ކޮރޮނާވައިރަސް ނުވަތަ ކޮވިޑް-19ގެ ނުރައްކާ ދެކުނު އޭޝިއާގެ ގައުމުތަކަށް އައިސްފައިވާއިރު، އެ ވައިރަހާ ދެކޮޅަށް މަސައްކަތްކުރުމަށް ސާކް ގައުމުތަކުގެ ވެރިންގެ މަޝްވަރާއަށް އިންޑިއާގެ ބޮޑު ވަޒީރު ނަރެންދުރަ މޯދީ ދައުވަތު ދެއްވައިފިއެވެ.
އިންޑިއާއާއި ޕާކިސްތާނުގެ ނުތަނަވަސްކަމާއެކު، ދެކުނު އޭޝިއާގެ އަށް ގައުމު ހިމެނޭ ސާކް ޖަމިއްޔާގެ ހަރަކާތްތައް ވަނީ ހުއްޓުން އަރާފައެވެ. ދެހާސް ސޯޅަވަނަ އަހަރު ކަޝްމީރުގައި އިންޑިއާ ސިފައިންނަށް އަމާޒުކޮށް ޕާކިސްތާނުގެ ޖައިޝޭ މުހައްމަދު ޖަމާއަތުން ދިން ހަމަލާތަކަކާ ގުޅިގެން، އިންޑިއާ ހިމެނޭގޮތަށް ސާކްގެ ހަ ގައުމަކުން އެ އަހަރުގެ ސާކް ސަމިޓުގައި ބައިވެރިނުވާނެކަމަށް ނިންމިއެވެ. ޕާކިސްތާނުގައި ބާއްވަން އޮތް އެ ސަމިޓު އެންމެ ފަހުން ކެންސަލްކުރީއެވެ.
މޯދީ މިއަދު ކުރެއްވި ޓްވީޓެއްގައި ވިދާޅުވީ، އެ ވައިރަހާ ގުޅިގެން ރަނގަޅު ސްޓްރެޓެޖީއަކަށް ސާކްގެ ގައުމުތަކުން މަސައްކަތް ކުރުމަށް އޭނާ ހުށަހަޅުއްވާ ކަމަށެވެ. އެގޮތުން ވީޑިއޯ ކޮންފަރެންސް މެދުވެރިކޮށް ރައްޔިތުންގެ ސަލާމަތާއި ރައްކާތެރިކަމަށްޓަކައި މަޝްވަރާ ކުރެވިދާނެ ކަމަށް ވެސް އޭނާ ހިޔާލުދެއްވިއެވެ.
"ސިއްހަތު ރަނގަޅު ދުނިޔެއަކަށްޓަކައި އަހަރެމެން ގުޅިގެން އެކުގައި ކުރާ މަސައްކަތުން މުޅި ދުނިޔެއަށް ނަމޫނާ ދެއްކިދާނެ،" މޯދީ ވިދާޅުވިއެވެ.
މޯދީ ކުރެއްވި އިތުރު ޓްވީޓެއްގައި ވިދާޅުވީ، ދުނިޔޭގެ ނިސްބަތުން ގިނަ އަދަދެއްގެ މީހުން ދިރިއުޅެމުން އަންނަ ދެކުނު އޭޝިއާގައި، އެ މީހުންގެ ސަލާމަތާއި ރައްކާތެރިކަން ކަށަވަރުކުރުމަށް ނުފޮރުޅާ އެންމެ ގަލެއްވެސް ބާވައިގެން ނުވާނެ ކަމަށެވެ.
ދެކުނު އޭޝިއާގެ ގައުމުތަކުގެތެރެއިން އެންމެ ގިނައިން މީހުން ކޮރޯނާ ވައިރަހަށް ޕޮޒިިވްވެފައިވަނީ އިންޑިއާއެވެ. އެގައުމުން 75 މީހަށްކަށް ވައިރަސް ޕޮޒިޓިވް ވެފައިވާއިރު، ތިން މީހަކު ރަނގަޅުވެ، އެކަކު ވަނީ މަރުވެފައެވެ. ޕާކިސްތާނުންގައި 20 މީހަކަށް ވަނީ ވައިރަސް ޖެހިފައެވެ. އަފްގާނިސްތާނުގައި ފަސް މީހުން ވައިރަސް ޖެހުނު އިރު، ބަންގްލަދޭޝަންގައި ތިން މީހަކު ވަނީ ވައިރަސް ޖެހިފައެވެ. ނޭޕާލް އަދި ބޫޓާނުން އަދި މިހާތަނަށް ފެނުނީ އެއް ކޭސްއެވެ. ރާއްޖެއިން މިހާތަނަށް އަށް މީހަކު ވަނީ ވައިރަހަށް ޕޮޒިޓިވްވެފައެވެ.
މިހާތަނަށް ކޮރޯނާ ވައިރަސް 125 ގައުމަކުން ފެނިފައިވާ އިރު، އެ ބައްޔަށް 134,930 މީހުން ވަނީ ޕޮޒިޓިވް ވެފަ އެވެ. ބަލި ރަނގަޅުވި މީހުންގެ އަދަދު 70,396 އަށް އަރާއިރު، މަރުވި މީހުންގެ އަދަދަކީ، 4,990 އެވެ.
ދުނިޔޭގެ ސިއްހަތު ޖަމިއްޔާ ޑަބްލިއުއެޗްއޯ އިން ރޭ ވަނީ ކޮވިޑް-19 އަކީ "ޕެންޑަމިކް" ނުވަތަ މުޅި ދުނިޔެއަށް ފެތުރިފައިވާ ބައްޔެއްގެ ގޮތުގައި ކަނޑައަޅާފައެވެ. މިއީ ކޮރޯނާ ވައިރަސްއަކާ ގުޅިގެން "ޕެންޑަމިކް" ކަނޑައެޅި ފުރަތަމަ ފަހަރެވެ.