ސަމާ އައިލެންޑުގައި ޗުއްޓީ ހޭދަކުރަމުން އައި ދެ ފަތުރުވެރިންގެ އިތުރުން އެ ރިސޯޓުގައި މަސައްކަތް ކުރަމުން އަންނަ އިންޑިއާގެ ޑޮކްޓަރު ވެސް ކޮވިޑް19 އަށް ޝައްކު ކުރެވިގެން ފަރުކޮޅުފުއްޓަށް ގެންދަން މަސައްކަތް ކުރަމުން އަންނަ ކަމަށް އެ ރިސޯޓުން ބުނެފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު ބުނީ ކޮވިޑް19 އަށް ޝައްކު ކުރެވޭ އަލާމާތްތައް ފެނިފައިވާ އެ ރިސޯޓުގައި ޗުއްޓީ ހޭދަކުރަމުން ދިޔަ ފްރާންސްގެ ދެ ފަތުރުވެރިންގެ ފަރާތުން ކަމަށެވެ.
ނަމަވެސް އެ ރިސޯޓުން ނެރުނު ބަޔާނެއްގައި ބުނެފައި ވަނީ ދެ ޓޫރިސްޓުންގެ އިތުރުން އެ ރިސޯޓުގައި މަސައްކަތް ކުރާ ޑޮކްޓަރުގެ ފަރާތުން ވެސް ބަލީގެ އަލާމާތްތައް ފެނިފައިވާ ކަމަށެވެ. ޝައްކުވެގެން ބަލަމުން އަންނަ ޑޮކްޓަރަކީ އުމުރުން 33 އަހަރުގެ އިންޑިއާ ރައްޔިތެކެވެ.
އެ ބަޔާނުގައި ބުނެފައި ވަނީ ކޮވިޑް އަށް ޝައްކު ކުރެވޭ ފްރާންސްގެ ދެ ފަތުރުވެރިންނަކީ އުމުރުން 20 އަހަރާ 30 އަހަރާ ދެމެދުގެ ދެމީހުން ކަމަށެވެ.
އެ ދެމީހުން ރާއްޖެ އައިސްފައި ވަނީ މިދިޔަ ފެބުރުއަރީ މަހުގެ 25 ވަނަ ދުވަހުއެވެ. އަދި އެ ދެމީހުން ވެލާނާ އިންޓަނޭޝަނަލް އެއާޕޯޓުން، ރިސޯޓަށް ދަތުރުކޮށްފައި ވަނީ ލޯންޗުގައި ކަމަށާއި، އިތުރު އެހެން ތަނަކަށް ގޮސްފައި ނުވާކަމަށް ރިސޯޓުން ބުނެއެވެ.
އެ ދެމީހުން ހުން އައިސްގެން މި މަހުގެ ފަސް ވަނަ ދުވަހު ރިސޯޓުގެ ޑޮކްޓަރަށް ދައްކާފައިވާ ކަމަށް ރިސޯޓުން ބުންޏެވެ. އެއާއެކު ރިސޯޓުގެ ފަރާތުން އެކަން އެޗްޕީއޭގެ ސަމާލުކަމަށް ގެނެސްފައިވާނެ ކަމަށާއި ދެ ފަތުރުވެރިން އެމީހުންގެ ކޮޓަރީގައި ކަރަންޓީނު ކުރި ކަމަށެވެ.
އަދި ޖެހިގެން އައި ދުވަހު ދެ ފަތުރުވެރިން ބެލި ޑޮކްޓަރު ވެސް ކެއްސާ ނޭވާލާން އުނދަގޫވާކަމަށް ރިޕޯޓުކުރުމުން އެކަން އެޗްޕީއޭއަށް އަންގައި، ޑޮކްޓަރުވެސް އޭނާގެ ކޮޓަރީގައި ކަރަންޓީނުކުރި ކަމަށެވެ.
