ދެހާސް ބާރަވަނަ އަހަރުގެ ފެބްރުއަރީ ހަތްވަނަ ދުވަހު ރާއްޖޭގެ އޭރުގެ ސަރުކާރު ނިމުމަކަށް އައިސް ރައީސް މުހައްމަދު ނަޝީދު އިސްތިއުފާ ދެއްވުމަށް މަޖުބޫރުކުރުވި ސަބަބަކީ މިހާރުގެ ހޯމް މިނިސްޓަރު އިމްރާން އަބްދުﷲ ވެސް އިސްކޮށް ހުންނަވައި ކުރެއްވި ސިލްސިލާ މުޒާހަރާތަކެވެ.
އެއީ ބަގާވަތެއްގެ ގޮތުގައި އޭރުވެސް މިހާރުވެސް އެމްޑީޕީން ސިފަކުރަމުން އަންނައިރު، އެ މައްސަލަ ބެލުމަށް އެކުލަވާލި ރިޔާސީ ކޮމިޝަނުން ނިންމީ އެއީ ބަގާވާތެއް ނޫންކަމަށެވެ.
އޭގެ ހަ އަހަރު ފަހުން އެމްޑީޕީއަށް ނިސްބަތްވާ ރައީސަކު ވެރިކަމަށްވަޑައިގެން ހޯމް މިނިސްޓަރުކަމަށް އިމްރާން އައްޔަނުކުރައްވާފައި ވަނިކޮށް އެ ޕާޓީގެ ސުޕަ މެޖޯރިޓީ އޮތް ރައްޔިތުންގެ މަޖިލީހަށް އިމްރާން ހާޒިރުކޮށް، ފެބްރުއަރީ 7 ގެ ކަންކަމާ ބެހޭގޮތުން ސުވާލު ކުރުމުން މިނިސްޓަރު އިމްރާން ވިދާޅުވީ؛ "އެ ދުވަހުގެ ވާހަކަތައް މިއަދު ދައްކާ ނަމަ، މަސްލަހަތު ގެއްލޭނެ" ކަަމަށެވެ.
މިނިސްޓަރުގެ އެ ސްޓޭންޑަށް އެ ވަގުތު ރިޔާސަތުގައި އިންނެވި އަދި ހަތެއް ފެބުރުއަރީގެ ބިރާއި ހިތި އެންމެ ބޮޑަށް އިހުސާސްކުރެއްވުނު ކުރީގެ ރައީސް މުހައްމަދު ނަޝީދު އަދި މަޖިލީހުގެ ރައީސް، ރައީސް މުހައްމަދު ނަޝީދުގެ ވިސްނުންފުޅު ވަރަށް ބޮޑަށް ތަފާތެވެ. އިމްރާންއަށް ރައްދު ދެއްވައި އެމަނިކުފާނު ވިދާޅުވެފައި ވަނީ؛ "7 ފެބުރުއަރީގައި ފުލުހުންނާއި ސިފައިން ދެއްކި ނުކިޔަމަންތެރިކަން ބަލައި ފިޔަވަޅު އަޅަން ޖެހޭ" ކަމަށެވެ.
އިމްރާން ރައްޔިތުންގެ މަޖިލީހުގައި މެމްބަރުންގެ ސުވާލުތަކަށް ޖަވާބު ދެއްވަނީ: ފެބުރުއަރީ 7 ގެ ވާހަކަ ދައްކައިގެން މަސްލަހަތު ގެއްލޭނެ ކަމަށް ވިދާޅުވި --- ފައިލް ފޮޓޯ/ މަޖިލިސް
ނަމަވެސް ސަން އޮންލައިންގެ "50 މިނިޓް" ޕްރޮގްރާމްގައި ވާހަކަދައްކަވަމުން ހޯމް މިނިސްޓަރު އިމްރާން ވިދާޅުވީ 7 ފެބްރުއަރީގައި އޭނާ އުޅުއްވީ "ސުލްހަވެރި ސިޔާސީ ހަރަކާތްތަކެއް"ގައި ކަމަށެވެ. އަދި ސުލްހަވެރި ސިޔާސީ ހަރަކާތަކީ މައްސަލައެއްގެ ގޮތުގައި މިނިސްޓަރު ދެކެވަޑައިނުގަންނަވަ އެވެ. މިނިސްޓަރު ވިދާޅުވަނީ އެއީ ރައްޔިތުންގެ ހައްގުގައި އަދާކުރަން ޖެހޭ ވާޖިބެއް ކަމަށެވެ.
