މަޝްހޫރު ލަވަކިޔުންތެރިޔާ ޖަސްޓިން ބީބާ އާއި އޭނާގެ އަންހެނުން ހެއިލީ ބޯލްޑްވިން ދެވަނަ ފަހަރަށް ކައިވެނިކޮށްފި އެވެ.
ޖަސްޓިން އާއި ހެއިލީ ދެވަނަ ފަހަރަށް ކައިވެނިކުރީ ސައުތު ކެރޮލައިނާގެ ބްލަފްޓަންގައި ހުންނަ ލަގްޜަރީ ރިސޯޓެއް ކަމަށްވާ މޮންޓާޖް ޕޯމެޓޯ ބްލަފް ބްލަފްގައި ބޭއްވި ހާއްސަ ހަފްލާއެއްގަ އެވެ.
ޖަސްޓިން އާއި ހެއިލީގެ ދެވަނަ ކައިވެނީގެ ހަފްލާ ބާއްވާފައި ވަނީ ވަރަށް ކުލަގަދަކޮށެވެ. އަދި އެ ހަފްލާގައި ދެމީހުންގެ އެކުވެރިންނާއި އާއިލާ ވަނީ ބައިވެރިވެފަ އެވެ.
ދެމީހުންގެ ދެވަނަ ކައިވެނި މި ކުރީ ދެމީހުންގެ ފުރަތަމަ ކައިވެންޏަށް އަހަރެއް ފުރުނު ފަހުންނެވެ.
ޖަސްޓިން އާއި ހެއިލީ މިދިޔަ އަހަރު ކައިވެނިކޮށްފައި ވަނީ ކޯޓެއްގައި އެންމެނާ ސިއްރުންނެވެ. އެއާ އެކު ދެމީހުން ކައިވެނިކޮށްގެން އުޅޭކަމުގެ އަޑުތައް އެރިއެވެ. ނަމަވެސް ޖަސްޓިން އާއި ހެއިލީ ކައިވެނިކޮށްގެން އުޅޭކަން ކަށަވަރުކޮށްދީފައި ވަނީ މިދިޔަ އަހަރުގެ ނޮވެމްބަރުގަ އެވެ.
ވޯގް އަށް ދިން އިންޓަވިއުއެއްގައި ހެއިލީ ބުނެފައި ވަނީ ދެމީހުން ދިމާވެފައިވަނީ ވަރަށް ޒުވާން އުމުރެއްގައި ކަމަށެވެ.
"އަހަރެންނެއް ނުބުނާނަން ކައިވެންޏަށް ފަހު ކޮންމެ ދުވަހަކީ އުފާވެރި ދުވަހަކަށް ވާނެއެކޭ. އެހެނެއް ނޫން. އުނދަގޫ ދުވަސްތައް ވެސް އާދޭ. އެކަމު ކައިވެނީގެ މާނައަކީ ކޮމިޓްމެންޓް ދިނުން. އެކަކު އަނެކަކަށް ސަޕޯޓު ދިނުން ދަތި ހާލަތްތަކުގައި ވެސް،" ހެއިލީ ބުންޏެވެ.
ހެއިލީ ބުނީ ކައިވެންޏާ މެދު ބިރު ގަންނަކަމަށެވެ. އެހެންނަމަވެސް ދެމީހުން ވެސް އެކީގައި ދިރިއުޅުމެއް ފެށުމަށް ބޭނުންވާ ކަމަށް އޭނާ ބުންޏެވެ.