ނެޝަނަލް އިންސްޓްޓިއުޝަން އޮފް އެޑިއުކޭޝަން (އެންއައިއީ)އިން އިސްނަގައިގެން ނުރަސްމީ ތައުލީމުގެ މަހާސިންތާއެއް ފަށައިފި އެވެ.
ނުރަސްމީ ތައުލީމަކީ ތަފާތު ސަބަބުތަކާހުރެ ރަސްމީ ތައުލީމް ހާސިލް ނުކުރާ ކުދިންނަށް ދެމުން އަންނަ ތައުލީމީ ނިޒާމެކެވެ. އެ ނިޒާމްގެ ދަށުން އެކި މަސައްކަތްތައް ދަސްކޮށްދީވެސް ހަދަ އެވެ.
އިއްޔެ އިސްލާމީ މަރުކަޒުގެ ހޯލުގައި ފެށި އެ މަހާސިންތާ ޝަރަފުވެރިކޮށްދެއްވީ ދައުލަތަށް ގިނަ ދުވަހު ހިދުމަތްކޮށްދެއްވާފައިވާ މުހައްމަދު މުސްތަފާ ހުސެއިން އެވެ.
މިއަދު ހަވީރުގެ ނިޔަލަށް ކުރިއަށްގެންދާ އެ މަހާސިންތާގައި އަތޮޅު ކައުންސިލަރުންނާއި ރަށުކައުންސިލަރުންގެ ތެރެއިން 64 މީހުން ބައިވެރިވެ އެވެ.
އެންއައިއީން ބުނީ އެ މަހާސިންތާގައި ނުރަސްމީ ތައުލީމުގެ ހާލަތު ދިރާސާކުުރުމަށް ކުރެވުނު ދިރާސާގެ މައުލޫމާތު ހިއްސާކޮށް އެ މައުލޫމާތުގެ އެހީގައި ނުރަސްމީ ތައުލީމު އަތޮޅު ފެންވަރުގަ އާއި އަދި ރަށު ފެންވަރުގައި ކުރިއަށް ގެންދިއުމަށް ކުރެވިދާނެ ކަަންކަމާމެދު މަޝްވަރާކުރުމަށް ހަމަޖެހިފައިވާ ކަަމަށެވެ.
ނުރަސްމީ ތައުލީމގެ ހާލަތު ދެނެގަތުމަށް އެންއައިއީން ކުރީ ޔުނިސެފްގެ އެހީގައި އެކަމާ ގުޅޭ ހާއްސަ ކޮންސަލްޓަންޓެއްގެ ބެލުމުގެ ދަށުން ކަމަށެވެ.
އެ ދިރާސާގެ އަލީ ނުރަސްމީ ތައުލީމު ކުރިއަށް ގެންދިއުމަށް ހާއްސަ މޮޑެލްތަކެއްވެސް ވަނީ ތައްޔާރުކޮށްފަ އެވެ.