އަންނަ އަހަރު ސްކޫލްތަކުގެ ނާސްތާ ޕްރޮގްރާމްގެ މެނޫއަށް މަސް ބަނަހާއި ޕިއްޒާ އިތުރުކުރަން ނިންމާފަިއވާ ކަމަށް އެޑިއުކޭޝަން މިނިސްޓްރީން ބުނެފި އެވެ.
އެޑިއުކޭޝަން މިނިސްޓްރީގެ އޮފިޝަލަކު "ސަން" އަށް ވިދާޅުވީ މެނޫއަށް ބަދަލުގެންނަން ނިންމީ ދަރިވަރުންގެ ފަރާތުން ލިބުނު "ފީޑްބެކް" އަށް ބެލުމަށްފަހު ނާސްތާގައި ދޭތަކެތި ތަފާތު ކުރުމުގެ ގޮތުންނެވެ.
އެގޮތުން އަންނަ އަހަރު ނާސްތާ ޕްރޮގްރާމްގައި އެކި ދުވަސްތަކަށް ބަހާލައިގެން ދޭން ނިންމާފައިވާ ކާތަކެތީގެ ތެރޭގައި ވަސް މަސް ބަނަހާއި ދިގު މަސް ބަނަހާއި ޕިއްޒާ ހިމެނެއެވެ.
އެ ބަނަސްތަކުގައި ފަރުމަހާއި ކުކުޅުމަހާއި ލެޓިއުސް ޓޮމާޓޯ ކިއުކަމްބާވެސް އަޅާގޮތަށް ހިމެނެއެވެ. އޭގެ އިތުރުން މަޔޮނައިޒް ނާޅައި ލޮނާއި ތެޔޮ މަދުން ބޭނުންކުރަން ނިންމާފަިއވާ ކަމަށް މިނިސްޓްރީން ބުންޏެވެ.
ސްކޫލުތަކުގެ ދަރިވަރުންނަށް ހެނދުނުގެ ނާސްތާ ދޭން ފެށީ މިއަހަރުގެ ޖެނުއަރީ މަހު އެވެ. އަޖުމަ ބެލުމުގެ ގޮތުން ފެށި އެ ޕްރޮގްރާމްގައި ނާސްތާ ފުރަތަމަ ދީފައިވަނީ 25 ސްކޫލެއްގަ އެވެ. އަދި ބާކީ ހުރި 188 ސްކޫލުގައި ނާސްތާ ޕްރޮގްރާމް ފެށީ މިދިޔަ ޖުލައި މަހުއެވެ.
އެޑިއުކޭޝަން މިނިސްޓްރީން ބުނީ ނިިމިގެން ދިޔަ ދިރާސީ އަހަރު ނާސްތާ ޕްރޮގްރާމްގައި 83 ޕަސެންޓް ދަރިވަރުން ބައިވެރިވި ކަމަށާއި އަދި ޖުމްލަ 134.3 މިލިއަން ރުިފޔާ ހަރަދުވި ކަމަށެވެ.
އަންނަ އަހަރު ނާސްތާ ޕްރޮގްރާމް ބައެއް ސްކޫލްތަކުގައި ހިންގައިދޭނެ ފަރާތްތައް ހޯދަން އެކި ސްކޫލްތަކުން ވަނީ އިއުލާންވެސްކޮށްފައެވެ. މިދޔަ އަހަރު ޕައިލެޓް ޕްރޮޖެކްޓްއެއްގެ ގޮތުގައި ނާސްތާ ޕްރޮގްރާމް ހަވާލުކުރި ކޮންޓްރެކްޓަރުންގެ މުއްދަތުހަމަވެފައިވާއިރު ބައެއް ސްކޫލްތަކުގައި މިދޔަ އަހަރު ނާސްތާ ޕްރޮގްރާމް ހިންގީ ވަގުތީގޮތުން ބައެއް ފަރާތްތަކާ ހަވާލުކޮށްގެންނެވެ.