ކޮރޯނާވައިރަހުގެ ބަލިމަޑުކަމާ ގުޅިގެން ރާއްޖެ ގެންނަން ނިންމާފައިވާ ގިނަ އަަދަދެއްގެ ވެންޓިލޭޓަރުތަކުގެ މައްސަލައިގައި ރައްޔިތުންގެ މަޖިލީހުން ހެލްތް މިނިސްޓަރު އަމީންއާ ގިނަ ސުވާލުތަކެއް ކުރުމަށް ހުށަހަޅައިފި އެވެ.
ސުވާލުތައް ކުރުމަށް ހުށަހެޅީ މައްޗަންގޮޅި ދެކުނު ދާއިރާގެ މެމްބަރު އަހްމަދު ހައިތަމް އެވެ. މި ސުވާލުތަކުގެ ޖަވާބު އަމީންގެ އަރިހުން ހޯއްދެވުމަށް އޭނާ މަޖިލީހުގެ ރައީސްގެ އަރިހުން އެދިވަޑައިގެން ހުށަހެޅުއްވީ އިއްޔެ އެވެ.
އެނާ ހުށަހެޅުއްވި ހުރިހާ ސުވާލެއް ބިނާކޮށްފައިވަނީ ކޮރޯނާވައިރަހުގެ ބަލި މީހުންނަށް ފަރިވާދިނުމަށް ސަރުކާރުގެ ފަރާތުން ރާއްޖެއިން ބޭރުން ގެންނަން ނިންމާފައިވާ ވެންޓިލޭޓަރުތަކާ ގުޅޭ ގޮތުންނެވެ.
އެގޮތުން އޭނާ ވަނީ ޖުމްލަ 10 ސުވާލެއްގެ ޖަވާބު އަމީންގެ އަރިހުން ސާފު ކުރުމަށް އެދިވަޑައިގެންފަ އެވެ.
ސުވާލުތައް:
- ރާއްޖެއަށް ވެންޓިލޭޓަރު ގެނައުމަށް މަސަައްކަތް އެބަ ކުރިއަށްދޭތޯ؟
- ވެންޓިލޭޓަރު ގެނައުމަށް ކުރިއަށް ގެންދަވާ ޕްރިސެސް އަކީ ކޮބާތޯ؟
- މިހާރު އެކަން ވަކި ގޮތަކަށް ނިމިފައިވާނަމަ، އެކަން ކުރިއަށް ގެންދެވީ ކޮން ޕްރޮސެސްއެއްގެ ދަށުންތޯ؟
- ބިޑް ކުރެވިގެންތޯ ކުރިއަށް ގެންދެވީ؟
- ބިޑް ކުރި ނަމަ، އެ ބިޑަށް ކިތައް ފަރާތަކުން ކުރިމަތިލިތޯ؟
- ބިޑް ކުރި ނަމަ، ބިޑް ކާމިޔާބު ކުރެއްވީ ކޮން ފަރާތަކުންތޯ؟
- ޑެލިވަރީގެ މުއްދަތަކީ ކޮބާތޯ؟
- ވެންޓިލޭޓަރުތައް ރާއްޖެ ލިބިފައި ނުވަނީ ކީއްވެގެންތޯ؟
- ވެންޓިލޭޓަރުތައް ރާއްޖެ ލިބޭވަރުވާނީ ކިހާތާކުތޯ؟
- މިކަމާ ގުޅޭ އެންމެ ފަހުގެ ހަބަރަކީ ކޮބާތޯ؟
ސަރުކާރުން މީގެ ކުރިން ބުނެފައިވާ ގޮތުގައި އަމާޒަކީ 200 ވެންޓިލޭޓަރުގެ ސެޓަޕެއް ރާއްޖޭގައި ގާއިމުކުރުން ކަމަށާއި މިހާރުވެސް ރާއްޖެއިން ބޭރުން 70 ވެންޓިލޭޓަރު ގެނައުމުގެ މަސައްކަތް ކުރަމުންދާ ކަމަށެވެ. އަދި އެ އެއްޗެހި ލިބޭނެ ކަމުގެ ޔަގީންކަން ލިބިފައިވާ ކަމަށާއި ބައިނަލްއަގުވާމީ ދަތުރުފަތުރުގެ ރެސްޓްރިކްޝަންތަކާއެކު އެ އެއްޗެހި ގެނައުން ލަސްވެފައިވާ ކަމަވެސް ސަރުކާރުން ވަނީ ބުނެފަ އެވެ.
ބޭރުން ގެންނަ 70 ވެންޓިލޭޓަރަކީ ބޭރުގެ ހިލޭ އެހީކަމެއް ނުވަތަ ބިޑް ކޮށްގެން ބަޔާކާ ހަވާލުކޮށްގެން ގެންނަ އެއްޗެއް ކަމެއް އަދި ކަށަވަރެއް ނޫނެވެ.
ކޮވިޑް-19 ފެތުރި ގިނަ އަދަދެއްގެ މީހުންނަށް އެއްފަަހަރާ ފަރުވާދޭން ޖެހިއްޖެ ހާލަތަކަށް ތައްޔާރުވުމުގެ ގޮތުން "ހުޅުމާލެ މެޑިކަލް ފެސިލިޓީ" ގެ ނަމުގައި 300 އެނދުގެ ފެސިލިޓީއެއް ހެދުމުގެ މަސައްކަތް އަންނަނީ ކުރަމުންނެވެ. އެ މަސައްކަތަށް 40 މިލިއަން ރުފިޔާ ހަރަދުކުރެ އެވެ.
ވެންޓިލޭޓަރާ ގުޅޭގޮތުން ގިނަ ސުވާލުތަކެއް މިނިސްޓަރު އަމީންއާ ކުރިމަތިކޮށްފައިވާއިރު، އެކަމުގައި ކޮރަޕްޝަނަށް މަގުވަހިވާ ގޮތަށް ކަންތައްތަކެއް ކޮށްފައިވާކަމަށް ބައެއް ފަރާތްތަކުން ދަނީ ތުހުމަތު ކުރަމުންނެވެ.