އަލްޖިއާޒް (ޑިސެމްބަރު 23): އަލްޖީރިއާގެ އަސްކަރިއްޔާގެ ވެރިޔާ ޖެެނެރަލް އަހުމަދު ގައިދު ސަލާހު އަވަހާރަވެއްޖެ ކަމަށް އެގައުމުގެ ދައުލަތުގެ މީޑިއާއިން ރިޕޯޓުކޮށްފި އެވެ.
އަލްޖީރިއާގެ ސަރުކާރުގެ ރޭޑިއޯއިން ބުނި ގޮތުގައި މިއަދު ހެނދުނު 79 އަހަރުގެ ސަލާހު އަވަހާރަވީ ހާޓް އެޓޭކެއް ޖެހިގެން، އަލްޖިއާޒްގެ ހޮސްޕިޓަލެއްގައި ފަރުވާ ދެމުން ދަނިކޮށެވެ.
އަލްޖީރިއާގެ އަސްކަރިއްޔާގެ ވެރިޔާގެ ގޮތުގައި ހުންނަވާތާ 15 އަހަރުވެފައިވާ ސަލާހު ވަނީ މިއަހަރާ ޖެހެންދެން އެގައުމުގެ ކުރީގެ ރައީސް އަބްދުލްއަޒީޒް ބޫތަފްލީގާއަށް ތާއިދު ކުރައްވާފަ އެވެ. ނަމަވެސް ރައީސް ފަސް ވަނަ ދައުރަކަށް ކުރިމަތިލައްވާނެކަން އިއުލާން ކުރެއްވުމުން އެގައުމުގައި މިދިޔަ ފެބުރުއަރީ މަހު ފެށުނު ބޮޑެތި މުޒާހަރާތަކާ ގުޅިގެން، ބޫތަފްލީގާގެ އިސްތިއުފާއަށް ސަލާހު ގޮވާލެއްވި އެވެ. އަދި ހަމަ އެދުވަހު ރައީސް އިސްތިއުފާ ދެއްވި އެވެ.
އޭގެ ފަހުން ސަލާހު ވަނީ އެގައުމުގައި ކޮރަޕްޝަނާ ދެކޮޅަށް ކުރިއަށްގެންދިޔަ ބޮޑު އޮޕަރޭޝަނެއްގައި އިސް ދައުރެއް އަދާ ކުރައްވާފަ އެވެ. އެ އޮޕަރޭޝަނުގައި ހައްޔަރު ކުރި ސަރުކާރާ ގުޅުން ހުރި ފަރާތްތަކުގެ ތެރޭގައި ބޫތަފްލީގާގެ ކޮއްކޯފުޅު ސައިދު ވެސް ހިމެނެ އެވެ.
މީގެ އިތުރުން މިމަހުގެ 12ގައި އެގައުމުގައި ވަނީ ރިޔާސީ އިންތިހާބެއް ބާއްވާފަ އެވެ. އެ އިންތިހާބު ކާމިޔާބު ކުރެއްވީ ބޫތަފްލީގާ އާއި ސަލާހުއާ ވެސް ގާތް ބޭފުޅެއް ކަމަށްވާ ޢަބްދުލްމަޖީދު ތަބޫން އެވެ.
އަލްޖީރިއާގައި އާ ސަރުކާރެއް އެކުލަވާލި ނަމަވެސް އެގައުމުގެ މުޒާހަރާތައް ދަނީ އަދިވެސް ބާއްވަމުންނެވެ. އަދި މުޒާހަރާ ކުރާ މީހުން ދަނީ ގައުމުގެ ސަރުކާރާއި ދައުލަތުގެ މުއައްސަސާތައް އޮތީ ސިފައިންނާއި ކުރީގެ ސަރުކާރަށް ނިސްބަތްވާ ނުފޫޒު ގަދަ ފަރާތްތަކުގެ ކޮންޓްރޯލްގެ ދަށުގައި ކަމަށާއި އެކަންކަން އިސްލާހު ނުވެ ގައުމަށް ރަނގަޅު ޑިމޮކްރަސީއެއް ނުގެނެވޭނެ ކަމަށް ބުނަމުންނެވެ.