މަސްވެރި ކަމަށް ބޭނުންކުރާ އުޅަނދުފަހަރުގެ އެޅުމަށް ބޭނުންކުރާ އިންޖީނާއި މަސްވެރިކަމަށް ބޭނުންކުރާ ބައެއް ސާމާނުގެ ޑިއުޓީ މިއަހަރުގެ ތެރޭގައި ކަނޑާލާނެ ކަމަށް ރައީސް ސޯލިހު ވިދާޅުވެއްޖެ އެވެ.
ރިޔާސީ ބަޔާން އިއްވަވަމުން ރައީސް ސޯލިހު މިއަދު ވިދާޅުވީ، ދިވެހި މަސްވެރިކަން ތަރައްގީކުރުމަށް ކުރަން ޖެހޭ މަސައްކަތް ވަރަށް ގިނަ ކަމަށެވެ. އަދި މަސްވެރިންނާއި އޮޑިވެރިންގެ އަމިއްލަ މަސައްކަތުން މަސްވެރިކަން ކުރިއަރުވައި ތަރައްޤީކުރިއިރު، އެއާ ގާތްކުރާ މިންވަރަށް ވެސް މަސްވެރިކަމުގެ ސިނާއަތް ކުރިއެރުވުމުގެ ރަނގަޅު ސިޔާސަތެއް ކުރީ ސަރުކާރުތަކުން ގެންގުޅެފައެއް ނެތް ކަން ރައީސް ފާހަގަ ކުރެއްވި އެވެ.
"މަސްވެރި އުޅަނދުފަހަރަށް ގެންނަ އިންޖީނާއި، ދޯނި ބަނުމަށް ބޭނުންވާ ފައިބަރާއި ރެސިން އަދި މަސްވެރިކަމަށް ބޭނުންކުރާ ބައެއް އާލާތްތަކުގެ އިމްޕޯޓް ޑިއުޓީ މިއަހަރުގެ ތެރޭގައި ކަނޑައިލެވޭނެ،" ރައީސް ވިދާޅުވި އެވެ.
މަސްކިރުމަށް ދިމާވާ ދަތިތައް ހައްލު ކުރުމުގެ ގޮތުން ކޫއްޑޫގެ ކޯލްޑް ސްޓޯރޭޖް ކެޕޭސިޓީ، މިހާރު ހުރި 2000 ޓަނުން 6000 ޓަނަށް، އަދި ފެލިވަރުގެ ކެޕޭސިޓީ 4000 ޓަނަށް އިތުރުކުރުމަށް މިއަހަރުގެ ތެރޭގައި އިންވެސްޓް ކުރެވޭނެ ކަން ރައީސް ފާހަގަކުރެއްވި އެވެ.
މަސްވެރިންގެ ޝަކުވާތަކަށް ސަރުކާރުން އަންނަނީ ޙައްލު ހޯދައިދެމުންކަން ފާހަގަކޮށް ރައީސް ސޯލިހު ވިދާޅުވީ، ގިނަ އަދަދެއްގެ ބިދޭސީން ހިމެނޭ ގޮތަށް، ލޭނު މަސްވެރިކަމަށް ދީފައި އޮތް ހުއްދަތައް، ބޮޑުކަންނެލީގެ މަސްވެރިންގެ އެދުމާ އެއްގޮތަށް، މިހާރު ވާނީ ބާޠިލު ކޮށްފައި ކަމަށެވެ.
އެން ހޯދަން ފީނުމުގައި ލިބޭ ގެއްލުން ކުޑަކުރުމުގެ ގޮތުން، ރައްކާތެރި ގޮތުގައި ފީނުމުގެ ތަމްރީން ޕްރޮގްރާމްތަކެއް މިއަހަރު ފެށިމަށް ހަމަޖެހިފައިވާ ކަން ރައީސް ފާހަގަކުރެއްވި އެވެ. އެގޮތުން، އައްޑޫގައި ހުރި ޑީކޮމްޕްރެޝަން ޗެމްބަރުގެ ޚިދުމަތް، އަންނަ މާރިޗު މަހުގެ ތެރޭގައި ފެށުމަށް މަސައްކަތް ކުރަމުން އަންނަ ކަމަށް ރައީސް ވިދާޅުވި އެވެ.