"އެ ސުލްހަވެރި ސިޔާސީ ހަރާކާތްތަކުގައި އަޅުގަނޑު އުޅެމުން ދިޔައީ. ފެބްރުއަރީ ހަތެއްގެ ކުރިންވެސް އަދި ފެބްރުއަރީ ހަތެއްގައި ވެސް، އަދި އޭގެ ފަހުން މިއަދާ ހަމައަށްވެސް ސުލްހަވެރި ސިޔާސީ ހަރަކާތްތަކުގައި އިސް ސަފުގައި އަޅުގަނޑު މަސައްކަތް ކުރަން،" އިމްރާން ވިދާޅުވި އެވެ."ސުލްހަވެރި ސިޔާސީ ހަޔާތުން ބޭރުވާ ކަމެއް އަޅުގަނޑު ކޮށްފައި ނުވާނެ،"
އިމްރާން "ސަން" ގެ 50 މިނެޓް ޕްރޮގްރާމްގައި ޗީފް އެޑިޓަރު، އަހުމަދު ޒާހިރު އަށް އިންޓަވިއު ދެއްވަނީ: ފެބްރުއަރީ 7 ގުޅިގެން ވާހަކަ ދެއްކެވި --- ސަން ފޮޓޯ
މިިނިސްޓަރު ވިދާޅުވީ ރައްޔިތުންގެ ހައްގުގައި ސުލްހަވެރި ސިޔާސީ ހަރަކާތް ހިންގުމަކީ ކުރަަންޖެހޭ ކަމެއް ކަމަށާއި އެކަމުގައި ދެމި ހުންނަވާނެ ކަމަށެވެ.
"އަޅުގަނޑު ގަބޫލު ކުރަނީ، އިރާދަކުރެއްވިޔާ ދިވެހި ރައްޔިތުންގެ ހައްގުގައި ދެމި ހުންނާނީ. ސުލްހަވެރި ހަރަކާތުގެ ތެރެއިން ރައްޔިތުންގެ ހައްގުތައް ހޯދައިދޭން ކުރަން ޖެހޭ މަސައްކަތުގައި،" ސަރުކާރު ކޯލިޝަންގައި ހިމެނޭ އަދާލަތު ޕާޓީގެ ލީޑަރުކަންވެސް ކުރައްވަމުން ގެންދަވާ އިމްރާން ވިދާޅުވި އެވެ.
މިނިސްޓަރު ވިދާޅުވީ މިއަދުގެ ސަރުކާރުން ސުލްހަވެރި ސިޔާސީ ހަރަކާތަށް ހުރަސް ނާޅާނެ ކަަމަށާއި ގާނޫނުން ތަންދޭ އެންމެ ފުޅާ އިމުގެ ތެރެއިން އެ ފުރުސަތުތައް ކޮންމެ ބަޔަކަށް ވެސް އޮންނާނެކަމަށެވެ.
"ކޯނީ ރިޕޯޓަށް އިހުތިރާމް ކުރަން ޖެހޭ"
ރައީސް ނަޝީދާއި މިނިސްޓަރު އިމްރާން: ކޯނީގެ ރިޕޯޓަށް އިހުތިރާމް ކުރަން ޖެހޭ ކަމަށް އިމްރާން ވިދާޅުވި -- ފައިލް ފޮޓޯ/ އަދާލަތު ޕާޓީ
ފެބްރުއަރީ 7 ގައި ހިނގި ކަންކަމަކީ ސަލާމަތީ ބާރުތަކުގެ ނުކިޔަމަންތެރިކަން ދެއްކުމެއް ކަމަށް ރައީސް މުހައްމަދު ނަޝީދު އަބަދުވެސް ސިފަކުރައްވަ އެވެ. އެއީ ގައުމީ ސަލާމަތަށް އޮތް ނުރައްކަލެއްކަން ފާހަގަ ކުރައްވައި އެކަންކަން ތަހުގީގު ކުރުމަށް އެމަނިކުފާނު އަބަދުވެސް ބާރުއަޅުއްވަ އެވެ.
ނަމަވެސް ހޯމް މިނިސްޓަރު އިމްރާން "50 މިނިޓް" ޕްރޮގްރާމްގައި ވިދާޅުވީ، ފެބުރުއަރީ 7 އެއް އެއީ، ބަގާވާތެއް ނޫންކަމަށް އެ މައްސަލަ ތަހުގީގުކުރި ކޮމިޝަން އޮން ނޭޝަނަލް އިންކުއަރީ (ކޯނީ)އިން ނިންމާފައިވާ ކަމަށެވެ. އަދި އެ ނިންމުމަށް އިހުތިރާމުކުރަންޖެހޭ ކަމަށް މިނިސްޓަރު ވިދާޅުވި އެވެ. ސަބަބެއް ކަމަށް ވިދާޅުވީ، ކޯނީ ރިޕޯޓަށް އިހުތިރާމް ކުރަން އޭރުގެ ހުރިހާ ސިޔާސީ ބޭފުޅުން އެއްބަސްވެފައިވުމެވެ.
