ސިއްހީ އިންޝުއަރެންސްގެ ހިދުމަށް ހަރުދަނާކުރުމުން އުފަންވާއިރު ހިތުގެ ބަލިތައް ހުންނަ ކުދިންނަށް އެހީވެ އެ ކުދިންނަށް ރަނގަޅު ފަރުވާ ދިނުމުގެ އިންތިޒާމްތައް ހަމަޖެހިގެންދާނެ ކަމަށް އުއްމީދުކުރައްވާ ކަމަށް ރައީސް އިބްރާހިމް މުހައްމަދު ސޯލިހް ވިދާޅުވެއްޖެއެވެ.
ޓައިނީ ހާޓްސްއަށް 10 އަަހަރު ފުރުން ފާހަގަކުރުމަށް މިރޭ ދަަރުބާރުގޭގައި ބޭއްވި ރަސްމިއްޔާތު ޝަރަފްވެރިކޮށްދެއްވައި ރައީސް ވިދާޅުވީ ތުއްތު ކުދިން އުފަންވާއިރު، ކުރިމަތިވާ ހިތުގެ މައްސަލަތަކަކީވެސް، ރާއްޖޭގެ ނިސްބަތުން ބަލާއިރު، ސިއްހީ ބޮޑު މައްސަލައެއް ކަމަށެވެ.
ރައީސް ވިދާޅުވީ އެފަދަ ބަލިތަކުން ތުއްތު ކުދިން ރައްކާތެރިކުރުމަށްޓަކައި، ކުރަންޖެހޭ އެންމެހައި ކަންކަން ކުރުމުގެ ގޮތުން ދުޅަހެޔޮ މުޖުތައެއް ބިނާކުރުމުގެ ސިޔާސަތުގެ ތެރޭގައި، މިހާރު އެކަންވެސް ހިމަނައިފައިވާ ކަމަށެވެ.
އެފަދަ ބަލިތަކަށް ފަރުވާ ހޯދުމަކީ، އަލަތު ދަރިފުޅު ލިބޭ ދެމަފިރިންނަށް އެކަނި އުފުލޭ ވަރަށްވުރެ ބޮޑު ތަކުލީފެއް ކަމަށާއި އެކަމަށް ވަރަށް ބޮޑު ހޭދައެއް ކުރަން ޖެހޭކަން ރައީސް ވަނީ ފާހަގަކުރައްވައިފައެެވެ. އެހެން ނަމަވެސް ސިއްހީ ރައްކާތެރިކަމުގެ ނިޒާމުގެ ތެރެއިން، އެފަދަ ކުދީންނަށް ފަރުވާކުރެވޭނެ އިންތިޒާމެއް، މިދިޔަ އަހަރުތަކުގައިވެސް ހަމަޖައްސާފައި ނެތުމަކީ ހިތާމަހުރި ކަމެއްކަމަށް ރައީސް ވިދާޅުވިއެވެ.
ރައީސް ވިދާޅުވީ އެފަދަ ނިޒާމެއް ހަަމަޖެހިފައި ނެތީ ބަޔަކު މީހުން އެނިޒާމުގެ ނަހަމަ ބޭނުން ހިފަމުން ދިޔުމުން ކަމަށެވެ. އަދި ސަރުކާރުން މިހާރު މަސައްކަތް ކުރަމުން ދަނީ އިޖްތިމާއީ ސިއްހީ އިންޝުއަރެންސްގެ ނިޒާމްގައި ހުރި މައްސަލަތައް ދެނެގަނެ، އެ ނިޒާމު ހަރުދަނާކޮށް ފުރިހަމަކުރުމަށް ކަމަށް ރައީސް ވިދާޅުވިއެވެ.
އެގޮތުން އާސަންދަ އާއި އެންސްޕާއިން މިހާރު އެ މަސައްކަތް ކުރަމުންދާ ކަމަށް ރައީސް ވިދާޅުވިއެވެ.
"މާތް ﷲގެ ވާގިފުޅާއެކު، އެ މަސައްކަތް ފުރިހަމަވެގެންދާއިރު، އުފަންވާއިރު ހިތުގެ ބަލިތައް ހުންނަ ކުދިންނަށް ބޭނުންވާ ފަރުވާ އާއި، އެފަދަ އާއިލާތަކަށް ބޭނުންވާ އެހީތެރިކަން ލިބޭނެ އިންތިޒާމު، ހަމަޖެހިގެންދާނެ ކަމަށް އަޅުގަނޑު އުންމީދުކުރަން. އެކަމުގައި ޓައިނީ ހާޓްސްގެ ލަފަޔާއި މަޝްވަރާ އަޅުގަނޑުމެން ހޯދާނަން." ރައީސް ވިދާޅުވިއެވެ.