ކުރީ ސަރުކާރުގައި ތަރައްގީގެ މަޝްރޫއުތައް ހިންގާފައި ހުރީ ވަރަށް އަގުބޮޑުކޮށް ކަމަށާއި މި ސަރުކާރުން އެ ފަދަ މަޝްރޫއުތައް 57 ޕަސެންޓް އަގުހެޔޮކޮށް ކުރަމުން އަންނަ ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ސަޕްލިމަންޓްރީ ބަޖެޓާ ގުޅޭ ގޮތުން ރޭ މަޖިލީހަށް މައުލޫމާތު ދެއްވަމުން މިނިސްޓަރު އަމީރު ވިދާޅުވީ، މި ސަރުކާރުން މަޝްރޫއުތައް ހިންގަނީ ހުޅުވާލައިގެން ކުރިއަށް ގެންދާ ބިޑިން ޕްރޮސެސްއަކުން ކަމަށާއި އެކަމުގެ ސަބަބުން މަޝްރޫއުތަކުގެ އަގު ވަރަށް ބޮޑަށް ހެޔޮ ކުރެވޭ ކަމަށެވެ. މިސާލެއްގެ ގޮތުގައި، މިނިސްޓަރު ވިދާޅުވީ ރައީސް އަބްދުﷲ ޔާމީންގެ ސަރުކާރުގައި 70 މިލިއަން ރުފިޔާއަށް ކުރި ނަރުދަމާގެ މަސައްކަތް މި ސަރުކާރުން ކުރަނީ 30 މިލިއަން ރުފިޔާއަށެވެ.
"އާ ސަރުކާރުން އޯޕަން އަދި ޓްރާންސްޕޭރަންޓް ޓެންޑަރިން ޕްރޮސެސްކުރިއަށް ގެންދާތީ ކުރީގައި އަޅުގަނޑުމެންނަށް އަގުބޮޑުކޮށް ކުރެވުނު މަސައްކަތްތައް އަޅުގަނޑުމެންނަށް މިހާރު އަގު ކުޑަކޮށް ކުރެވޭ. ކުރީގައި ފެނާއި ނަރުދަމާގެ މަސައްކަތް 70 މިލިއަން ރުފިޔާއަށް ކުރެވުނު އިރު މިހާރު 30 މިލިއަން ރުފިޔާއަށް ކުރެވޭ،" މިނިސްޓަރު ވިދާޅުވި އެވެ.
މިއަހަރުގެ ބަޖެޓްގައި ހިމެނިފައިވާ ޕީއެސްއައިޕީގެ ހުރިހާ މަޝްރޫއުތަކެއް އަހަރު ނިމުމުގެ ކުރިން ބިޑަށްލައި އެކި ފަރާތްތަކާ ހަވާލުކޮށް މަސައްކަތް ފެށޭނެ ކަމުގެ ޔަގީންކަން އޮތް ކަމަށް ވެސް މިނިސްޓަރު ވިދާޅުވި އެވެ. އަދި އެކަމުގެ ސަބަބުން، ބަޖެޓްގެ ހޭދަ އިތުރުވެގެން އަންނާނެ ކަން ވެސް މިނިސްޓަރު ފާހަގަ ކުރެއްވި އެވެ.
"މި މަޖިލީހުގެ އިއްޒަތްތެރި މެންބަރުންނާއި ރައީސްއަށް އަޅުގަނޑު ޔަގީންކަން އަރުވަން ބަޖެޓްގައި ޖަހާފައި ހުރި ޕީއެސްއައިޕީގެ ހުރިހާ މަޝްރޫއުތަކެއް މި އަހަރު ޑިސެމްބަރު އަންނަންވާއިރަށް އަޅުގަނޑުމެންނަށް ފެށޭނެ،" މިނިސްޓަރު ވިދާޅުވި އެވެ.
މިނިސްޓަރު އަދި ވިދާޅުވީ، މަޝްރޫއުތަކުގެ ހޭދަ މި ސަރުކާރުން އިތުރު ކުރަނީ ދަރަނި އިތުރު ނުވާނެ ގޮތަކަށް ބަލައިގެން ކަމަށެވެ. އެގޮތުން މުޅި އަހަރު ތެރޭ ދަރަނި ދެއްކުމަށް 2.2 ބިލިއަން ރުފިޔާ މި ސަރުކާރުން ހަރަދު ކުރާނެ ކަމަށް ވެސް މިނިސްޓަރު ވިދާޅުވި އެވެ. ދަރަނި ދައްކަން އަދި ހަރަދު ކުރެވިފައި ވަނީ 600 މިލިއަން ރުފިޔާ އެވެ.
މީގެ އިތުރުން މިނިސްޓަރު ވިދާޅުވީ މި ސަރުކާރާ ހަވާލުވީއިރު، މިދިޔަ ސަރުކާރުން ސްޓޫޑަންޓް ލޯނު ދިނުމަށް ހޮވާފައިވާ 200 ކުއްޖަކަށް އެ ލޯނު ނުދީވާ ކަމަށެވެ. އަދި މި ސަރުކާރުން އެ 200 ކުދިންނަށް ވެސް ލޯނު ދޫނުކުރާނެ ކަމަށް މިނިސްޓަރު ވިދާޅުވި އެވެ. އަދި ވިދާޅުވީ، ސަރުކާރުން ދޫކުރާ ލޯނުތަކުގެ ތެރެއިން އަނބުރާ ފައިސާ ނުލިބޭ ލޯނުތަކަށް ފައިސާ ހޯދުމަށް މިހާރު އޮންނަ އުސޫލު ހަރުދަނާ ކުރުމުގެ މަސައްކަތް ވެސް މި ސަރުކާރުން ކުރަމުން އަންނަ ކަމަށެވެ.
ސަރުކާރު މުވައްޒަފުންގެ މުސާރައަށް ހެޔޮ ބަދަލެއް ގެނައުމަކީ ރައީސް އިބްރާހިމް މުހައްމަދު ސޯލިހުގެ ރިޔާސީ ވައުދެއްކަން ފާހަގަ ކުރައްވަމުން މިނިސްޓަރު އަމީރު ވިދާޅުވީ، މުވައްޒަފުންގެ މުސާރަޔަށް ހެޔޮ ބަދަލެއް ގެނައުމުގެ ކުރަން ޖެހޭ ދިރާސާތަކުގެ މަސައްކަތް ޕޭކޮމިޝަނުން މިހާރު ކުރަމުން އަންނަ ކަމަށެވެ. އަދި އެ މަސައްކަތް ނިމުމުން އެކަމުގައި ގޮތްތަކެއް ކަނޑައެޅޭނެކަން ވެސް މިނިސްޓަރު ފާހަގަ ކުރެއްވި އެވެ.