"އޭރުގެ ހުރިހާ [ސިޔާސީ] ފަރާތްތަކުން އެއްބާރުލުން ދީގެން އަދި ކޯނީ އިން ނިންމާ ނިންމުމެއްގެ މައްޗަށް ނުވަތަ އެރިޕޯޓުގެ މައްޗަށް ހުރިހާ ބޭފުޅުން ގަބޫލުކުރާނެ ކަމަށް އެއްބަސްވެގެން އެ މަސައްކަތް ކުރެވި ރިޕޯޓެއް ނެރެވިގެން ދިޔައީ. އެހެން ވީމަ އެ ރިޕޯޓަށް އިހުތިރާމް ކުރަންވާނެ ކަމަށް އަޅުގަނޑު ގަބޫލުކުރަން،" އިމްރާން ވިދާޅުވި އެވެ.
މިއަދާ ހަމައަށްވެސް އައިސްފައި ވަނީ އެ ރިޕޯޓް ބަލައިގަނެގެންކަން ފާހަގަ ކުރައްވަމުން މިނިސްޓަރު ވިދާޅުވީ، އެ ރިޕޯޓްގެ ބޭރުން ކަމެއް ތަހުގީގު ކުރަން ބޭނުން ނަމަ، އެކަމެއް ކުރަން ޖެހޭނީ ގާނޫނީ ހަމަތަކުގެ ތެރެއިން ކަމަށެވެ. ނަމަވެސް އެއީ ކޮން ހަމައެއް ކަމެއް ވިދާޅެއް ނުވި އެވެ.
ފެބްރުއަރީ 7، 2012: ރައީސް ނަޝިދު އިސްތިއުފާ ދެއްވުމަށް މުލިއާ ގޭގައި: ނަޝީދު އިސްތިއުފާ ދެއްވީ އިމްރާން އިސްވެ ހުންނަވައި އޭރު އިދިކޮޅު ފަރާތްތަކުން ކުރި ސިލްސިލާ މުޒާހަރާތަކަށްފަހު --- ފައިލް ފޮޓޯ
ފެބްރުއަރީ 7 ގެ ވާހަކަދައްކައިގެން މަސްލަހަތު ގެއްލޭނެކަމަށް ވިދާޅުވާ ވިދާޅުވުން ތަފްސީލް ކޮށްދެއްވަމުން ވިދާޅުވީ، އެއީ ސިޔާސީ ހަމަނުޖެހުމެއް ކަމަށާއި އެ ވާހަކަ ނަގަނަގައިގެން ދައްކާ ނަމަ ހިޔާލު ތަފާތުވުން އުފެދި މުޖުތަމައު ހަލަބޮލިވެގެން ހިނގައިދާނެ ކަމަށެވެ.
އެ ވާހަކަ ދެއްކުމުން ގައުމަށް ލިބޭ ގެއްލުން މާ ބޮޑުވާނެ ކަމަށާއި، އެއަށްވުރެ ގައުމަށް މިއަދު ދިމާވެފައިވާ ބޮޑެތި މައްސަލަތަކުގެ ހައްލުތަކަށް މަސައްކަތް ކުރުން މުހިންމުކަމަށް މިނިސްޓަރު އިމްރާން ވިދާޅުވި އެވެ.
"އިގްތިސާދީ ބޮޑެތި ގޮންޖެހުންތައް އަންނާނެ. ސިޔާސީ ގޮތުން އަންސްޓޭބަލްކަން އަންނާނެ. އަނެއްކާ ސަރުކާރަށް ލޮޅުންތަކެއް އަރައި، އެތައް ގެއްލުންތަކެއް މުޅި ދައުލަތައް ލިބިގެންދާނެ. އެކަމުގެ ތެރެއަށް އެބުރި ދާންތޯ ބޭނުމީ. ނުވަތަ ގައުމު ސްޓޭބަލްކޮށް ގެންދާއިރު، އިސްލާހު ކުރަން ޖެހޭ ކަންތައް އިސްލާހުކޮށްގެން ރަނގަޅަށް ގައުމު ކުރިއަށް ގެންދަންތޯ ބޭނުމީ،" ފެބުރުއަރީ 7 އަލުން ތަހުގީގު ކުރުމާ މެދު ސުވާލުކުރުމުން އިމްރާން ވިދާޅުވި އެވެ.