ސުޕްރީމް ކޯޓުގެ ފަނޑިޔާރު ކަމަށް ޑރ. އަޒްމިރަލްދާ ޒާހިރު އަދި އައިޝާ ޝުޖޫނަށް ރުހުން ދިނުމާމެދު ގޮތެއް ނިންމުމަށް މާދަމާގެ ރައްޔިތުންގެ މަޖިލީހުގެ ޖަލްސާގައި އެޖެންޑާ ކޮށްފި އެވެ.
މާދަމާގެ ޖަލްސާގައި އެޖެންޑާ ކޮށްފައި ވަނީ ރައްޔިތުންގެ މަޖިލީހުގެ ޖުޑީޝަރީ ކޮމިޓީއިން އެ މައްސަލަ ދިރާސާކޮށް ނިންމި ގޮތުގެ ރިޕޯޓު ހުށަހެޅުމެވެ.
ސުޕްރީމް ކޯޓަށް އަޒްމިރަލްދާ އަދި ޝުޖޫން އައްޔަން އައްޔަން ކުރަން ފެންނަ ކަމަށް ޖުޑިޝަރީ ކޮމިޓީއިން މިދިޔަ ހަފްތާގައި ވަނީ ނިންމައިފައެވެ. ކޮމިޓީ ރިޕޯޓު ހުށަހެޅުމަށްފަހު، ރިޕޯޓަށް ބަހުސްކޮށް، ދެން އޮންނާނީ ރުހުން ދިނުމާ މެދު މަޖިލީހުގައި ވޯޓަށް އެހުމެވެ.
އަޒްމިރަލްދާ އަދި ޝުޖޫން އައްޔަނު ކުރުމަށް ފެންނަ ކަމަށް ރައީސް އިބްރާހިމް މުހައްމަދު ސޯލިހަށް ޖުޑިޝަލް ސާވިސް ކޮމިޝަނުން ވަނީ ލަފާ ދެއްވާފަ އެވެ. ޖުޑީޝަރީ ކޮމިޓީން ނިންމީ އެ ލަފައާ އެއްގޮތަށް ކުރިއަށް ދާށެވެ.
ސުޕްރީމު ކޯޓުގެ ފަނޑިޔާރު ކަމަށް އަޒްމިރަލްދާ އަދި ޝުޖޫން އައްޔަން ކުރަން ފެންނަ ކަމަށް ކޮމިޓީ އިން ނިންމި އިރު ޖުޑިޝަރީ ކޮމިޓީއިން ފަނޑިޔާރުކަމަށް ކުރިމަތިލީ ފަރާތްތަކާ އިންޓަވިއުކޮށްފައެއް ނުވެ އެވެ.
އައިޝާ ޝުޖޫން މުހައްމަދަކީ ސިވިލް ކޯޓުގެ ގާޒީކަން ކުރައްވާފައިވާ ބޭފުޅެކެވެ. އަދި ޑރ. އަޒްމިރަލްދާ ޒާހިރަކީ ހައިކޯޓުގެ ފަނޑިޔާރުކަން ކުރައްވާފައިވާ ބޭފުޅެކެވެ.