ސަމާ އައިލެންޑް ރިސޯޓުން ބުނީ މިއަދު ހެނދުނު އެޗްޕީއޭގެ އޮފިޝަލުން އެ ރިސޯޓަށް ދިއުމަށް ހަމަޖެހިފައިވާ ކަމަށެވެ. އަދި ދެ ފަތުރުވެރިންނާއި ޑޮކްޓަރު ވެސް ކަރަންޓީން ފެސިލިޓީއަށް ގެންގޮސް ކޮވިޑް19 އަށް ޓެސްޓުކުރާނެ ކަމަށެވެ.
މީގެ އިތުރުން ވެސް އެ ރިސޯޓުގައި މަސައްކަތް ކުރާ އެހެން ތިން މުވައްޒަފުން ވެސް ކުޑަކޮށް ކެއްސާތީ، އެޗްޕީއޭގެ ލަފަޔާއެކު ސަލާމަތީ ފިޔަވަޅެއްގެ ގޮތުން އެމީހުން ވެސް ކޮޓަރީގައި ކަރަންޓީނު ކޮށްފައިވާ ކަމަށް ރިސޯޓުން ބުނެއެވެ.
ދެ ފަތުރުވެރިންނާއި ޑޮކްޓަރުގެ ޓެސްޓުތަކުގެ ނަތީޖާ ލިބެންދެން އެޗްޕީއޭގެ ހުއްދަ ނެތި އެ ރިސޯޓަށް މީހުން އަރާ ފޭބުން ވަގުތީ ގޮތުން ވަނީ މަނާކޮށްފައެވެ.
ސަމާ އައިލެންޑުން ބުނީ އެ ރިސޯޓަށް ރިޒަވޭޝަން ހެދުމަށްފަހު ރާއްޖެ އަންނަ ފަތުރުވެރިން އެހެން ރިސޯޓުގައި ތިބެވޭނެ އިންތިޒާމް މިހާރު ހަމަޖައްސާފައިވާ ކަމަށެވެ.
ސަމާ އައިލެންޑު ރިސޯޓަށް އަރާ ފޭބުން ވަގުތީގޮތުން މަނާކޮށްފައި ވާއިރު އިއްޔެ ޅ. ކުރެއްދޫ ރިސޯޓުގައި ޗުއްޓީ ހޭދަކޮށްފައި ދިޔަ އިޓަލީ މީހަކު ބައްޔަށް ޕޮޒިޓިވްވި ކަމުގައި މައުލޫމާތު ލިބި އަދި އެ ރިސޯޓުގެ ޑޮކްޓަރުގެ ކިބައިން ބަލީގެ އަލާމާތްތައް ފެނުމުން ބައްޔަށް ޓެސްޓުކުރުމަށް އޭނާ ވަނީ ފަރުކޮޅުފުއްޓަށް ގެންގޮސްފައެވެ.
އަދި ޓެސްޓުގެ ނަތީޖާ ލިބެންދެން އެ ރިސޯޓަށް ވެސް ވަގުތީގޮތުން އަރާ ފޭބުން ވަނީ މަނާކޮށްފައެވެ. ހަމައެއާއެކު ވ. ތިނަދޫއިން ބައްޔަށް ޝައްކު ކުރެވޭ ފަތުރުވެރިޔަކު ފެނި އޭނާގެ ޓެސްޓުތަކުގެ ނަތީޖާ ލިބެންދެން އެރަށް ވެސް އޮތީ ލޮކްޑައުންގައެވެ.
ދުނިޔޭގައި ހަލުވިކަމާއެކު ފެތުރެމުން އަންނަ ކޮވިޑް19 ޖެހުނު މީހުންގެ އަދަދު މިހާރު ލައްކައަކަށް ވުރެ މައްޗަށް އަރާފައި ވާއިރު، މި ބަލީގައި 3،497 މީހަކު ވަނީ މަރުވެފައެވެ.