ކޮވިޑް-19 ފަދަ ގައިން ގަޔަށް އަރާ ބައްޔެއް ހުރެގެން އެކަހެރިކޮށްފައި ނުވަތަ ކަރަންޓީނުކޮށްފައި ހުރި މީހަކު އެންގުމާ ހިލާފަށް އާންމުންގެ ތެރެއަށް ނުކުތުމަކީ ޖިނާއީ ކުށެއް ކަމަށް ޕްރޮސެކިއުޓާ ޖެނެރަލް ހުސެއިން ޝަމީމް ވިދާޅުވެއްޖެ އެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ވައިރަސް ރާއްޖެއިންވެސް ފެނިފައިވާއިރު، ރައްކާތެރިކަމުގެ ފިޔަވަޅެއްގެ ގޮތުން އެ ބަލި ފެނިފައިވާ މީހުންނާއި އެ ބައްޔަށް ޝައްކު ކުރެވޭ މީހުން އެކަހެރިކުރުމާއި ކަރަންޓީނު ކުރުން ކުރިއަށް އެބަދެއެވެ.
އެކަހެރިކޮށްފައި ނުވަތަ ކަރަންޓީނުކޮށްފައި ތިބޭ މީހުން އާންމުންގެ ތެރެއަށް ނުކުމެދާނެތީ އެ މީހުން ގާނޫނުގެ ބާރުގެ ބޭނުންކޮށްގެން ކަަރަންޓީނުގައި ނުވަތަ އެކަހެރިކޮށްފައި ބޭތިއްބިދާނެތޯ އާންމުންގެ މީހަކު ކުރި ސުވާލަކަށް ޖަވާބުދެއްވަމުން ޕީޖީ ވިދާޅުވީ، ބައްޔެއް ފެތުރިދާނެތީ ކަރަންޓީނުކޮށްފައި ތިބޭ މީހުން އާންމުންގެ ތެރެއަށް ނުކުތުމަކީ ކުށެއް ކަމަށެވެ.
ޕީޖީ ވިދާޅުވީ، މީހަކު ފަރުވާލެއްނެތި ކުރާ އަމަލެއްގެ ސަބަބުން، އެހެން މީހަކަށް، އޭނާ މަރުވެދާނެކަމުގެ ނުވަތަ އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވައިފިނަަމަ، އެ އަމަލު ހިންގި މީހާ އެކުރަނީ ކުށެއް ކަމަށް ގާނޫނުލްއުގޫބާތުގައިވާ ކަމަށެވެ.
އަދި އެ އަމަލު ކުރީ އިންސާނެއްގެ ފުރާނައަށް އެއްވެސް ފަރުވާލެއް ނެތް ގޮތުގައި ކަމަށް ރަމްޒުކޮށްދޭ ހާލަތެއްގައި އެ ކުށަކީ ޖުނަހުގެ ހަތަރުވަނަ ދަރަޖައިގެ ކުށެއް ކަމަށް ޕީޖީ ވިދާޅުވިއެވެ.
ޖިނާއަތުގެ ހަތަރު ވަނަ ދަރަޖައިގެ ކުށުގެ އަސާސީ މިންގަނޑަކީ އެއް އަހަރާއި ހަތް މަހާއި ހަ ދުވަހަށް ޖަލަށް ލުމެވެ. އެންމެ ބޮޑުވެގެން ދެވޭނީ ހަތަރު އަހަރުގެ ޖަލު ހުކުމެކެވެ.
މިސާލަހަށް މީހަކު ކަރަންޓީނުކޮށްފައި ހުއްޓާ ހޮޓަލަކަށް ކޮފީއަކަށް ގޮސްފި ނަމަ އެ ކުރެވެނީ ޖުނަހުގެ ހަތަރު ވަނަ ދަރަޖައިގެ ކުށެއްކަމަށްވެސް ޕީޖީ ވިދާޅުވިއެވެ.