(ލ. މާމެންދޫ): ކަނޑުފަރާއި ތިމާވެށީގެ ރައްކާތެރިކަމަށް ލ. އަތޮޅުގައި ބާއްވަމުން އަންނަ ރާއްޖޭގެ އެންމެ ބޮޑު އެއް ފެސްޓިވަލް މިއަދު ފަށައިފިއެވެ.
އެއް ދުވަހަށް ކުރިއަށް ގެންދާ މި ފެސްޓިވަލް އަށް ކުރީން ކިޔާފައިވަނީ "ޓާޓްލް ފެސްޓިވަލް" އެވެ. ނަމަވެސް ތިމާވެށީގެ ގިނަ ދާއިރާތައް ހިމަނައި، ސްކޯޕް ފުޅާކުރުމަށްޓަކައި ޓާޓްލް ފެސްޓިވަލްގެ ނަން ލާމާފަރު ފެސްޓިވަލްގެ ނަމަށް ވަނީ މިއަހަރު ބަދަލުކޮށްފައެވެ.
ސިކްސް ސެންސެސް ލާމު ރިސޯޓުން އިންތިޒާމުކުރާ މި ފެސްޓިވަލް މި އަހަރު ބާއްވަމުން ގެންދަނީ ލ. މާމެންދޫގައެވެ.
"ލާމާފަރު ފެސްޓިވަލް" ތެރެއިން -- ފޮޓޯ/ ސިކްސް ސެންސެސް ލާމު
މިއަދު ހެދުނު ފެށި އެ ފެސްޓިވަލްގައި ލ. އަތޮޅުގެ 11 ރަށަކުން ވަނީ ބައިވެރިވެފައިވެއެވެ. އޭގެތެރޭގައި 13 ސްކޫލަކާއި ކައުންސިލުގެ އިތުރުން ރަށްރަށުގެ އަންހެނުން ކުރިއަރުވާ ކޮމިޓީތައް ހިމެނެއެވެ.
މިއަހަރުގެ ފެސްޓިވަލްގައި ތިމާވެށްޓާ ގުޅޭގޮތުން ހޭލުންތެރިކަން އިތުރުކުރުމުގެ ގޮތުން ގިނަ ހަރަކާތްތަކެއް ކުރިއަށް ގެންދިޔުމަށް ވަނީ ހަމަޖެހިފައެވެ.
"ލާމާފަރު ފެސްޓިވަލް" ތެރެއިން -- ފޮޓޯ/ ސިކްސް ސެންސެސް ލާމު
މިއަހަރުގެ ފެސްޓިވަލްގައި ހުރިހާ ސްކޫލުތަކަށް ހުޅުވާލައިގެން ފެތުމުގެ ރޭހެއް ކުރިއަށްދާނެއެވެ. އަދި ތިމާވެށްޓާ ގުޅޭ ތާރީހީ ވާހަކައެއް ކޮންމެ ސްކޫލަކުންވެސް މިއަދުގެ ފެސްޓިވަލްގައި ކުރިއަށްދާނެއެވެ. ފެސްޓިވަލްގައި ބާއްވާ ބޮޑު ޕެރޭޑަކީވެސް ވަރަށް ބޮޑަށް ފާހަގަކޮށްލެވޭ ހަރަކާތެކެވެ.
އެ ފެސްޓިވަލްގެ ބޭނުމަކީ ކަނޑުތަކާއި ފަރުތަކުގެ އިތުރުން ކުޅިތަކާއި ފާތައް ރައްކާތެރިކުރުމަށް ހޭލުންތެރިކަން އިތުރުކުރުމެވެ. އަދި ޕްލާސްޓިކް ބޭނުންކުރުން ހުއްޓުވުމަށް ބާރުއެޅުމަކީވެސް އެ ފެސްޓިވަލްގެ ބޭނުމެކެވެ.
މިއީ އެ ފެސްޓިވަލް ބާއްވާ ހަތަރު ވަނަ އަހަރެވެ. އެންމެ ފަހުން އެ ފެސްޓިވަލް ބާއްވާފައިވަނީ ލ. މާބައިދޫގައެވެ.
މިއަދުގެ ފެސްޓިވަލް ފެށުމުގެ ރަސްމިއްޔާތުގައި ފޮނަދޫ ދާއިރާގެ މެމްބަރު މޫސާ ސިރާޖު ބައިވެރިވެވަޑައިންނެވިއެވެ. އަދި އޭގެއިތުރުން އެމްއެންޑީއެފް އާއި ޕޮލިހުންވެސް ވަނީ މިއަދުގެ ރަސްމިއްޔާތުގައި ބައިވެރިވެފައެވެ.