ޕްރާގް (ނޮވެމްބަރު 2): ދުނިޔޭގެ ދެވަނަ ބޮޑު ހަނގުރާމައިގެ ތެރޭގައި އެތައް ޖަރީމާތަކެއް ހިންގި އެޑޮލްފް ހިޓްލަރުގެ މާސްކެއް ޗެކް ރިޕަބްލިކްގެ ފިހާރައަކުން ވިއްކި މައްސަލައެއް ހޫނުވެ، އެގައުމުގެ ފުލުހުން އެމައްސަލަ ބަލަން ފަށައިފި އެވެ.
ޗެކް ރިޕަބްލިކްގެ މީޑިއާތަކުގައިވާ ގޮތުން އެމައްސަލަ ބަލަން ފެށީ އެގައުމުގައި ހުންނަވާ ޖަރުމަނުގެ އެމްބެސެޑަރު ކްރިސްޓޮފް އިސްރަންގު ޓުވީޓު ކުރެއްވި ފޮޓޯއަކާ ގުޅިގެންނެވެ. އެފޮޓޯ އިން ފެނިގެން ދަނީ ހިޓްލަރުގެ މޫނުގެ ސިފައާ އެއްގޮތް މާސްކެއް ޕްރާގްގެ ފިހާރައެއްގައި ވިއްކަން އަޅުވާފައި ވަނިކޮށެވެ.
"ނާޒީ ސަރުކާރުގެ ދަށުގައި ޗެކް ރިޕަބްލިކްގެ ރައްޔިތުން ވަނީ އެތައް ވޭނެއް ތަހައްމަލުކޮށްފައި،" އިސްރަންގު ކުރެއްވި ޓުވީޓުގައިވެ އެވެ.
އޭގެ ސަބަބުން ޗެކް ފުލުހުން ވަނީ އެ ފިހާރައިން ގާނޫނަކާ ހިލާފުވެފައިތޯ ބަލައި މައްސަލަ ތަހުގީގު ކުރަމުންދާ ކަމަށް ބުނެފަ އެވެ.
ޖަރުމަނުގައި އޮތް ހިޓްލަރުގެ ވެރިކަމުގައި އޭރުގެ ޗެކްސްލޮވާކިއާއަށް އަރާ، 1938 އާއި 1945އާ ދޭތެރޭ އެގައުމުގައި މެރި މީހުންގެ އަދަދު 345,000 އަރާނެ ކަމަށް ރެކޯޑުތަކުން ދައްކަ އެވެ.