މޯލްޑިވިއަން ޑިމޮކްރަސީ ނެޓްވޯކް (އެމްޑީއެން) އިން 2016 ވަނަ އަހަރު ނެރުނު "ޕްރިލިމިނަރީ އެސެސްމަންޓް އޮން ރެޑިކަލައިޒޭޝަން އިން ދަ މޯލްޑިވްސް" ރިޕޯޓު ފުލުހުންގެ ސަމާލުކަމަށް އައި އިރު، އެ ޖަމްއިއްޔާ ގައި އެންމެ އިސްކޮށް ހަރަކާތްތެރިވާ ޝަހިންދާ އިސްމާއިލް ރާއްޖޭގައި ނޫޅޭކަމަށް ފުލުހުން ބުނެފި އެވެ.
އެމްޑީއެންގެ ރިޕޯޓުގެ މައްސަލާގައި އެ ޖަމްއިއްޔާގެ އިސް ފަރާތްތައް ހައްޔަރުކޮށް މައްސަލަ ތަހުގީގު ކުރުމަށް އާންމުންނާއި އިދިކޮޅުން ދަނީ ގޮވާލަމުންނެވެ. އަދި ރިޕޯޓްގެ މައްސަލަ ބަލަނިކޮށް ޝަހިންދާ ރާއްޖެއިން ފުރާފައިވާ ކަމަށް ވެސް ވަނީ އަޑުތައް ފެތުރިފަ އެވެ.
އެކަމާ ގުޅިގެން ފުލުހުން ބުނީ، އެމްޑީއެންގެ ރިޕޯޓްގެ މައްސަލަ ފުލުހުންގެ ސަމާލުކަމަށް އައި އިރުވެސް، ޝަހިންދާ ރާއްޖޭގައި ނޫޅޭ ކަމަށެވެ.
އެނގިފައިވާގޮތުގައި މިހާރު ޝަހިންދާ ދިރިއުޅެނީ ޖަރުމަނު ވިލާތުގަ އެވެ.
އެމްޑީއެންގެ ރިޕޯޓާ ގުޅިގެން ނުރުހުން ފާޅުކުރަމުންދަނިކޮށް، ޖަމްއިއްޔާތައް ބަލަހައްޓާ، ޔޫތް މިނިސްޓްރީއިން ވަނީ އެ ޖަމްއިއްޔާގެ ހަރަކާތްތައް ހުއްޓުވައި އެ ޖަމްއިއްޔާ ސަސްޕެންޑު ކޮށްފަ އެވެ.
މިދިޔަ ބުރާސްފަތި ދުވަހު ޔޫތު މިނިސްޓްރީ އިން ނެރުނު ބަޔާނެއްގައި ބުނީ އެމްޑީއެން އިން ޝާއިއުކުރި ރިޕޯޓްގެ މައްސަލަ ފުލުހުން ތަހުގީގު ކުރަމުން ދާތީ ފުލުހުން އެ މައްސަލަ ތަހުގީގުކޮށް ނިމެންދެން އެ ޖަމްއިއްޔާގެ އެއްވެސް ހަރާކާތެއް ނުހިންގުމަށް އަންގާފައިވާ ކަމަށެވެ.
އެމްޑީއެންއިން ނެރުނު ރިޕޯޓްގައި އިސްލާމް ދީނާއި ކީރިތި ރަސޫލާއަށް ކުޑައިމީސްވާ ފަދަ ވާހަކަތައް ވަނީ ހިމަނައިފަ އެވެ. އެ ރިޕޯޓްގައި ކީރިތި ރަސޫލާ އިސްރާ އަދި މިއުރާޖްއަށް ވަޑައިގެންނެވި ހާދިސާއާއި ކީރިތި ރަސޫލާއަކީ ހައްދު ފަހަނައަޅާފައިވާ ބޭފުޅެއް ކަަމަށް ސިފަވާފަދަ ގޮތަކަށް ވާހަކަތައް ހިމަނާފައިވެ އެވެ.
ރައީސް އިބްރާހިމް މުހައްމަދު ސޯލިހް މީގެ ކުރިން ވިދާޅުވީ ދީނަށް ފުރައްސާރަކުރާ ފަރާތްތަކާމެދު ފިޔަވަޅު އަޅާނެ ކަމަށެވެ.
އެމްޑީއެން އުވާލުމަށްފަހު، އެ ޖައްމިއްޔާ އަށް ނިސްބަތްވާ މެމްބަރުންނާމެދު ފިޔަވަޅު އަޅައި އަދި އެމްޑީއެންގައި އުޅުމަށް ފަހު މިހާރު ސަރުކާރު މަގާމުތަކުގައި ތިއްބެވި ފަރާތްތައް ވަޒީފާ އިން ވަކިކުރުމަށްވެސް އިދިކޮޅު ޕީޕީއެމް އަދި ޕީއެންސީއިން ވަނީ ގޮވާލައިފަ އެވެ.
ރޭ އިދިކޮޅުން ބޭއްވި އެއްވުމުގައި ކުރީގެ ރައީސް އަބްދުﷲ ޔާމީން ވިދާޅުވީ އެމްޑީއެން އުވާލާ، އެޖަމްއިއްޔާގެ އިސްފަރާތްތަކާމެދު ފިޔަވަޅު އަޅަން މިހާރުގެ ސަރުކާރަށް ނުކުރޭނެ ކަމަށެވެ.