރިކޮމެންޑް ކުރާނީ އަޅުގަނޑުމެންގެ ސޯޝަލް މީޑިއާ ޕްލެޓްފޯމުތަކުގައި ހިއްސާކޮށްފައިވާނެ ފޯމެއް. އެ ލިންކު މެދުވެރިކޮށް އޯޑަރު ކުރުމުން، އޯޑަރު ލިބޭ ތަރުތީބަކުން އެޓެންޑް ވާނަން." އަންވަރު ވިދާޅުވި އެވެ.
އެ ފޯމުގައި ހިމަނަން ޖެހެނީ އެޑްރެސް، ފްލޯ ނަންބަރު (ލޮކްޑައުންގައި ހަމައެކަނި ގްރައުންޑް ފްލޯއަށް)، މަގު، އަވަށް، ގުޅޭނެ ދެ ފޯނު ނަންބަރެއްގެ އިތުރުން ފައިސާ ދައްކާ ގޮތް (ކޭޝް ނުވަތަ އެކައުންޓް ޓްރާންސްފާ) އެވެ.
އަންވަރު ވިދާޅުވީ ވައިބާއަށް ބާރުބޮޑުވީ ކުއްލިއަކަށް ލޮކްޑައުން ކުރުމުން ދިމާވި ކުދިކުދި ދަތިތަކެއްގެ ސަބަބުން ކަމަށާއި ނަމަވެސް އެކަންކަން މިހާރު ހައްލުކޮށްފައިވާނެ ކަމަށެވެ.
"ލޮކްޑައުން އައީ ކުއްލިއަކަށް. ކަމާބެހޭ ފަރާތްތަކުން އަޅުގަނޑުމެންނަށް ވެސް ލިމިޓެޑް މިންވަރަކަށް ވެހިކަލް އޮޕަރޭޓް ކުރުމަށް ހުއްދަ ދީފައި ވަނީ. އިތުރަށް ޕާމިޓްސްތައް ހޯދަން އިއްޔެއިން ފެށިގެން ކުރި މަސައްކަތުން މިހާރު ހަމައަކަށް އެޅިފައި ހުރީ. އެކަންކަން ކުރިން ހަމަޖެހުނު ނަމަ، މިއަދު ވެސް ވަރަށް ބޮޑު ބައެއް ކްލިއާ ކޮށްލެވޭނެ،" އަންވަރު ވިދާޅުވި އެވެ.
އާންމު ހާލަތުގައި ތާޒާ ފެން ހުކުރު ދުވަސްތަކުގައި ޑެލިވަރީ ނުކޮށްދިން ނަމަވެސް، ލޮކްޑައުންގެ ހާލަތުގައި ހުކުރު ދުވަހު ވެސް އެ ހިދުމަތް ފޯރުކޮށްދޭނެ ކަމަށް އަންވަރު ވިދާޅުވި އެވެ.
"މާދަމާ ހެނދުނުން ފެށިގެން އަޅުގަނޑުމެންގެ މަސައްކަތް ފަށާނެ. ޑެލިވަރީ ފަށާނީ މެންދުރު 2:00 ޖަހާއިރު،" އަންވަރު ވިދާޅުވި އެވެ.
އަންވަރު ވިދާޅުވީ ފެން ކޭސް ޑެލިވަރީ ކޮށްދެނީ ކޮންމެ ގޭބިސީއަކަށް މަދުވެގެން ފަސް ކޭހުގެ ރޭޓުން ކަމަށެވެ.
ތާޒާ ފެން އޯޑަރު ކުރަން ތައާރަފުކުރި ފޯމު އެކުންފުނީގެ ވެބްސައިޓުގެ އިތުރުން ފޭސްބުކް ޕޭޖު އަދި ޓުވިޓާ މެދުވެރިކޮށް ވެސް ފުރިހަމަ ކޮށްލެވޭނެ އެވެ. ނުވަތަ ހޮޓްލައިން ނަންބަރު 9885544 އަށް ގުޅައިގެން ވެސް ތާޒާ ފެނަށް އޯޑަރު ކުރެވޭނެ އެވެ.