ރާއްޖޭގެ ލީޑިން ކޮލެޖެއް ކަމަށްވާ ސައިރިކްސް ކޮލެޖުން އަންނަ އަހަރު ކުރިއަށްގެންދާ 31 ކޯހަކަށް ކުރިމަތިލާން ހުޅުވާލައިފި އެވެ.
މިއަދު ސައިރިކްސް ކޮލެޖުގައި ބޭއްވި ނޫސްވެރިންގެ ބައްދަލުވުމެއްގައި އެ ކޮލެޖުގެ ވައިސް ރެކްޓާ އަބްދުﷲ ނާޒިމް ވިދާޅުވީ އަންނަ ޖެނުއަރީ މަހު ފަސްޓް ޑިގްރީއިން ސައިކޮލޮޖީ ފަށާނެ ކަމަށެވެ.
"ސައިކޮލޮޖީން ސެޓްފިކެޓް 3، ސެޓްފިކެޓް 4 ގެ ކްލާސްތައް އަޅުގަނޑުމެން މިހާރު އެބަހިންގަން. ސައިރިކްސް ކޮލެޖުގައި ކިޔެވުމަށް އޮތް އެންމެ ރަނުގެ އެއް ފުުރުސަތަކީ މާސްޓާސްގެ ގިނަ ޕްރޮގްރާމްތަކަކީ ހޮނިހިރު ދުވަހު މުޅި ފުލްޑޭގައި ކިޔަވާގޮތަށް ކައިރިރަށްތަކުން މީހުން އައިސް ކިޔެވޭގޮތަށް ހުރި ޕްރޮގްރާމްތަކެއް" ނާޒިމް ވިދާޅުވި އެވެ.
ނާޒިމް ވިދާޅުވީ އެ ކޮލެޖުގެ ހުރިހާ ކޯސްތަކަކީވެސް މޯލްޑިވްސް ކޮލިފިކޭޝަން އޮތޯރިޓީ (އެމްކިއުއޭ)ގެ ގަވައިދުތަކަށް ފެތޭގޮތަށް ފަރުމާ ކޯސްތަކެއް ކަމަށެވެ.
މެލޭޝިއާގެ ހެލްޕް ޔުނިވާސިޓީއާ ގުޅިގެން މާސްޓާސްއިން އައިޓީ އަދި ބިޒްނަސް ޕްރޮގްރާމެއް އަންނަ ފެބްރުއަރީމަހު ފަށަން ނިންމާފަިއވާ ކަމަށްވެސް ނާޒިމް ވިދާޅުވި އެވެ.
ކޯސްތަކަށް ވަނުމުގެ ޝަރުތުތައް
- ސެޓްފިކެޓް ލެވަލް 3- ބޭސިކް ލެވަލް އެޑިއުކޭޝަން ލެވަލް ނުވަތަ ގްރޭޑް ހައެއް ނިންމާފައިވުމާއެކު އިނގިރޭސި ބަހަށް ފަރިތަވުން.
- ސެޓްފިކެޓް ލެވަލް 4- ސެޓްފިކެޓް 3 ފުރިހަމަކުރުން ނުވަތަ ދިވެހި އިސްލާމް ހިމެނޭގޮތަށް އޯ ލެވެލްއިން ތިން މާއްދާއިން ފާސްވުން
- ޑިޕްލޮމާ/ޑިގްރީ- ސެޓްފިކެޓް 4 ނުވަތަ ލެވަލް 4 ހަޔާ ސެކަންޑްރީ ފުރިހަމަކޮށް ދެ މާއްދާއިން އޭ ލެވަލްގައި ފާސްވުން
- މާސްޓާސް - ގުޅޭ ދާއިރާއަކުން ފުރަތަމަ ޑިގްރީއެއް ހާސިލްކޮށްފައިވުން ނުވަތަ
- ހަތް އަހަރު ވަޒީފާގައި އުޅެ ލެވަލް ފަހެއްގެ ޑިޕްލޮމާއެއް ނިންމައި އުމުރުން 25 އަހަރުވުން. ވަޒީފާގެ ތަޖުރިބާގައި ހަތް އަހަރު އުޅުނުއިރު ޑިޕްލޮމާ ހެދިފަހުން ތިން އަހަރު މަސައްކަތްކޮށްފައި ވާންޖެހޭ.
ސައިރިކްސްއިން ބުނީ އެ ކޮލެޖުގެ ކޯސްތަކަށް ކުރިމަތިލުމުގައި ދަރިވަރުންނަށް މަހުން މަހަށް ފައިސާ ދެއްކުމުގެ އިންތިޒާމް ހަމަޖައްސައިދޭނެ ކަމަށާއި އަދި ކޯސްތަކަށް ޝައުގުވެރިވާ ފަރާތްތަކަށް ކެރިއާ ކައުންސިލިންވެސް އެ ކޮލެޖުގެ ދެ ކެމްޕަސް ފޯރުކޮށްދޭނެ ކަމަށެވެ. އަދި ބުނީ ފަސްޓް ޑިގްރީއަށް އަލަށް ކިޔަވާ ދަރިވަރުންނަށް ސަރުކާރުގެ ހިލޭ ކިޔަވައިދޭ ސްކީމުން ކިޔެވުމުގެ ފުރުސަތު ލިބޭނެ ކަމަށެވެ.
ސައިރިކްސް ކޮލެޖުގެ ރެކްޓާ ޑރ. އަލީ ފަވާޒް ޝަރީފް ވިދާޅުވީ އަންނަ އަހަރު ޓީޗަރުން ތަމްރީންކުުރުމަށްވެސް ކޯސްތަކެއް އިއުލާންކުރާނެ ކަމަށެވެ.
އަންނަ އަހަރަށް ސައިރިކްސްއިން ހުޅުވާލި ކޯސްތަކުގެ ތެރޭގައި ބެޗެލާސް ޑިގްރީ އިން ފައިނޭންސް، މާކެޓިން، ބިޒްނަސް އަދި އިންފޮމޭޝަން ޓެކްނޮލަޖީ ކޯހެއް ހިމެނެ އެވެ.